Senituli Hono Tuʻuaki ʻo e Puleʻangá!
1. Ko e hā e meʻa naʻe fakalototoʻaʻi ʻa e kakai ʻa Sihová ke nau fai ʻi he meimei senituli ʻe taha kuo maliu atú?
1 “Vakai, ʻoku pule ʻa e Tuʻí! Ko kimoutolu ʻa ʻene kau fakafofonga fakahāhaá. Ko ia ai, tuʻuaki, tuʻuaki, tuʻuaki, ʻa e Tuʻí mo hono puleʻangá.” Ko e ngaahi lea fakatupu ueʻi loto naʻe fai ʻe Tokoua Rutherford ʻi he senituli nai kuohilí, naʻe fakalototoʻaʻi ai ʻa e kakai ʻa Sihová ke nau talaki ʻa e pōpoaki ʻo e Puleʻangá ʻi he feituʻu lahi mo mamaʻo. Pea ko e meʻa ia kuo tau faí! ʻI he hangē ko e muʻaki kau Kalisitiané, ʻoku tau malangaʻi ʻa e ongoongo lelei ʻo e Puleʻangá ki he “meʻa fakatupu kotoa pē ʻoku ʻi he lalo langí.” (Kol. 1:23) ʻI he vakai atu ki he senituli kuo toki ʻosí, ko e hā e meʻa kuo tau fai ke tuʻuaki ʻa e Puleʻanga ʻo e ʻOtuá? ʻE lava fēfē ke tau hokohoko atu hono tuʻuaki iá ʻi heʻetau fakaofiofi atu ki he taʻu ʻe 100 hono fanauʻi ʻo e Puleʻangá?
2. ʻOku anga-fēfē hono poupouʻi ʻe heʻetau ʻū tohí ʻa e Puleʻanga ʻo e ʻOtuá?
2 Sio ki he Kuohilí: ʻI ha ngaahi hongofuluʻi taʻu, kuo poupouʻi ai ʻe heʻetau ʻū tohí ʻa e Puleʻanga ʻo e ʻOtuá. Talu mei he 1939 ko ʻetau makasini tefitó naʻe ʻi ai hono kaveinga: Ko e Taua Leʻo ʻOku Fanongonongo Ai ʻa e Puleʻanga ʻo Sihová. Ko e makasini ko ení ʻoku faʻa lāulea ai ki he Puleʻangá pea mo e meʻa te ne fakahokó. Ko e makasini Awake! ʻoku toe fakamamafaʻi ai ʻa e Puleʻanga ʻo e ʻOtuá ko e ʻamanaki pē ia ʻe taha ki he faʻahinga ʻo e tangatá. He feʻungamālie moʻoni ē ʻi he hoko ʻa e ongo makasini ko ení ʻi he taimí ni ko e makasini ia kuo liliu mo tufaki lahi taha ʻi he māmaní!—Fkh. 14:6.
3. Ko e hā ʻa e ngaahi founga ʻe niʻihi naʻa tau ngāueʻaki ke tuʻuaki ʻaki ʻa e Puleʻangá?
3 Kuo ngāueʻaki ʻe he kakai ʻa Sihová ʻa e ngaahi founga kehekehe ke tuʻuaki ʻaki ʻa e Puleʻangá. ʻI he ngaahi ʻaho ki muʻá, naʻa tau ngāueʻaki ai ʻa e ngaahi kā fakaleʻo-lahi, fakamafola letiō, mo e ngaahi kalamafoni takitaki. Ko e ngaahi founga ko ení naʻe tokoni ia kia kitautolu ki hono fakamafola ʻa e ongoongo leleí ki ha kau fanongo tokolahi ʻi he taimi naʻe tokosiʻi ai ʻa e kau fanongonongo ʻo e Puleʻangá. (Saame 19:4) ʻI he ngaahi taʻu ki muí ni maí, ʻoku tau ʻoatu ʻa e fakamatalá ʻi he jw.org, ʻo fanongonongo ai ʻa e Puleʻangá ki he laui miliona—ʻo kau ai ʻa e faʻahinga ʻoku nau nofo ʻi he ngaahi fonua ʻoku fakataputapui ai ʻetau ngāué.
4. Ko e hā ʻa e founga makehe ʻoku tau kau ki aí?
4 Ko e kakai ʻa Sihová kuo nau toe kau atu ʻi he founga makehe ki hono fakamafola ʻa e pōpoaki ʻo e Puleʻangá. Ko e fakatātaá, ʻi he kamataʻanga ʻo e taʻu 1990 tupú, naʻa tau fai ai ha ngaahi feinga ke fakalahi ʻetau ngāue fale-ki-he-falé ʻaki ʻa e faifakamoʻoni ki he kakaí ʻi he ngaahi paʻaké, ko e ngaahi tauʻanga meʻalelé pea mo e feituʻu fakapisinisí. Ki muí ni mai, kuo tau fokotuʻutuʻu ha faifakamoʻoni makehe ʻi he feituʻu femoʻuekina ʻi he loto kolo ʻo e ngaahi kolo lalahi takatakai ʻi he māmaní. Tānaki atu ki aí, ʻoku kau atu ʻa e ngaahi fakatahaʻanga lahi ʻi he faifakamoʻoni ki he kakaí ʻi honau feituʻu fakalotofonuá ʻaki hono ngāueʻaki ʻa e ngaahi meʻa tuʻuaki-tohi fakavaʻe mo e tēpile ʻoku fokotuʻu ʻi he ngaahi feituʻu ʻoku feʻaluʻaki ai ʻa e kakaí. Ko e moʻoni, ko ʻetau ngāue fale-ki-he-falé ko e founga tefito ia ʻetau malangaʻi ʻo e Puleʻangá.—Ngā. 20:20.
5. Ko e hā ʻa e ngaahi faingamālie ʻe ʻomai ʻe he taʻu fakangāue foʻoú ki he tokolahi taha ʻo kitautolú?
5 Sio ki he Kahaʻú: ʻI he kamata ʻo e taʻu fakangāue foʻou ʻi Sepitemá, ko e tokolahi te nau kamata ngāue ko e kau tāimuʻa tuʻumaʻu. ʻE lava ke ke kau mo kinautolu? Kapau ʻe ʻikai, ʻe lava ke ke hoko ʻo tāimuʻa tokoni ʻi ha taimi hokohoko? Pe ʻokú ke lava ke tāimuʻa pe ʻikai, ʻe pau ke tāpuakiʻi koe ʻe Sihova ʻi ha faʻahinga feilaulau pē ʻokú ke foaki koeʻuhi kae malava ke ke kau kakato ai ki hono tuʻuaki ʻo e Puleʻangá.—Mal. 3:10.
6. Ko e hā ʻoku makehe ai ʻa e māhina ʻo ʻOkatopa 2014?
6 Ko e māhina ʻo ʻOkatopa 2014 ʻe fakaʻilongaʻi ai ʻa e taʻu 100 ʻo hono fanauʻi ʻo e Puleʻangá. ʻOku feʻungamālie ia mo e pulusinga maʻá e kakaí Ko e Taua Leʻo ko e māhina ia ʻoku fakahangataha ki he Puleʻanga ʻo e ʻOtuá. Ko e hā ʻoku ʻikai ke fai ai ha feinga ke tufaki ʻa e ʻīsiu ko ení ki he tokolahi taha ʻoku malavá? ʻI he hangē ko ʻetau sio atu ki he kahaʻú, ʻofa ke hokohoko atu ʻa e tokotaha taki taha ʻo kitautolu ʻi hono “talaki ʻa e ongoongo lelei ʻo e Puleʻanga ʻo e ʻOtuá” ki he faʻahinga kotoa te nau fanongó.—Ngā. 8:12.