Kīvoi ʻi he Malangá
1 ʻOku ʻi heni ʻa e ngaahi taimi faingataʻa. ʻOku hokolahia ʻa e fekeʻikeʻi fakalotofonuá, ngaahi tau fakamatakalí, ngaahi fakatamaki fakanatulá mo e ngaahi meʻa fakalilifu kehe. ʻOku fiemaʻu ʻe he fāmili ʻo e tangatá he taimí ni ha ongoongo lelei ʻo laka hake ia ʻi ha toe taimi. Ka neongo ia, ko e taʻemahuʻingaʻia ʻi he ngaahi meʻa fakalaumālié ʻoku mafolalahia ia. ʻI he ngaahi feituʻu ʻe niʻihi, ʻe faingataʻa nai ke maʻu ʻa e kakaí ʻi ʻapi pea ʻoku toe faingataʻa ange ke maʻu ʻa e kakai te nau fanongo maí pe te nau fiemaʻu ke ako ʻa e Tohi Tapú. Ka naʻa mo ia, ʻoku mahuʻinga ke tau kīvoi ʻi hono malangaʻi ʻa e ongoongo lelei ʻo e Puleʻanga ʻo e ʻOtuá kuo fokotuʻú.—Mt. 24:14.
2 ʻOfa ki he Kakaí: Ko ʻetau malangá ʻokú ne tohoakiʻi ai ʻa e tokangá ki he ʻofa ʻa Sihova ki he kakaí. “[ʻOku] ʻikai te ne finangalo ke ʻauha ha taha, ka ke aʻusia ʻa e fakatomala ʻe he kakai kotoa pe.” (2 Pita 3:9; Isi. 33:11) Ko ia ai, kuó ne tuʻutuʻuni, hangē ko ia naʻe leaʻaki ʻe Sīsuú, “ke tomuʻa fanongonongo ʻa e ongoongolelei ki he ngaahi kakai kotoa pē.” (Fakaʻītali ʻamautolu; Mk. 13:10) ʻOku kōlenga ʻa e ʻOtuá ki he kakaí ke nau tafoki kiate ia pea kalofi ʻa e fakamaau ʻoku tuʻunuku mai ki he māmani ʻo Sētané. (Sioeli 2:28, 29, 32; Sef. 2:2, 3) ʻIkai ʻoku tau fakamālōʻia ʻi hono fakaaʻu mai ʻe Sihova ʻa e faingamālie ko iá kia kitautolú?—1 Tim. 1:12, 13.
3 ʻOku fakahaaʻi ʻe he līpooti ʻi māmaní kotoa ʻi he lolotonga ʻa e taʻu fakangāue 2004, ko ha fakaʻavalisi ʻo e ngaahi ako Tohi Tapu ʻe 6,085,387 naʻe fakahoko ʻi he māhina taki taha, pea mo ha fakaʻavalisi ʻo e kau ākonga foʻou ʻe toko 5,000 nai naʻe papitaiso ʻi he uike taki taha! Ko e niʻihi ʻo e kau fakatapui foʻou ko eni naʻe maʻú ko ha ola ia ʻo e tāpuaki ʻa Sihova ki he ngaahi feinga kīkīvoi ʻa e kau malangá ʻa ia naʻa nau fai ha feinga ke lea ki he tokotaha kotoa ʻi honau ngaahi feituʻu ngāue ne vaheʻi angé. He fiefia moʻoni ia kuo hoko ʻi he ngaahi fakatahaʻangá, pea ko ha monū moʻoni ia ke hoko ko ha kaungāngāue ʻo e ʻOtuá ʻi he ngāue fakahaofi-moʻui ko ení!—1 Kol. 3:5, 6, 9.
4 Fakahīkihikiʻi ʻa e Huafa ʻo e ʻOtuá: ʻOku tau kīvoi ʻi he malangá koeʻuhi ke fakahīkihiki fakahāhaaʻi ai ʻa Sihova pea ke fakatāpuhaaʻi hono huafá ʻi he kotoa ʻo e faʻahinga ʻo e tangatá. (Hep. 13:15) Kuo takihalaʻi ʻe Sētane “ʻa mamani kātoa” ke nau tui ko e ʻOtuá ʻoku ʻikai hano mālohi ke solova ʻa e ngaahi palopalema ʻa e faʻahinga ʻo e tangatá, ʻa ia ʻoku ʻikai te ne tokanga ki he faingataʻaʻia ʻa e tangatá pe ʻoku ʻikai pē ke ʻi ai ia. (Fkh. 12:9) Fakafou ʻi heʻetau malangá, ʻoku tau taukapoʻi ai ʻa e moʻoni fekauʻaki mo ʻetau Tamai fakahēvani fakangeingeiá. ʻOfa ke tau hokohoko atu ʻi hono fakahīkihikiʻi ʻa hono huafá—ʻi he taimí ni pea taʻengata.—Sāme 145:1, 2.