Ko ʻAfē ʻE Lava Ke U Tāimuʻa Tokoni Aí?

ʻOku hā mei he vīsone ʻa ʻIsikeli ʻo fekauʻaki mo e temipalé ko e kakai ʻa Sihová ʻoku nau fai ha ngaahi feilaulau loto-fiefoaki. ʻE lava fēfē ke tau fai fakafoʻituitui ha ngaahi feilaulau ʻo e fakafetaʻí?—Hep. 13:15, 16.

Ko e founga lelei tahá ko e kau ʻi he ngāue tāimuʻa tokoní. Ko e taʻu fakangāue 2018 ʻoku ʻi ai ʻa e ngaahi māhina ʻoku Tokonaki ʻe nima pe Sāpate ʻe nima. ʻOku tokoni eni tautefito ki he faʻahinga ʻoku nau ngāue fakamāmani taimi-kakató pea toki kau pē ki he ngāue fakafaifekaú ʻi he ngaahi fakaʻosinga ʻo e uiké. Tānaki atu ki aí, ʻe fili nai ʻa e kau malangá ke nau ngāue houa ʻe 30 pe 50 lolotonga ʻa e māhina ʻo Maʻasi mo ʻEpelelí pea mo e lolotonga ʻo e māhina ʻo e ʻaʻahi ʻa e ʻovasia sēketí.

Fēfē kapau ʻoku ʻikai malava ke tau kau ki he ngāue tāimuʻa tokoní koeʻuhi ko hotau ngaahi tuʻungá? Kuo pau ke tau feinga ke fakaleleiʻi ʻetau pōtoʻi ʻi he ngāue fakafaifekaú pea feinga foki ke fakalahi atu ia. Ko e hā pē hotau tuʻungá, ʻofa ke hanga ʻe heʻetau ʻofa kia Sihová ʻo ueʻi kitautolu ke tau foaki atu kiate ia hotau lelei tahá ʻi he lolotonga ʻo e taʻu fakangāue 2018!—Hōs. 14:2.

SIO ʻI HE VITIŌ—ʻI HE KAU MO SIHOVÁ, ʻOKU OU MALAVA ANGE AI KE FAI ʻA E MEʻA LAHI, TALI LEVA ʻA E NGAAHI FEHUʻI KO ENÍ:

• Ko e hā ʻokú ne ueʻi ʻa Sabina ke fai ʻa e meʻa lahi ange ʻi he ngāue ʻa Sihová?

• ʻOku anga-fēfē hono fakalototoʻaʻi koe ʻe he faʻifaʻitakiʻanga ʻa Sabina?

• Lolotonga ʻa e taʻu fakangāue 2018, ko e fē ʻa e (ngaahi) māhina ʻe lava ke ke tāimuʻa tokoni aí?