Ngāueleleiʻaki Ho Taimi ʻi he Ngāue Fakafaifekaú
1 ʻOku lahi ʻaupito ʻa e meʻa ke fakahoko ʻi heʻetau ngāue fakafaifekaú, pea ʻoku siʻi ʻa e taimi ʻoku toé. (Sione 4:35; 1 Kol. 7:29) ʻI he teuteu lelei pea palani ki muʻá, ʻoku lava ai ke tau ngāueleleiʻaki ʻa e taimi ʻoku tau vaheʻi ki he ngāue fakafaifekaú.
2 Mateuteu: Ki muʻa ke ke ʻalu ki he fakataha malangá, fakapapauʻi ʻokú ke maʻu ʻa e ngaahi tohi te ke fiemaʻú pea kuo ʻosi teuteu mo hoʻo tuʻuakí. Hili ʻa e lotu fakaʻosi ʻo e fakatahá, ʻalu hangatonu ki he feituʻu malangá. ʻE fakaʻatā ai koe mo e faʻahinga ʻoku mou ngāué ke fakahoko ʻa e meʻa lahi taha ʻe ala lavá ʻi he taimi kuo vaheʻi ki he ngāue fakamalangá.
3 Kapau ʻoku vaheʻi atu ke ke tokangaʻi ʻa e fakataha ki he ngāue fakamalangá, kamata ʻi he taimi totonu. ʻAi ke nounou ʻa e fakatahá—ʻo ʻikai toe laka hake ʻi he miniti ʻe 10 ki he 15. Ki muʻa ke mavahe atu ʻa e kulupú, fakapapauʻi ʻoku ʻiloʻi ʻe he tokotaha taki taha ʻa hono hoa mo e feituʻu ke na ngāue aí.
4 Lolotonga ʻa e Ngāue Fakafaifekaú: ʻI he ʻosi ʻa e fakataha malangá, ʻoua ʻe toe nofo noaʻia holó, kae hangatonu leva ki he feituʻu ngāué. Kapau ʻokú ke ʻamanekina te ke mavahe vave mei he feituʻu ngāué, mahalo ʻe lava ke ke fokotuʻutuʻu haʻo meʻalele pē ʻaʻau koeʻuhí ke ʻoua ʻe mavahe vave ai mo e toenga ʻo e kulupú. ʻI he ngāue fakakulupú, fakaʻatuʻi ʻa e niʻihi kehe ʻoku nau tatali nai kia koe ke ʻosi hoʻo malangá. ʻE kau nai ai ʻa e mavahe ʻi ha founga fakapotopoto mei ha taha ʻoku fakafekiki pe ko hono fai ha fokotuʻutuʻu ke toe foki ki ha taha ʻoku mahuʻingaʻia.—Mt. 10:11.
5 ʻI hono fai ʻo e ngaahi toe ʻaʻahí, ʻe lava ke ke hao mei he fefokiʻakí ʻi hono fai kotoa ʻa e ngaahi ʻaʻahi ʻi he feituʻú ki muʻa ke hoko atu ki he feituʻu kehé. ʻE malava nai ke telefoni ki ha faʻahinga ʻe niʻihi ke fakapapauʻi te nau ʻi ʻapi. (Pal. 21:5) Kapau ʻokú ke ʻamanekina ʻe fuoloa ʻa e toe ʻaʻahí, ʻe lava ke fai ha fokotuʻutuʻu ke malanga ʻa e faʻahinga ʻi he kulupú ʻi he feituʻu ofi mai pe ke nau fai ha toe ʻaʻahi kehe.
6 ʻOku tau moʻui ʻi he taimi ʻo ha utu-taʻu fakalaumālie lahi. (Mt. 9:37, 38) Kuo vavé ni ke ngata ʻa e ngāué. Ko ia ai, ʻoku totonu ko ʻetau holí ia ke ngāueleleiʻaki hotau taimí lolotonga ʻa e ngāue fakafaifekaú.