Ko e Folofola ʻa e ʻOtuá ʻOku ʻAonga ki he Akonaki

1. Ko e hā ʻa e kaveinga ʻo e ʻasemipilī fakasēketi ki he taʻu fakangāue 2014, pea ko e hā ʻa e fehuʻi ʻe tali ʻi he polokalamá?

¹ Ko ʻetau “Faiako Maʻongoʻonga,” ʻa Sihova, ko e faiako lelei taha ia ʻi he ʻunivēsí. (ʻAi. 30:20, 21, NW) Neongo ia, ʻoku anga-fēfē hono akoʻi kitautolu ʻe Sihová? Kuó ne ʻomai ha tohi ʻa ia ʻoku tuʻu-ki-muʻa ange ia ʻi he kotoa ʻo e ngaahi tohi kehé—ko ʻene Folofola fakamānavaʻí, ʻa e Tohi Tapú. ʻOku lava fēfē ke ʻaonga kiate kitautolu ʻa e akonaki fakaʻotuá ʻi he tuʻunga fakaesinó, fakaeʻatamaí, fakaeongó mo e fakalaumālié? Ko e tali ki he fehuʻi ko ení ʻe lāulea ki ai ʻi he lolotonga ʻo e polokalama ʻo ʻetau ʻasemipilī fakasēketi ki he taʻu fakangāue 2014. Ko e kaveinga ʻo e polokalamá, “Ko e Folofola ʻa e ʻOtuá ʻOku ʻAonga ki he Akonaki,” ʻoku makatuʻunga ia ʻi he 2 Tīmote 3:16.

2. Ko e ngaahi poini mahuʻingá ʻe fakamamafaʻi ʻaki ʻa e ngaahi tali ki he ngaahi fehuʻi fē?

² Vakai ki he Ngaahi Poini Mahuʻinga ko Ení: Ko e ngaahi poini mahuʻinga ʻo e polokalamá ʻe fakamamafaʻi ia ʻe he ngaahi tali ki he ngaahi fehuʻi ko ení:

• Ko e hā ʻa e ola ʻoku fakahoko ʻe he akonaki fakaʻotuá ki heʻetau moʻuí? (ʻAi. 48:17, 18)

• Kapau ʻoku tau feinga ke fai ha ngaahi liliu ʻi hotau tuʻungá ke ngāue taimi-kakato kia Sihova, ko e hā ʻe lava ke tau fakapapauʻí? (Mal. 3:10)

• ʻOku totonu ke fēfē ʻetau fakafeangaí ʻi he taimi ʻoku tau fetaulaki ai mo ha ‘akonaki ngalikehe’? (Hep. 13:9)

• ʻE lava fēfē ke tau faʻifaʻitaki ki he “founga faiako” ʻa Sīsuú? (Māt. 7:28, 29)

• Ko e hā ʻoku totonu ai ki he kau faiako ʻi he fakatahaʻangá ke nau akoʻi pē kinautolú? (Loma 2:21)

• ʻOku ʻaonga ki he hā ʻa e Folofola ʻa e ʻOtuá? (2 Tīm. 3:16)

• ʻOku anga-fēfē hono uesia ʻa e kakaí ʻi hono “luluʻi” ʻo e ngaahi puleʻangá? (Hāk. 2:6, 7)

• Ko e hā ʻa e falala-pau ʻoku tuku mai ʻe Sihova kiate kitautolú? (ʻEf. 5:1)

• Ko e hā kuo pau ai ke tau ngāue mālohi ke nofo ai pē ʻi he akonaki ʻa Sihová? (Luke 13:24)

3. Ko e hā hono mahuʻinga kiate kitautolu ke kau mo tokanga lelei ki he polokalama taimi tonu ko ení?

³ Ki muʻa ange ʻi he 2 Tīmote vahe 3, ki muʻa pē ke hiki ʻa e ngaahi lea ʻa ia ʻoku fakakaveinga ʻaki ʻa e polokalama ko ení, naʻe fakamatala ai ʻa Paula ko e ngaahi taimi faingataʻá ʻe fakaʻilongaʻi ʻaki ia ʻa e ngaahi ʻaho fakaʻosí. Naʻá ne tohi: “Ko e kau tangata fulikivanú mo e kau kākaá te nau ʻalu mei he kovi ki he kovi ange, ʻo fai ʻa e takihalaʻi pea te nau hoko ʻo takihalaʻi.” (2 Tīm. 3:13) Koeʻuhi ke ʻoua ʻe takihalaʻi kitautolú, he mahuʻinga ē kiate kitautolu ke fanongo mo ngāueʻaki ʻa e akonaki fakaʻotuá! Ko ia ai, ʻofa ke tau fakapapauʻi ke kau mo tokanga lelei ki he polokalama taimi tonu ko ení.