Muimui Hotau Faʻifaʻitakiʻangá ko e Kau Tapua Atu ʻo e Maamá
1 Naʻe fakahā ʻe Sīsū ʻo kau kiate ia pē: “Ko au pe ko e Maama ʻo Māmani.” ʻI he muimui ki heʻene faʻifaʻitakiʻangá, ko e kau ākonga foki ʻa Sīsuú “ko e māma ʻo mamani.” (Mt. 5:14) Pea koeʻuhi “ko e Maama ʻo Māmani” ia, ʻoku lava ʻe Sīsū ke pehē ki hono kau muimui kotoa te nau maʻu ʻa e “maama ʻo e moʻui.” (Sione 8:12) ʻOku tau hoko ai ko e kau tapua atu ʻo e maama fakalaumālie, ʻa ia ʻe ʻikai ʻaupito te tau fakaʻatā ha meʻa ke ne fakapuliki pe fakapōpōʻuliʻi ʻa e maama ko iá.
2 ʻOku tokonaki mai ʻe he kautaha ʻa Sihová ʻa hono akoʻi mo fakahā kiate kitautolu ʻa e founga ke tau tapua atu ʻo ola lelei ai ʻa e maamá. Kapau te tau muimui ofi ʻaupito ʻi he enginaki mo e fakahinohino ʻoku tau maʻú, te tau malava ke fakamaama ʻa e faʻahinga kakai kotoa pē ʻo fekauʻaki mo e moʻoni ʻo e Puleʻangá. (1 Tīm. 4:6) Ko e ngāue ʻa e kau tapua atu ʻo e maamá ʻoku ʻikai ko e talanoa pē ki he moʻoní ʻi he faingamālie kotoa pē ka ʻoku kau ki ai mo e tauhi maʻu ʻa e ʻulungāanga leleí ʻa ia ʻoku tuha mo e kau Kalisitiané. Ko e ʻulungāanga ʻo hotau Faʻifaʻitakiʻangá naʻe haohaoa. Pea koeʻuhi ko kitautolu ko hono kau muimuí, kuo pau ke tau fakahāhā ʻa e lotu faka-Kalisitiane ko iá ʻi heʻetau founga moʻui ʻi he ʻaho kotoa pē. (ʻEf. 5:9; Tai. 2:7, 8, 10) ʻOku pau ke tau fai ha ngaahi ngāue lelei ʻe lava ke mamata ki ai ʻa e niʻihi kehé, ʻo ueʻi ai ke nau fakalāngilangiʻi ʻa e ʻOtuá.—Mt. 5:16.
3 Naʻe fetaulaki ha Fakamoʻoni ʻe taha mo ha kole ngalikehe ʻi he ʻalu mei he fale ki he falé. Naʻe puke lahi ʻa e husepāniti mo e uaifi ʻi hona ʻapí, ka naʻá na fiemaʻu ke fakahū ha paʻanga ki he pangikeé. Naʻá na kole ki he Fakamoʻoni ke ne fai ʻa e meʻá ni. Naʻá ne loto ki ai pea naʻe ʻoange ki ai ʻa e US$2,000 ke ne ʻave ki he pangikeé! Naʻá ne ʻeke ange ʻi heʻene foki mai: “ʻOku anga-fēfē ʻa hoʻomo falala kiate aú taumaiā ʻokú mo ʻiloʻi au?” Ko e talí: “ʻOkú ma ʻiloʻi, pea ʻoku ʻiloʻi ia ʻe he tokotaha kotoa pē, ko e Kau Fakamoʻoni ʻa Sihová pē ʻa e faʻahinga ke falala ki aí.” Ko ha houngaʻia lahi ē ka ko kitautolu ʻi heʻetau pipiki ofi ki he ngaahi tefitoʻi moʻoni fakaeʻulungāanga ʻi he Tohitapú ʻoku hoko ai ha ongoongolelei ko e fakalāngilangiʻi ʻo e ʻOtuá!
4 Ko ha faiako ʻi he kalasi ʻuluakí naʻá ne fakamatala ki heʻene kalasí ʻa e ʻuhinga naʻe ʻikai ke kau ai ha tokotaha ako taʻu ono ko ha Fakamoʻoni ʻi he tā-fakatātā ʻo e Halloween. Naʻe pehē ʻe he faiakó naʻá ne laukauʻaki ʻaupito ʻa e maʻu ʻe he taʻahine ko ʻení ʻa e lototoʻa ke makehé koeʻuhi ko e meʻa ʻokú ne tui ki ai. Naʻe pehē ʻe he faiakó, kapau ʻoku tau tui pau ki ha meʻa, ʻoku totonu ke tau maʻu ha lototoʻa ke maluʻi ia mei hano fakaangaʻi. ʻI he pō ko iá naʻe sivisiviʻi ʻe he faiako ʻa ʻene ngaahi tuí pea naʻá ne fakahā ko e moʻoni naʻe ʻikai te ne fakahā ʻa e lototoʻa tatau ke ne maluʻi ʻa e meʻa naʻá ne tui ki ai. ʻI he ʻaho hono hokó naʻá ne fakahā ʻe ʻikai te ne toe fakakau ʻa ʻene kalasi ʻi ha ngaahi kātoanga ʻaho mālōlō ʻi he kahaʻú, ʻa ia ko e meʻa ʻe niʻihi ʻoku ʻikai te ne tui ia ki aí!
5 ʻOku vēkeveke ʻa e kakai ʻa Sihova ke tapua atu ʻa ʻenau maamá, tatau ai pē pe ʻoku nau ʻi fē. Ko e ʻulungāanga alafaʻifaʻitakiʻanga ʻa e fānau ʻi he akó kuo maongo ia ki he kaungāakó mo e kau faiakó. Ko e kau Fakamoʻoni lalahí ʻoku nau fakahāhā ʻa e ʻulungāanga lelei ʻi he kaungāʻapí ʻoku hoko ai ʻa e lea lelei ʻa e niʻihi ki he pōpoaki ʻo e Puleʻangá. Ko e fakamoʻoni ʻo ʻikai ʻi he founga anga-maheni ʻi he ngaahi tuʻunga kehekehé ʻokú ne tohoaki ai ʻa e tokanga ʻa e kakai loto-moʻoni ʻoku nau fie ako lahi angé. Naʻa mo ʻetau ngāue mālohi mo faitotonu ʻi he ngāueʻangá ʻoku hoko ia ko ha fakamoʻoni. ʻIo, tatau ai pē pe ʻoku tau ʻi fē pe ko e hā ʻoku tau faí, ʻoku lava ke tau langaʻi ʻa e mahuʻingaʻia ʻi he moʻoní.
6 ʻI heʻetau hanganaki sio maʻu pē ki he sīpinga moʻui taʻemele ʻa hotau Faʻifaʻitakiʻanga lahí, ʻoku lava ke tau hokohoko atu ai pē ke haohaoa ʻa ʻetau pōtoʻi ko ʻene kau ākongá. ʻE fakapapauʻi ko ʻetau maamá “ʻoku ūlo atu ia ki he kakai kotoa pe” ʻi heʻetau faʻifaʻitaki ki heʻene faʻifaʻitakiʻangá.—Mt. 5:15; 1 Pita 2:21.