AKO 14

ʻAi ke Eʻa ʻa e Ngaahi Poini Tefitó

Hepelū 8:1

MEʻA KE FAÍ: Tokoni ki hoʻo kau fanongó ke nau muimui ʻi hoʻo fakahoko ʻa e malangá, pea ʻai ke māʻalaʻala ʻa e kaunga ʻa e poini tefito taki taha ki hoʻo taumuʻá mo e kaveingá.

FOUNGA KE FAI AI IÁ:

Fokotuʻu ha taumuʻa. Fakakaukau pe ʻoku fakataumuʻa hoʻo malangá ke fakahinohino, fakatuipau pe ueʻi ʻa hoʻo kau fanongó, pea fakatupulekina leva hoʻo malangá ke fehoanaki mo ia. Fakapapauʻi ko e kotoa ʻo e ngaahi poini tefitó ʻe tokoniʻi ai koe ke ke aʻusia ʻa hoʻo taumuʻá.

ʻEke hifo: ‘Ko e hā ʻa e ngaahi fehuʻi pe fakafepaki nai mei heʻeku kau fanongó ʻo fekauʻaki mo e kaveinga ko ení? Ko e hā ʻa e hokohoko te nau ʻohake ai ʻa e ngaahi fehuʻi pe fakafepaki ko iá?’ Fokotuʻutuʻu leva hoʻo ngaahi poiní ʻi he hokohoko tatau kae lava ʻa hoʻo kau fanongó ke nau muimui fakataha, mahinoʻi, mo tali ʻa e fakamatalá.
Fakamamafaʻi ʻa e kaveinga hoʻo malangá. Lave ki he kaveingá ʻi he kotoa hoʻo malangá ʻaki ʻa e toutou leaʻaki ʻa e ngaahi foʻi lea tefito ʻo e kaveingá pe ko hono ngāueʻaki ha ngaahi lea ʻuhinga tatau.
ʻAi hoʻo ngaahi poini tefitó ke māʻalaʻala mo faingofua. Fili pē ʻa e ngaahi poini tefito ʻe kaunga ki hoʻo kaveingá pea lava ke ke faiako ola lelei ʻo fakatatau ki he taimí. Fakangatangata ʻa e lahi ʻo e poini tefitó, ʻai ke māʻalaʻala ʻa e poini tefito taki taha, kiʻi mālōlō ʻi he poini taki taha, pea ʻai ke hoko lelei mei he poini tefito ʻe taha ki he poini hokó.

Te ke lava nai ʻo ʻoatu ʻa e ngaahi poini tefitó ʻi hoʻo talateú ke tokoni ki hoʻo kau fanongó ke nau muimui ʻi hoʻo malangá pe toe leaʻaki kinautolu ʻi hoʻo fakamulitukú ke tokoni ki hono manatuʻi ʻe hoʻo kau fanongó.