Ko e Hā ʻOku ʻAʻahi Ai ʻa e Kau Fakamoʻoni ʻa Sihová ki he Kakai Kuo Nau ʻOsi Lotú?

Kuo mau ʻilo ʻoku saiʻia ʻa e kakai tokolahi kuo nau ʻosi lotú he lāulea ki he ngaahi kaveinga Fakatohitapú. Ko e moʻoni, ʻoku mau tokaʻi ha kehe ʻa e tui ha tokotaha meia kimautolu, pea ʻikai ke mau kounaʻi ʻemau pōpoakí ki he niʻihi kehé.

ʻI he talanoa fekauʻaki mo e lotú, ʻoku mau feinga ke ngāueʻaki ʻa e faleʻi ʻa e Tohi Tapú ke fai ia ʻi ha “loto anga-malū” pea fakahāhā ʻa e “fakaʻapaʻapa loloto” ki he kakaí. (1 Pita 3:15) ʻOku mau ʻamanekina heʻikai tali ʻe he niʻihi ʻa e pōpoaki ʻoku mau ʻoatú. (Mātiu 10:14) Kae kehe, heʻikai ke mau ʻilo ʻa e tali ʻa e kakaí kae ʻoua ke mau talanoa kia kinautolu. ʻOku mau toe ʻilo ʻoku feliuliuaki ʻa e tuʻunga ʻo e kakaí.

Ko e fakatātaá, ʻe fuʻu femoʻuekina nai ha taha ke talanoa ʻi ha ʻaho ka te ne talanoa fiefia mo kimautolu ʻi ha taimi kehe. Pea ʻe fehangahangai nai ʻa e kakaí mo e ngaahi palopalema pe tuʻunga foʻou kuo pau ke nau fekuki mo ia, ʻo ueʻi ai ke nau mahuʻingaʻia ʻi he pōpoaki ʻo e Tohi Tapú. Ko ia ʻoku mau feinga ke toutou talanoa mo e kakaí.