Ko Kalaisi ko ha Faʻifaʻitakiʻanga ki he Toʻutupú
1 Hili ha fepōtalanoaʻaki lōloa ʻi he Tohitapú, naʻe pehē ʻe ha talavou: “Naʻe maongo kiate au ʻa e angaʻitangata mālohi ʻo Sīsū Kalaisí. Ko ha taki ʻeni ʻe malava ke u falala ki ai.” ʻE ʻikai malava ke leaʻaki ʻa e meʻa tatau ki ha taha fakapolitikale pē, pe ʻi he ngaahi sipotí pea mo e kau helo ʻi he fakafiefiá. Ko e kau Kalisitiane moʻoní ʻoku ʻikai te nau sio kiate kinautolu ʻoku nau fai fakahāhaaʻi ʻa e ngaahi tuʻunga fakamāmaní mo e founga moʻui taʻefakakalisitiané ko ha kau faʻifaʻitakiʻanga.—Sāme 146:3, 4.
2 ʻE malava ke fakapapauʻi ki he kau talavoú ko ʻenau haʻu pē ʻo ngāueʻi ʻenau tui ʻia Sīsū Kalaisí, ʻoku nau foaki atu ai kinautolu ko e fanga sipi ʻa e ʻOtuá pea ʻiloʻi kinautolu ʻe Sīsū. ʻOku tokangaʻi leva kinautolu ʻe he Tauhi-Sipi Leleí. (Sione 10:14, 15, 27) ʻOku fai tāpuekina ʻa e toʻutupu ʻoku nau muimui ʻia Kalaisi ko honau Faʻifaʻitakiʻangá.
3 Ko ha tokoua ʻoku lolotonga ngāue ʻi he Pētelí ʻi Brooklyn naʻá ne maʻu ʻa e monū ʻo e ngāué ni ko ha kolo ia mei he taimi naʻá ne taʻu valu aí. Naʻe fakalototoʻaʻi ia ke sio ki he ngāue Pētelí ko ha founga ʻoku ʻaonga ke muimui ai ʻi he faʻifaʻitakiʻanga ʻa Sīsuú ʻi haʻane motuʻa ange. Ko ʻene ongo mātuʻá pea pehē foki ki he kau ʻovasia fefonongaʻakí naʻa nau fokotuʻu ʻa e koló ni kiate ia. Ke tokoniʻi ia ke mateuteu, naʻa nau fakalototoʻaʻi ia ke ne ngāue tōtōivi ʻiate ia pē ʻo hangē tofu pē ha mēmipa ʻo e fāmili Pētelí, ʻi hono fai ʻa e ngāue ʻi ʻapí, tokoni ki hono tauhi ʻo e Kingdom Hall, pea mo fakatupulekina ʻa e pōtoʻi ʻi he ngāue fakafaifekaú. Hili ha ngaahi taʻu ʻene fiefia ʻi he ngāue Pētelí ʻo aʻu mai ki he lolotongá ni, ʻokú ne fakamālōʻia koeʻuhi ʻi heʻene kei tupu haké naʻá ne fai feinga ke fakatatau ki he faʻifaʻitakiʻanga ʻa Kalaisí.
4 Naʻe ʻikai ke kumi ʻe Sīsū ha ngāue fakamāmani; naʻá ne fili ʻa e ngāue fakafaifekaú. Ko ha tuofefine kei siʻi naʻá ne fiemaʻu ke tāimuʻa ʻi ha ʻosi ʻene akó ka naʻe toumoua koeʻuhi ko e ʻikai ke ne maʻu ha ngāue konga taimi feʻungamālie. Naʻá ne hanganaki fakakaukau: ‘ʻUluakí te u kumi ha ngāue, te u toki fakahū leva ʻeku tohi kole tāimuʻá.’ Naʻe talaange ʻe ha mātuʻa ko e lōloa ange ʻene tatalí ko ʻene hā lelei ange ia ʻa e ngāue taimi-kakato fakamāmaní, koeʻuhi ʻoku ʻikai haʻane meʻa ke taʻofi ia mei hano tali. Naʻá ne fakahā: “Naʻá ku lotu kia Sihova ki hono laumālié ke ne tataki au.” Naʻe ʻikai leva toe tatali ʻa ʻene hū ʻo hoko ko ha tāimuʻa tokoni pea ki mui maí naʻá ne hoko ko ha tāimuʻa tuʻumaʻu. Taimi nounou pē mei ai, naʻá ne maʻu ʻa e ngāue lelei naʻe feʻungamālie mo ʻene taimi-tēpile tāimuʻá.
5 Naʻe fakahaaʻi lototoʻa ʻe Sīsū ʻa e pōpoaki ʻo e Puleʻangá ki he tokotaha kotoa pē. (Mt. 4:23) ʻE malava ke ako ʻa e kau talavou Kalisitiané ke hoko ʻo lototoʻa ʻi he malangá, ʻo ʻikai fakamanavaheeʻi ʻe he niʻihi kehé. Ko ha Fakamoʻoni taʻu 14 naʻá ne pehē: “Ko e tokotaha kotoa pē ʻi he ʻapiakó ʻokú ne ʻiloʻi hoku tuʻunga ko e Kalisitiané. . . . ʻOku nau ʻiloʻi lelei ia, ko ia ai kapau te u fetaulaki mo haku kaungāako lolotonga ʻeku kau ki he ngāue fakafaifekaú, ʻoku ʻikai ke u ongoʻi mā. ʻOku faʻa fanongo ʻa hoku kaungāakó, pea taimi lahi ʻoku nau tali ʻa e tohí.”
6 Ko e fakakaukau ki he faʻifaʻitakiʻanga ʻa Sīsuú ʻe malava ke tokoni ia ki he kau talavoú ke nau fai ha ngaahi fili fakapotopoto fekauʻaki mo honau kahaʻú. ʻI he ʻikai fakafonuʻaki e fakakaukaú e ngaahi ngāue fakamāmaní, ʻoku nau ‘manatu eni ki honau Tupuaga’ ʻaki hono fakahā ʻa e faivelenga ʻi he ngāue ʻa Sihová. (Koh. 12:1, PM) ʻI he hangē ko Kalaisi Sīsuú, ʻoku nau fakatupu ʻa e “ʻofa ki he Tamai,” ʻa ia ʻokú ne ʻomai ʻa e ngaahi tāpuaki ʻoku hulu ʻānoa ange ʻa e fakaʻamu ki aí ʻi ha toe meʻa pē ʻoku tuʻuaki mai ʻe he māmaní. ʻI he ʻikai “fakaʻaʻau ke mole” mo e māmani motuʻá, ʻe malava ke nau hanga atu ke ‘nofo maʻu ʻo taʻengata.’—1 Sione 2:15-17.