Ngaahi Hokosia

◼ ʻAositelēlia: Ko Sione ko ha tangata naʻe ako lelei, naʻe ʻalu ki he lotú ʻi heʻene kei siʻí ka naʻe hoko ia ko ha “tokotaha fakaʻikaiʻi-ʻOtua fefeka.” Naʻe ʻoange ʻe ha tāimuʻa kiate ia ha polosiua ko e Was Life Created? pea ʻi heʻene ʻaʻahi hokó naʻá ne toe ʻoange leva ʻa e polosiua ko e Origin of Life. Naʻe hokohoko atu ʻe he tāimuʻá hono fakatupulekina ʻene mahuʻingaʻiá ʻaki hono ʻoange kiate ia ʻa e ngaahi makasini fakamuimui tahá mo fakaʻaliʻali ha kupu pē ʻoku fekauʻaki mo e fakatupú pe kikite Fakatohitapú. ʻI heʻene fakakaukau kuo mateuteu ʻa Sioné, naʻá ne ʻoange kiate ia ʻa e tohi The Bible—God’s Word or Man’s?  Hili hono lau iá, naʻe kamata pehē ʻe Sione ko iá tonu ko ha tokotaha “fakaʻikaiʻi-ʻOtua vaivai.” Naʻe fakaʻaliʻali ange leva ʻe he tāimuʻá ʻa e tohi Akoʻi ʻe he Tohi Tapú, ʻo ne fakahaaʻi kia Sione ʻa e palakalafi 8 ʻi he peesi 20 mo e palakalafi 13 ki he 16 ʻi he peesi 23-24. Ko e ngaahi konga Tohi Tapu naʻe hā ʻi he fakamatalá naʻe maongo ʻaupito ia kia Sione ʻa ia naʻá ne pehē, “Mahalo ʻoku fiemaʻu ke u ʻoange ha toe faingamālie ke ako ai ʻa e Tohi Tapú.”

◼ Mekisikou: Naʻe tala ange ʻe ha tangata ki ha tokotaha malanga, ʻoku ʻikai ke tui ia ko e Tohi Tapú naʻe fakamānavaʻi ʻe he ʻOtuá. Naʻe kole ange ʻe he tokotaha malangá pe te ne fakahaaʻi ange ha fakamoʻoni ko e Tohi Tapú naʻe fakamānavaʻi. Hili ha fetalanoaʻaki, naʻe kamata ke ongo ki he loto ʻo e tangatá ʻa e meʻa naʻá ne ako mei he Tohi Tapú. Naʻe tautefito hono ueʻi iá ʻi he taimi naʻá ne ako ai fekauʻaki mo e ngaahi tuʻunga fakaʻotuá. Naʻá ne tala ange ki he tokotaha malangá: “ʻI he ʻuluaki taimi naʻá ta lau fakataha ai ʻa e Tohi Tapú, naʻe hā ngali ko ha faleʻi pē ia mei ha tohi kehe pea naʻe ʻikai maongo ia kiate au. Ka ʻi he taimí ni ʻi heʻeta lau iá, tautefito ki he fakahinohino fekauʻaki mo e tuʻunga fakaeʻulungāngá naʻe maongo ia ki hoku lotó.”

◼ ʻAmelika: Lolotonga ʻa e kau atu ki he faifakamoʻoni makehe ʻi he feituʻu femoʻuekina ʻi he loto koló, naʻe fetaulaki ha ongo meʻa mali mo ha fefine mei Taiuani naʻe tui ki he ʻOtuá ka naʻá ne ongoʻi ko e Tohi Tapú ko e tohi pē ia maʻá e kakai ʻo e Uēsité. Naʻá ne haʻu ki heʻena tēpile fakaʻaliʻaliʻanga tohí koeʻuhi naʻá ne ongoʻi kuo siva ʻene ʻamanakí neongo naʻe moʻui tuʻumālie. Naʻá ne tui ʻe tokoniʻi ia ʻe he Tohi Tapú ke ne maʻu ha taumuʻa ʻi he moʻuí. Naʻe kamata ʻe he ongo meʻa malí ha ako mo ia ʻo ngāueʻaki ʻa e tohi Akoʻi ʻe he Tohi Tapú fakataha mo e polosiua ko e Lasting Peace and Happiness—How to Find Them. ʻI he ʻikai kamata ʻa e akó ʻi he vahe 2 ʻo e tohí, naʻa nau lāulea ʻi he konga ʻi he polosiua naʻe fakakaveinga ko e “A Guidebook for the Blessing of All Mankind.” Hili ʻa e lāulea ʻi he ʻuluaki palakalafi ʻe ono ʻi he konga ko iá, naʻe fakahaaʻi ʻe he fefiné ʻene ofoofo ʻi he makehe atu ʻa e Tohi Tapú ʻi he fakahoa atu ki he ngaahi tohi fakalotu kehé. Hili ʻa e lāulea ki he ngaahi kikite Fakatohitapu kuo ʻosi fakahokó, naʻá ne pehē, “ʻOku ʻikai ha toe tohi ia ʻe lava ke u fakakaukau atu ʻoku tonu pehē ʻo hangē ko e Tohi Tapú!”

◼ Siapani: Neongo naʻe tala ange ʻe ha tokotaha-ʻapi ki ha tokotaha malanga ʻoku ʻikai ke tui ia ki he ʻOtuá, naʻe hokohoko atu pē ʻa e tokotaha malangá ʻene ʻaʻahi nounou ki he tokotaha-ʻapí, ʻo fakahaaʻi ki ai ha kupu ʻi he ʻĀ Haké! naʻe fakakaveinga, “Naʻe Faʻu Ia ke Pehē?” Faifai atu pē naʻe liliu e fakakaukau ʻa e tangatá pea kamata ke ne fakamoʻoniʻi ʻoku ʻi ai pē nai ha Tokotaha-Fakatupu. ʻI he taimi ní ʻokú ne tui ʻoku ʻi ai ʻa e ʻOtua, pea ʻoku ako ʻa e tokotaha malangá mo ia ʻi he polosiua Ongoongo Lelei mei he ʻOtuá!

◼ Kānata: Ko ha tuofefine naʻá ne tuku ʻa e makasini fakamuimui tahá ki ha fefine ʻa ia naʻe mavahe mei hono falé ke ʻalu ki heʻene kaá. ʻI he toe foki ange ʻa e tuofefiné, naʻe lea hangatonu ange ʻa e fefiné ʻoku ʻikai ke mahuʻingaʻia ia mo ʻikai tui ki he ʻOtuá. Naʻe fakakaukau ʻa e tuofefiné ke ʻoua ʻe foʻi kae ʻoange kiate ia ʻa e polosiua A Satisfying Life—How to Attain It. ʻI he taimi naʻe maʻu atu ai ʻe he tuofefiné ʻa e fefiné ki hono ʻapí, naʻe tala ange ʻe he tuofefiné kiate ia neongo ʻokú ne ʻilo ʻoku ʻikai tui ki he ʻOtuá, naʻá ne fakakaukau fekauʻaki mo ia he ʻokú ne ʻiloʻi ko e mātuʻa taʻehoa ia. Naʻá ne fakahaaʻi ki he fefiné ʻa e palakalafi 6 ʻi he peesi 4 ʻi he polosiuá, ʻa ia ʻoku lāulea ai ki he feituʻu ke maʻu ai ʻa e faleʻi leleí. Naʻá ne fakalototoʻaʻi leva ʻa e fefiné ke ne lau ʻa e ngaahi fokotuʻu ʻi he lēsoni 2 ʻoku fekauʻaki mo hono ʻohake ʻo e fānaú. Naʻe fiefia ʻaupito ʻa e fefiné ke ne tali ʻa e polosiuá.