ʻOkú Ke Ngāueʻaongaʻaki ʻa e Kaati Fetuʻutaki JW.ORG?

ʻI he fakakaukau atu ki he fakaofi mai ʻa e mamahi lahí, ko ʻetau ngāue fakamalangá ʻoku fakavavevave. (Pal. 24:11, 12, 20) Ke tokoniʻi ʻa e kakaí, ʻoku lava ke tau ngāueʻaki ʻa e ngaahi kaati fetuʻutakí ke taki ʻenau tokangá ki he Folofola ʻa e ʻOtuá mo ʻetau uepisaití. ʻOku ʻi he kātí ha kouti ʻoku taki atu ki he vitiō Ko e Hā ke Ako Ai ʻa e Tohi Tapú? mo ha fakaafe ke kole ki ha toe fakamatala lahi ange pe ako Tohi Tapu. Ko e kakai ʻe niʻihi ʻoku ʻikai ke nau hehema ke tali ha tohi ka ʻoku nau loto-lelei ke ʻaʻahi ki heʻetau uepisaití. ʻOua ʻe toumoua ke ʻoange ha kaati fetuʻutaki. Kae kehe, ʻoua ʻe tuku ha kaati fetuʻutaki ki he faʻahinga ʻoku ʻikai ke nau fakahaaʻi ha mahuʻingaʻiá.

ʻI hoʻo ngaahi ngāue anga-maheni fakaʻahó ʻe lava ke ke langaʻi e mahuʻingaʻia ha taha ʻaki hoʻo pehē pē: “ʻOku ou loto ke ʻoatu ha meʻa kiate koe. Ko e kaati ko ení ʻe taki ai koe ki ha uepisaiti ʻoku ʻi ai ha fakamatala taʻetotongi mo ha ngaahi vitiō ʻi he kaveinga kehekehe.” (Sione 4:7) Koeʻuhi ko e iiki ʻa e ngaahi kaati fetuʻutakí, ʻe lava nai ke ke faʻo ha ngaahi kaati ke vahevahe mo ha niʻihi ʻi he faingamālie kotoa pē.