ʻOku ʻi he Tuʻunga Fakatuʻutāmaki ʻa e Moʻuí!

¹ ʻOku fakamāʻalaʻala mai ʻe he Tohitapú ko e finangalo ʻo Sihová “ke maʻu moʻui ʻe he kakai kotoa pe.” Kae kehe, ʻoku toe moʻoni ko e ngaahi ʻamanaki moʻui ʻa e laui piliona ʻi he foʻi māmaní ʻoku fakatuʻunga ia ʻi heʻenau fakakaukau atu kia Sihova ko e ʻOtuá pea mo hono Puleʻangá ʻia Sīsū Kalaisi. Ko ha fakakaukau totonu ʻe lava ke fakatuʻunga pē ia ʻi he “ʻilo kanokano ki he moʻoni.” (1 Tim. 2:​3, 4) Lolotonga ʻa hono iloʻi ʻe vavé ni ke fakamaʻa ʻa e kotoa ʻo e fulikivanú mei he foʻi māmaní koeʻuhí ke fakaʻataʻatā ki he māmani foʻou māʻoniʻoni ʻa e ʻOtuá, kuo toe fekauʻi foki kitautolu ke tau fakahoko ha ngāue fakaefakahaofi moʻui mātuʻaki mahuʻinga.​—Mt. 24:14; 28:​19, 20; Loma 10:​13-15.

² Ko e Hā ʻOku Fuʻu Fakavavevave Aí? Naʻe fai ʻe Sīsū ha fakatokanga fekauʻaki mo ha “mamahi lahi, ʻa ia kuo teʻeki hano tatau mei he kamataʻanga ʻo mamani.” (Mt. 24:21) ʻE aʻu ʻa e mamahi lahi ko iá ki hono tumutumú ʻi ʻĀmaketone. (Fkh. 16:16) Ko e fuʻu kakai tokolahi te nau fehangahangai mo e fakaʻauhamālié kapau heʻikai te nau tali ʻa e ongoongo leleí ʻoku kau ai hotau ngaahi kāinga taʻetuí, ngaahi kaungāʻapí, kaungāngāué, kaungāakó, mo e ngaahi mahení. Ka ko ʻetau tokangá ke aʻu ki he “kakai kotoa pe” ʻi he faʻifaʻitaki ki he ʻOtuá, ʻa ia naʻá ne fakahāhā ʻene ʻofa ki he māmani kotoa ʻo e faʻahinga ʻo e tangatá ʻaki ʻene foaki hono ʻAló, ʻa Sīsū Kalaisi, ko ha huhuʻi maʻá e tokotaha kotoa pē. (Sione 3:16) Kuo pau ke tau feinga tōtōivi ke fakaafeʻi ʻa e tokotaha kotoa pē ke hola ki he feituʻu malu ʻa e ʻOtuá. ʻI hono fakahoko kakato ʻa e ngāue fakamalangá, ʻoku lava ai ke tau fakaʻehiʻehi mei he halaia ʻi he totó.​—Isi. 33:​1-7; 1 Kol. 9:16.

³ Ko e Hā ʻEtau Taumuʻá? Ko e mahuʻinga ʻo e ngāue fakamalangá ʻoku fakamamafaʻi mai ia ʻi he kotoa ʻo e Folofola ʻa e ʻOtuá. Hangē ko ia ʻoku fakahā mai ʻe he ʻapositolo ko Paulá, “ʻoku loki kitautolu ʻe he ʻofa ʻa Kalaisi” ke moʻui ʻo fehoanaki mo e ngaahi founga ʻa e ʻOtuá. (2 Kol. 5:14) Tānaki atu ki ai, ʻoku faʻa fakamamafaʻi ʻe he Taua Leʻo ʻa hotau fatongia ke malangá. ʻOku tokonaki hokohoko mai ʻe he ʻEtau Ngāue Fakafaifekau ʻo e Puleʻanga ʻa e fakahinohino ki he founga ke fakahoko ai ʻa e ngāue fakamalangá. ʻOku fokotuʻutuʻu ʻe he kau mātuʻá ʻa e ngāué pea fakalototoʻaʻi kitautolu ke kau ki ai. ʻOku fakaafeʻi kitautolu ʻe he kaungā malangá ke kau fakataha mo kinautolu ʻi he ngāue fakafaifekaú. ʻOku tau fanongo lahi ʻo fekauʻaki mo hono teuteuʻi ʻo ʻetau ngaahi lea kamatá, tuʻuaki ʻo e ngaahi makasiní pea mo e ngaahi tohi kehé, ko hono fai ʻa e ngaahi toe ʻaʻahí, fai ʻo e ngaahi ako Tohitapú, pea mo hono ngāueʻaki ʻa e faingamālie kotoa pē ke fai ai ha fakamoʻoní. Ko e kotoa ʻo e meʻá ni ʻokú ne tokoniʻi kitautolu ʻi hono fakahoko ʻa e taumuʻa ko hono fakahaofi ʻo e ngaahi moʻuí.​—1 Kol. 9:​22, 23; Ef. 1:13.