Fakaleleiʻi ʻEtau Pōtoʻi ʻi he Ngāue Fakafaifekaú​—Tokoniʻi ʻa e Kau Ako Tohi Tapú ke Fakalakalaka pea Fakatapui mo Papitaiso

ʻUHINGA ʻOKU MAHUʻINGA AÍ: Ke maʻu ʻa e hōifua ʻa Sihová, kuo pau ki he kau ako Tohi Tapú ke fakatapui ʻenau moʻuí kiate ia mo papitaiso. (1 Pita 3:21) Ko e malu fakalaumālié ʻe toki maʻu ia ʻe he faʻahinga ʻoku moʻui ʻo fehoanaki mo ʻenau fakatapuí. (Saame 91:1, 2) ʻOku fakatapui ʻa e Kalisitiané kia Sihova—kae ʻikai ki ha tangata, ki ha ngāue pe ko ha kautaha. Ko ia ai, ʻoku fiemaʻu ke fakatupulekina ʻe he kau akó ʻa e ʻofa mo e houngaʻia ki he ʻOtuá.—Loma 14:7, 8.

FOUNGA HONO FAI IÁ:

• Lolotonga ʻa e akó, lāulea ki he meʻa ʻoku fakahaaʻi ʻe he fakamatalá ʻo fekauʻaki mo Sihová. Fakaʻaiʻai ke lau fakaʻaho ʻa e Tohi Tapú pea lotu “maʻu pē” kia Sihova.—1 Tes. 5:17; Sēm. 4:8

• Fakalototoʻaʻi ho tokotaha akó ke ʻai ʻa e fakatapui mo papitaisó ko ha taumuʻa fakalaumālie. ʻIkai ko ia pē, tokoniʻi ia ke aʻusia ha taumuʻa ʻoku faingofua hangē ko hono fai ha tali ʻi he fakatahá pe faifakamoʻoni ki he kaungāʻapi pe kaungāngāue. Manatuʻi ʻoku ʻikai fakamālohiʻi ʻe Sihova ha taha ke tauhi ange kiate ia. Ko e fakatapuí ko ha fili fakafoʻituitui ia.—Teu. 30:19, 20

• Fakaʻaiʻai ho tokotaha akó ke fai ʻa e ngaahi liliu ʻoku fiemaʻú kae lava ke fakafiefiaʻi ʻa Sihova pea hoko ʻo taau ke papitaiso. (Pal. 27:11) Koeʻuhi ko ha tōʻonga pau pe natula ʻoku hoko ia ko hano konga, ko ha tokotaha ako Tohi Tapu ʻe fiemaʻu nai ha tokoni hokohoko ke toʻo atu hono angaʻitangata motuʻá kae ʻai ha angaʻitangata foʻou. (ʻEf. 4:22-24) Vahevahe mo ia ha kupu mei he kupu hokohoko he Taua Leʻó ko e “Liliu ʻe he Tohi Tapú ʻa e Moʻuí”

• Lave ki he fiefia kuó ke maʻu ʻi he tauhi kia Sihová.—ʻAi. 48:17, 18