Ngaahi Fokotuʻu ʻAonga ki he Fakataha Malangá

Hangē ko e ngaahi fakataha kotoa ʻa e fakatahaʻangá ko e ngaahi fakataha ki he kulupu malangá ko ha tokonaki ia meia Sihova. ʻOku malava ai ke fefakaʻaiʻaiʻaki kitautolu ki he ʻofa mo e ngaahi ngāue lelei. (Hep. 10:24, 25) ʻOku totonu ke miniti ʻe nima ki he fitu ʻa e lōloa ʻo hono fokotuʻutuʻu ʻa e ngaahi kulupú, vahe ʻa e ngaahi feituʻu ngāué pea fakahoko ha lotu. (Kapau ʻoku fai ʻa e fakataha malangá ʻi he hili ha fakataha ʻa e fakatahaʻangá ʻoku totonu ke toe nounou ange.) ʻOku totonu ke teuteu ʻe he tokotaha taki kulupú ha fokotuʻu ʻe ʻaonga ki he faʻahinga ʻe kau ki he ngāue fakamalangá ʻi he ʻaho ko iá. Ko e fakatātaá, ʻi he ʻaho Tokonakí ko e tokolahi ai naʻe ʻikai te nau kau ʻi he ngāue fakamalangá talu mei he fakaʻosinga uike ki muʻá. Ko ia ʻe ʻaonga nai ke lāulea pē ki he meʻa ʻe leaʻaki ki he tokotaha-ʻapí. Ko e hā ha toe meʻa kehe ʻe ʻaonga nai ke lāulea ki ai?

• Ko ha sīpinga fetalanoaʻaki mei he Ko ʻEtau Moʻui Faka-Kalisitiané mo e Ngāue Fakafaifekaú​—Polokalama Ngāue ki he Fakatahá

• Founga hono ngāueʻaki ha meʻa ʻoku lolotonga hoko pe ha ongoongo ke kamata ha fetalanoaʻaki

• Founga ke tali ki he fakafepaki anga-mahení

• Founga ʻo e tali ki ha tokotaha fakaʻikaiʻi ʻotua, tokotaha ʻoku tui ki he ʻevalūsiō, tokotaha ʻoku lea ʻi ha lea kehe, pe ko ha tokotaha ʻoku kau ki ha siasi ʻoku ʻikai ʻilolahia ʻi hoʻo feituʻú

• Founga ke pōtoʻi ange ʻi hono ngāueʻaki ha meʻa ʻi he uepisaiti jw.org, ko e polokalama JW Library^®, pe ko e Tohi Tapú

• Founga ki hono ngāueʻaki ha taha ʻo e ngaahi meʻangāue mei he Puha Meʻangāue Fakafaiakó

• Founga ke kau ai ʻi he ngaahi tafaʻaki pau ʻo e malangá hangē ko e faifakamoʻoni ʻi he telefoní, ko e faitohi, faifakamoʻoni ʻi he feituʻu kakaí, ngaahi toe ʻaʻahi, pe ko e ako Tohi Tapú

• Fakamanatu ʻo fekauʻaki mo e tuʻunga malú, ngaofengofua, ʻulungaanga lelei, fakakaukau lelei, pe ko ha ngaahi meʻa meimei tatau

• Ko ha lēsoni pe vitiō mei he polosiua Ke Ke Kīvoi ʻi he Lautohí mo e Faiakó

• Founga ke fakalototoʻa mo tokoni ki ho hoa ngāue fakamalangá

• Ko ha konga Tohi Tapu ʻoku fekauʻaki mo e ngāue fakamalangá pe ko ha hokosia fakalototoʻa mei he malaʻe malangá