Fakamulituku Ola Lelei

KUÓ KE fekumi fakalelei mo fokotuʻutuʻu nai ʻa e fakamatala ki he sino ʻo hoʻo malangá. Kuó ke toe teuteu nai mo ha talateu ʻokú ne langaʻi ʻa e mahuʻingaʻiá. Neongo ia, ʻoku fiemaʻu ʻa e meʻa ʻe taha—ko ha fakamulituku ola lelei. ʻOua ʻe fakasiʻisiʻi ʻa hono mahuʻingá. Ko e meʻa ʻokú ke lea fakaʻosiʻakí ʻoku faʻa manatuʻi fuoloa tahá. Kapau ʻoku vaivai ʻa e fakamulitukú, naʻa mo e fakamatala ne fai ʻi muʻa aí ʻe mole nai ʻa e konga lahi ʻo ʻene ola leleí.

Fakakaukau ki he meʻá ni: ʻI he fakaʻosiʻosi ʻa ʻene moʻuí, naʻe fai ai ʻe Siosiua ʻa e malanga tuʻu-ki-muʻa ki he kau tangata taʻumotuʻa ʻo e puleʻanga ʻo ʻIsilelí. Hili hono fakalau ʻa e ngaahi feangainga ʻa Sihova mo ʻIsileli talu mei he ngaahi ʻaho ʻo ʻĒpalahamé, naʻe toe fakamatalaʻi pē ʻe Siosiua ʻa e ngaahi meʻa mahuʻingá ʻi ha faʻunga fakanounou? ʻIkai. ʻI hono kehé, ʻi ha ongoʻi loloto naʻá ne enginaki ki he kakaí: “Mou manavahe kia Jihova, bea tauhi ia i he agatonu moe mooni.” Lau ʻiate koe ʻa e fakamulituku ʻa Siosiuá, ʻa ia ʻoku hiki ʻi he Siosiua 24:​14, 15 (PM).

Ko ha malanga mahuʻinga ʻe taha, ʻoku maʻu ia ʻi he Ngāue 2:​14-​36, naʻe fai ʻe he ʻapositolo ko Pitá ki ha fuʻu kakai ʻi Selusalema ʻi he Kātoanga ʻo e Penitekosi 33 T.S. Naʻá ne ʻuluaki fakamatalaʻi naʻa nau siotonu ʻi he fakahoko ʻo e kikite ʻa Sioeli fekauʻaki mo e huaʻi hifo ʻa e laumālie ʻo e ʻOtuá. Ko hono hokó naʻá ne fakahaaʻi ai ʻa e founga ʻo e fehokotaki ʻa e meʻá ni mo e ngaahi kikite faka-Mīsaia ʻi he ngaahi Sāmé naʻe tomuʻa tala ai ʻa e toetuʻu ʻa Sīsū Kalaisí mo hono hakeakiʻi ia ki he nima toʻomataʻu ʻo e ʻOtuá. ʻI heʻene fakamulitukú leva, naʻe fakahaaʻi mahino ai ʻe Pita ʻa e ʻīsiu naʻe fiemaʻu ke fehangahangai mo e tokotaha kotoa ʻi heʻene kau fanongó. Naʻá ne pehē: “Koia ke ilo bau e he fale kotoabe o Isileli, kuo fakanofo e he Otua ae Jisu ko ia, aia naa mou tutuki ki he akau, koe Eiki moe Kalaisi.” Ko e faʻahinga naʻa nau ʻi aí naʻa nau ʻeke: “Ae kau tagata moe kaiga, koeha te mau fai?” Naʻe tali ʻe Pita: “Fakatomala, bea mou taki taha babitaiso i he huafa o Jisu Kalaisi.” (Ng. 2:​37, 38, PM) ʻI he ʻaho ko iá ko e kakai nai ʻe toko 3,000 ʻi heʻene kau fanongó, ʻi hono ueʻi loloto ʻe he meʻa naʻa nau fanongoá, naʻa nau maʻu ai ʻa e moʻoni fekauʻaki mo Sīsū Kalaisí.

Ngaahi Poini ke Manatuʻi. Ko e meʻa ʻokú ke fakahaaʻi ʻi hoʻo fakamulitukú ʻoku totonu ke felāveʻi fakahangatonu ia mo e kaveinga ʻo hoʻo malangá. ʻOku totonu ke hoko atu ia ko ha fakamulituku totonu ki he ngaahi poini tefito kuó ke fakatupulekiná. Neongo te ke loto ke fakakau ai ha ngaahi foʻi lea tefito mei hoʻo kaveingá, ko hono toe fakamatalaʻi hangatonu ʻo iá ko e meʻa pē ia ke fili tauʻatāina ki ai.

ʻI he tuʻunga anga-mahení, ko hoʻo taumuʻa ʻi he malangá ke fakalotolahiʻi ʻa e niʻihi kehé ke nau fai ha meʻa ʻo makatuʻunga ʻi he fakamatala ʻokú ke fakahokó. Ko e taha ʻo e ngaahi taumuʻa tefito ʻo e fakamulitukú ke fakahaaʻi kia kinautolu ʻa e meʻa ke faí. ʻI hoʻo filifili hoʻo kaveingá mo e ngaahi poini tefitó, naʻá ke fakakaukau lelei ki he ʻuhinga ʻe mahuʻinga ai ʻa e fakamatalá ki hoʻo kau fanongó pea mo hoʻo taumuʻa ʻi hono fakahoko iá? Kapau ko ia, ʻokú ke ʻiloʻi ʻa e meʻa te ke saiʻia ke nau faí. ʻOku fiemaʻu leva ke ke fakamatalaʻi ʻa e meʻa ko ia ke faí pea mo e founga nai ke fakahoko ai iá.

Tānaki atu ki hono fakahaaʻi ki hoʻo kau fanongó ʻa e meʻa ke faí, ko hoʻo fakamulitukú ʻoku totonu ke ʻomai ai ʻa e fakaueʻiloto. ʻOku totonu ke fakakau ai ʻa e ngaahi ʻuhinga totonu ki he meʻa ke faí pea mo e ngaahi ʻaonga nai ʻa ia ʻe lava ke hoko mei hono fai iá. Kapau ʻoku fakakaukauʻi lelei ʻa e sētesi fakaʻosí pea fakalea lelei, te ne ʻai ke mālohi ʻa e kotoa ʻo hoʻo malangá.

Manatuʻi ʻoku fakaʻosiʻosi ʻa e malangá. Ko e meʻa ʻokú ke leaʻakí ʻoku totonu ke ne fakahaaʻi ia. ʻOku totonu ke toe feʻungamālie foki mo e vave ʻo hoʻo leá. ʻOua ʻe lea vave ʻo aʻu pē ki he ngataʻangá pea tuʻu fakafokifā leva. ʻI he tafaʻaki ʻe tahá, ʻoua ʻe tuku pē ke holo ho leʻó. ʻOku totonu ke feʻunga ʻa e lahi ʻo ho leʻó kae ʻoua ʻe fuʻu tōtuʻá. Ko hoʻo ngaahi foʻi sētesi siʻisiʻi fakamuimuí ʻoku totonu ke ʻi ai ha tō ʻo e fakaʻosí. Ko hoʻo fakahoko iá ʻoku totonu ke fakahaaʻi ai ʻa e fakamātoato mo e tuipau. ʻI he teuteu ki hoʻo fakahokó, ʻoua ʻe tuku taʻeʻahiʻahiʻi ʻa hoʻo fakamulitukú.

ʻOku totonu ke lōloa fēfē ʻa e fakamulitukú? ʻOku ʻikai ko ha meʻa ia ke fakapapauʻi ʻataʻatā pē ʻe he taimí. ʻOku ʻikai totonu ke totoho ʻa e fakamulitukú. Ko e feʻungamālie ʻo hono lōloá ʻe lava ke fakapapauʻi ia ʻi heʻene ola lelei ki he kau fanongó. Ko ha fakamulituku faingofua, hangatonu mo pau ʻoku fakahoungaʻi maʻu pē ia. Ko ha fakamulituku ʻoku kiʻi lōloa ʻoku fakasino mei ai ha fakatātā nounou ʻe lava ke toe hoko ia ʻo ola lelei kapau ʻoku palani lelei ia. Fakahoa ʻa e fakamulituku nounou ki he tohi kakato ʻa Koheletí, ʻoku maʻu ʻi he Koheleti 12:​13, 14, pea mo e Malanga nounou ange ʻi he Moʻungá, ʻa ia ʻoku hiki ʻi he Mātiu 7:​24-​27.

ʻI he Malaʻe Fakafaifekaú. ʻOku ʻikai ha feituʻu te ke toutou fehangahangai ange ai mo e fiemaʻu ki he ngaahi fakamulitukú ʻe laka hake ʻi he malaʻe fakafaifekaú. ʻI he teuteu mo e mahuʻingaʻia anga-ʻofa ʻi he kakaí, ʻe lava ke ke lavaʻi ai ʻa e meʻa lelei lahi. Ko e akonaki ʻoku fokotuʻu ʻi he ngaahi peesi ki muʻá ʻe lava ke ngāueʻaongaʻaki ia naʻa mo hono liliu ki he fetalanoaʻaki ʻa ha toko uá.

ʻE mātuʻaki nounou nai ha fetalanoaʻaki. ʻE femoʻuekina nai ʻa e tokotahá. ʻE ʻosi nai ʻa hoʻo ʻaʻahí kotoa ʻi ha miniti pē ʻe taha. Kapau ʻe feʻungamālie, te ke leaʻaki nai ha meʻa hangē ko ení: “ʻOku mahino kiate au ʻokú ke femoʻuekina. Kae fēfē ke u tuku atu kiate koe ha fakakaukau fakalototoʻa ʻe taha. ʻOku fakahaaʻi ʻe he Tohitapú ʻoku maʻu ʻe hotau Tokotaha-Fakatupú ha taumuʻa fakaofo—ke ngaohi ʻa e foʻi māmani ko ení ko ha feituʻu ʻa ia ʻe lava ke maʻu ai ʻe he kakaí ʻa e moʻui taʻengatá. ʻE lava ke tau ʻi he Palataisi ko iá, ka ʻoku fiemaʻu ke tau ako ʻa e ngaahi meʻa ʻoku fiemaʻu mai ʻe he ʻOtuá.” Pe te ke tuʻuaki ange pē nai ke toe ʻaʻahi ki ai ʻi ha taimi ʻe faingamālie angé.

Kapau ʻoku fakanounou ʻa e ʻaʻahí koeʻuhi ʻoku fakatahamuhamu ʻa e tokotaha-ʻapí—naʻa mo taʻefakaʻapaʻapa—ʻe kei lava pē ke lavaʻi ha meʻa lelei lahi. Manatuʻi ʻa e akonaki ʻoku maʻu ʻi he Mātiu 10:​12, 13 mo e Loma 12:​17, 18. Ko hoʻo tali anga-maluú ʻe lava ke ne liliu ʻa ʻene vakai ki he Kau Fakamoʻoni ʻa Sihová. ʻE hoko ia ko ha lavameʻa lelei.

ʻI he tafaʻaki ʻe tahá, kuó ke fai nai ha fetalanoaʻaki fakafiemālie mo e tokotaha-ʻapí. Ko e hā ʻoku ʻikai ai ke toe fakamatalaʻi ʻa e poini tefito ʻokú ke loto ke ne manatuʻí? Fakakau ai ha fakaueʻiloto kiate ia ke ne fai ha meʻa fekauʻaki mo ia.

Kapau ʻokú ke sio ki he faingamālie ki ha lāulea lahi ange ʻi ha toe taimi, ʻoange ki he tokotahá ha ʻuhinga ke fakatuʻotuʻa atu ki ai. ʻEke ha foʻi fehuʻi—ko ha foʻi fehuʻi nai ʻoku lāulea ki ai ʻi he Reasoning From the Scriptures pe ko ha tohi kuo faʻufaʻu ki hano fai ha ngaahi ako Tohitapu ʻi ʻapi. Manatuʻi ʻa hoʻo taumuʻá, hangē ko ia naʻe fokotuʻu ʻe Sīsū mo hiki ʻi he Mātiu 28:​19, 20.

ʻOkú ke fakaʻosiʻosi ha ako Tohitapu ʻi ʻapi? ʻI hono toe fakamatalaʻi ʻa e kaveingá ʻe tokoni ia ki he tokotaha akó ke ne manatuʻi ʻa e meʻa naʻe fai ki ai ʻa e lāuleá. Ko hono ngāueʻaki ʻa e ngaahi fehuʻi fakamanatú ʻe tokoni ia ke ʻai ke maongo ʻa e ngaahi poini tefitó ki he ʻatamai ʻo e tokotaha akó, tautefito kapau ʻoku ʻikai ke fakavaveʻi ʻa e fakamanatu ko iá. Ko ha fehuʻi fekauʻaki mo e founga ʻe maʻu ʻaonga nai ai ʻa e tokotaha akó mei he fakamatala naʻe akó pe ko e founga te ne vahevahe nai ai ia ki he niʻihi kehé ʻe lava ke tokoniʻi ai ia ke fakakaukau ʻo fekauʻaki mo hono ngāueʻaongaʻaki ʻa e meʻa kuó ne akó.​—Pal. 4:7.

Manatuʻi—ʻoku tākiekina ʻe hoʻo fakamulitukú ʻa e tuʻunga ola lelei ʻo hoʻo lāuleá kotoa.