‘Tuku ke Fai ʻa e Finangalo ʻo e ʻOtuá’

1. Ko e hā ʻa e kaveinga ʻo e polokalama ʻaho ʻasemipilī makehe ki he taʻu fakangāue 2012, pea ko e hā ʻoku feʻungamālie ai ke tau lāulea ki he kaveinga ko ení?

¹ Naʻe ngaohi pe fakatupu kitautolu koeʻuhi ko e finangalo ia ʻo e ʻOtuá. (Fkh. 4:11) Ko ia ai, ʻe taʻemalava ke fakahoko ʻa e taumuʻa ʻetau ʻi aí ni ʻo ʻikai ako mo fai ʻa e finangalo ʻo e ʻOtuá. ʻOku ʻikai nai faingofua eni hangē ko ʻene haá, koeʻuhí kuo pau ke tau faitau mo ha hehema ʻi loto ke fai e “ngaahi tuʻutuʻuni ʻa hota kakano mo ʻeta ngaahi fakakaukau” pe ke fai “ʻa e loto ʻo e Senitaile.” (Ef. 2:3; 1 Pita 4:3; 2 Pita 2:10) Ka ʻikai e tokoni ʻa e ʻOtuá, ʻe aʻu ʻo tau ʻi ha tuʻunga fakatuʻutāmaki ʻo e hoko ʻo ‘puke moʻui kitautolu [ʻe he Tēvoló] ke tau fai hono lotó.’ (2 Tim. 2:26, NW) Ko ʻetau polokalama ʻaho ʻasemipilī makehe ki he taʻu fakangāue 2012, ʻe tokoniʻi tāutaha ai kitautolu ke ngāue fehoanaki mo e kole tefito hono tolu ʻi he sīpinga lotú, ʻa ia ko e, ‘tuku ke fai ho finangaló.’—Mt. 6:9, 10, NW.

2. Ko hā e ngaahi fehuʻi ʻe tali lolotonga ʻa e polokalamá?

² Ngaahi Fehuʻi ʻe Tali: ʻI hoʻo fanongo ki he polokalamá, fakasio e ngaahi tali ki he ngaahi fehuʻi ko ení: Ko e hā ʻoku mahuʻinga hangē ko e fanongo ki he Folofola ʻa e ʻOtuá? ʻE lava fēfē ke tau hoko atu ke ʻiloʻi e finangalo ʻo e ʻOtuá kia kitautolú? Ko e hā ʻoku fiemaʻu ai ke tau loto-lelei ke kakapa atu ki he faʻahinga kakai kotoa pē? ʻE lava fēfē ke tau maʻu ha moʻui tuʻumālie mo fakafiemālie? Fānau, ko e hā ʻokú ke fiemaʻu ke fakamoʻoniʻi kia Sihová? Ko e hā e ngaahi pale ʻoku maʻu mei hono fai e finangalo ʻo e ʻOtuá? Ko e hā ʻoku fakavavevave ai ke tau langa hake mo fakalototoʻaʻi e niʻihi kehé?

3. ʻE lava fēfē ke tau maʻu ʻaonga kakato mei he tokonaki fakalaumālie ko ení?

³ Fakapapauʻi ke maʻu pea ke tokanga lelei ki he polokalamá. Ko ha fakafofonga Pēteli pe ko ha ʻovasia fefonongaʻaki ʻe ngalingali ʻe ʻi aí ko ha tokotaha-malanga ʻaʻahí. Ki muʻa mo e hili ʻa e polokalamá, ongoʻi tauʻatāina ke lea kiate ia mo hono uaifí, kapau ʻokú ne mali. ʻI hoʻo foki ki ʻapí, ʻoua ʻe hoko “ko ha taha fanongo kae ngalo” kae fakamanatu e polokalamá ʻi he tuʻunga ko ha fāmili pea lāulea ki he founga ʻe lava ke ke ngāue ai ʻo fehoanaki mo e finangalo ʻo e ʻOtuá ke kakato ange.—Sem. 1:25.

4. Ko e hā ʻoku mahuʻinga ai ke tau ʻai hono fai e finangalo ʻo e ʻOtuá ko ʻetau meʻa muʻomuʻá ia?

⁴ Kuo vavé ni ʻaupito ko e faʻahinga ko ia ʻoku nau tuli ki heʻenau ngaahi holi pē ʻanautolú pea ʻoku nau fakafisi ke anganofo ki he finangalo ʻo e ʻOtuá ʻe fakaʻauha. (1 Sione 2:17) Ko ia ai, ʻoku tau fakafetaʻi he kuo teuteu ʻe Sihova ʻa e fakamatala taimi tonu ko ení ke tokoniʻi kitautolu ke ʻai hono fai e finangalo ʻo e ʻOtuá ko ʻetau meʻa muʻomuʻá ia!