Fakamanatu ʻa e Ngaahi Poini Tefitó

Kuó ke fāinga ke manatuʻi ha meʻa naʻe toki ʻosi pē hoʻo ako? ʻOku hoko ia kiate kitautolu kotoa ʻi he taimi ki he taimi. Ko e hā ʻe lava ke tokoní? Ko hono fakamanatu ʻa e ngaahi poini tefitó.

Lolotonga hoʻo akó, kiʻi tuʻu ke tokanga fakamātoato ki he ngaahi fakakaukau mahuʻinga tahá. Fakatokangaʻi ʻa e anga hono tokoniʻi ʻe Paula ʻa e faʻahinga naʻa nau ako ʻene tohí ke nau fai ení ʻi heʻene tohi: “Ko ia ko e poini tefito eni.” (Hep. 8:1) Ko e ngaahi lea ko iá naʻá ne tokoniʻi ʻene kau fanongó ke nau muimuiʻi ʻene ʻuhingá pea ʻiloʻi ʻa e anga ʻo e fekauʻaki ʻa e poini taki taha mo ʻene kaveinga tefitó.

Te ke tuku nai ha kiʻi taimi, mahalo ko ha miniti ʻe hongofulu ʻi he ʻosi hoʻo akó, ke fakalaulauloto ki he ngaahi poini tefito ʻo e meʻa kuó ke akó. Kapau ʻoku ʻikai lava ke ke manatuʻi, toe vakaiʻi ʻa e ngaahi kaveinga tokoní pe ko e sētesi ʻuluaki ʻi he palakalafí ke langaʻi hoʻo manatú. Kapau naʻá ke ako ha meʻa foʻou, feinga ke fakamatalaʻi ia ʻi hoʻo lea pē ʻaʻau. ʻI hoʻo fakamanatu ʻa e ngaahi poini tefitó, ʻe ʻikai ngata pē ʻi heʻene tokoni ki hoʻo manatú ka te ke toe sio māʻalaʻala ange ki he anga ʻo e felāveʻi ʻa e fakamatalá mo hoʻo moʻuí tonu.