Aʻu ki he Kakai Tokolahi Taha ʻe Ala Lavá
1. Ko e hā ʻa e meʻa naʻe fai ʻe he muʻaki kau Kalisitiané ke aʻu ai ki he kakai tokolahi taha ʻe ala lavá mo e ongoongo leleí?
1 Ko e muʻaki kau muimui ʻo Sīsuú naʻa nau feinga fakamātoato ke fakamafola atu ʻa e pōpoaki ʻo e Puleʻangá. Naʻa nau ngāueʻaki ʻa e ngaahi founga ola lelei ke ʻai ai ʻa e ongoongo leleí ke ala maʻu ʻe he kakai tokolahi taha ʻe ala lavá. Ko e kau tohi Tohi Tapu Kalisitiané naʻa nau hiki ʻenau ngaahi tohi fakamānavaʻí ʻi he lea faka-Kalisi anga-mahení, ʻa ia ko e lea fakavahaʻapuleʻanga ia ʻa e ʻEmipaea Lomá. ʻIkai ngata aí, ko e kau malanga faivelenga ʻo e senituli hono ua mo hono tolu T.S. ʻo faai mai aí, naʻa nau takimuʻa nai ʻi hono ngāueʻaki ʻo e codex, ʻa ia naʻe faingofua ange ke ngāueʻaki ʻi ha takainga tohi ʻi he fekumi ki ha ngaahi maʻuʻanga fakamatala.
2, 3. (a) Kuo anga-fēfē hono fakahoko ʻo e Aisea 60:16 ʻi he ngaahi taimi ʻo onopōní? (e) Kuo anga-fēfē hono ngāueʻaki ʻa e tekinolosiá ke laka ki muʻa ai ʻa e lotu moʻoní?
2 Ngāueʻaki ʻa e Tekinolosiá: Fakafou ʻi he palōfita ko ʻAiseá, naʻe tomuʻa tala ai ʻe Sihova: “Te ke komo ʻa e huʻakau ʻani puleʻanga.” (Ai. 60:16) ʻI hono fakahoko ʻi onopooni ʻa e kikite ko ení, ʻoku ngāueʻaongaʻaki ai ʻe he kau sevāniti ʻa Sihová ʻa e ngaahi koloa mahuʻinga mei he ngaahi puleʻangá ke laka ai ki muʻa ʻa e ngāue fakamalangá. Ko e fakatātaá, ʻi he 1914, ko e ngaahi taʻu ki muʻa ke lavameʻa fakakomēsiale ai ʻa e ngaahi heleʻuhila leá, naʻe kamata ai ʻe he Kau Ako Tohi Tapú ke nau hulu ʻa e “Tulama-ʻAta ʻo e Fakatupú.” Ko e heleʻuhila mo e fakaʻaliʻali silaiti ko ení naʻe houa ʻe valu hono lōloá, naʻe kakato ʻi he fakalanú mo e ongó, naʻe fai ai ha fakamoʻoni mālohi ki he laui miliona.
3 ʻI he ʻahó ni, ʻoku ngāueʻaongaʻaki ai ʻe he kakai ʻa e ʻOtuá ʻa e ngaahi mīsini pulusi vave ʻaupito mo e ngaahi meʻangāue fakakomipiutá ke pulusi ai ʻa e ngaahi Tohi Tapu mo e tohi Fakatohitapu ʻi he ngaahi lea ʻe laui teau. Ko e ngaahi founga vave ʻo e fefonongaʻakí ʻoku feʻaveʻaki ai ʻa e tohi Fakatohitapú ki he ngaahi feituʻu mamaʻo ʻo e māmaní, ʻo aʻu ai ki he kakai ʻi he ngaahi fonua ʻe 235. Fakafou ʻi hono laumālié, kuo ueʻi ai ʻe Sihova ʻa ʻene kau sevānití ke ngāueolaleleiʻaki ʻa e tekinolosia peheé, ʻo ʻai ai ʻa e moʻoni ʻo e Tohi Tapú ke ala maʻu ʻe he kakai tokolahi ange ʻi ha toe taimi ki muʻa he hisitōliá.
4. Ko e hā ʻa e ngaahi feʻunuʻaki kuo fai ʻe he niʻihi ʻi heʻenau moʻuí ke aʻu ai ki he kakai tokolahi ange mo e ongoongo leleí?
4 Ngaahi Feʻunuʻaki Fakafoʻituitui: Ko e kau lotu moʻoní kuo toe ueʻi mo kinautolu ke nau fai ha ngaahi feʻunuʻaki fakafoʻituitui koeʻuhi ke aʻu ai ki he kakai tokolahi ange mo e ongoongo leleí. Ko e tokolahi kuo nau fakafaingofuaʻi ʻenau moʻuí koeʻuhi ke nau kau kakato ange ai ʻi he ngāue fakamalangá. Kuo hiki ʻa e niʻihi ke nau ngāue ʻi he feituʻu ʻoku lahi ange ai ʻa e fiemaʻú ki ha kau talaki ʻo e Puleʻangá. Ko e niʻihi kehé kuo nau fakalahi ʻenau ngāue fakafaifekaú ʻaki ʻenau ako ha lea muli.
5, 6. Ko e hā ʻe lava ke fai ke aʻu ai ki he kakai tokolahi taha ʻe ala lavá ʻi he feituʻu fakalotofonuá?
5 Tānaki atu ki aí, ʻe lava ke tau aʻu ki he kakai tokolahi ange mo e ongoongo leleí ʻaki ʻa e malanga ʻi he taimi ʻoku ʻi ʻapi ai ʻa e kakaí mo e feituʻu ʻe lava ke maʻu ai ʻa e kakaí. Kapau ʻoku ʻikai ke faʻa ʻi ʻapi ʻa e kakai ʻi ho feituʻú lolotonga ʻa e ʻahó, ʻe lava ke ke feʻunuʻaki hoʻo taimi-tēpilé ke faifakamoʻoni ai lolotonga ʻa e ngaahi houa ki muʻa ʻo e efiafí? ʻOku ʻi ai ha ngaahi feituʻu kakai ʻe lava ke fai ai ha fakamoʻoni? Kuó ke ʻahiʻahiʻi ʻa e faifakamoʻoni telefoní mo e ngāue he feituʻu fakapisinisí? ʻOkú ke kumi ki ha ngaahi faingamālie ke faifakamoʻoni ai ʻi he founga ʻikai anga-mahení?
6 He monūʻia moʻoni ē ka ko kitautolu ke kau atu ʻi he fakamoʻoni maʻongoʻonga ʻoku fai fekauʻaki mo e huafa ʻo Sihová mo hono Puleʻangá! ʻOfa ke tau hokohoko atu ke vahevahe ʻa e moʻoni foaki-moʻui mei he Folofola ʻa e ʻOtuá ki he kakai tokolahi taha ʻe ala lavá.—Mt. 28:19, 20.