Faifakamoʻoni ʻi he Feituʻu Pisinisí ʻi he Loto-Maʻu
1. Ko e hā ʻoku ʻikai totonu ai ke siva e ʻamanakí kapau ʻoku tau ongoʻi manavasiʻi he faifakamoʻoni ʻi he feituʻu pisinisí?
1 ʻOkú ke manavasiʻi ʻi he fakakaukau atu ki he faifakamoʻoni ʻi he ngaahi feituʻu pisinisí? Kapau ko ia, ʻoua ʻe siva e ʻamanakí, he naʻa mo Paula, ʻa ia ko ha faifekau loto-lahi mo taʻemanavahē, naʻe pau ke ‘tafunaki ʻene loto-lahí’ kae lava ʻo malanga. (1 Tes. 2:2) ʻI laló ko ha ngaahi fakahohaʻa anga-maheni ia fakataha mo e ngaahi fokotuʻu ʻe ala ngāueʻaki ke ikuʻi ia.
2. Ko e hā ʻoku totonu ai ke ʻoua te tau hohaʻa fekauʻaki mo hano fakaʻitaʻi e kau ngāué?
2 ʻE Fakatupu ʻIta ki he Kau Ngāué Hono Fakahohaʻasi Kinautolú? ʻI he ngaahi pisinisi lahi ko e kau ngāué ʻoku nau ngāue maʻá e kakaí pea ʻoku nau ʻamanekina ʻa e ngaahi fakahohaʻa. Te nau faʻa anga-lelei pē, koeʻuhi te nau vakai atu nai kia koe ko ha tokotaha ʻe ala hoko ko ha kasitomā. ʻI he ʻai vala ʻi ha founga fakangeingeiá pea anga-lelei mo fakakaumeʻá, te ke fakaʻaiʻai ai ha fakafeangai anga fakaʻapaʻapa.
3. ʻE lava fēfē ke tau fakaʻehiʻehi mei hano fakaʻitaʻi e kau kasitomaá?
3 ʻE Pau ke Fai ʻEku Tuʻuakí ʻi Muʻa ʻi ha Kau Kasitomā Tokolahi? Kapau ʻoku ala lava, fili ha taimi ʻa ia ʻoku ʻikai fuʻu femoʻuekina ai ʻa e ngaahi falekoloá, hangē ko ia ko e taimi fakaavá. Tatali kae ʻoua ke toko taha ʻa e pulé pe kalaké ki muʻa ke fakalea ki aí. ʻAi hoʻo tuʻuakí ke nounou ʻaupito.
4. Ko e hā ʻe lava ke tau leaʻakí ʻi he taimi ʻoku tau ngāueʻi ai ʻa e ngaahi feituʻu pisinisí?
4 Ko e Hā ʻOku Totonu Ke U Leaʻakí? Fakalea ki he tokotaha pulé kapau ʻoku ʻi ai ha kau ngāue tokolahi ai. ʻE lava ke ke pehē: “ʻOku faingataʻa ke maʻu ʻa e kakai pisinisí ki ʻapi, ko ia ʻoku mau ʻaʻahi mai ai kia koe ʻi ho feituʻu ngāué. ʻOku ou ʻilo ʻokú ke ngāue, ko ia te u kiʻi fakalea nounou ʻaupito.” Koeʻuhi ke ʻoua naʻa fetoʻoaki koe mo e kau tuʻuaki koloá, ʻoku faʻa lelei tahá ke ʻoua naʻa lave ki he fokotuʻutuʻu ʻo e tokoni fakapaʻangá tuku kehe ka ʻeke mai pe ʻoku fakapaʻanga fēfē ʻetau ngāué. Fakatuʻunga ʻi he natula ʻo e pisinisí, ʻe lava ke ke kole ki he pulé ke fakaʻatā koe ke lea nounou pē ki he kau ngāué. Toe fai hoʻo tuʻuakí kia kinautolu. Kapau ʻoku hā ngali femoʻuekina ha tokotaha ngāue, fakanounou hoʻo tuʻuakí pea tuku ai ha tuleki. Kapau ʻoku ʻikai ala lava ke talanoa ki he kau ngāué, mahalo ʻe fakaʻatā koe ke tuku ha tohi ʻi he loki mālōlōʻangá pe ko ha toe feituʻu talanoaʻanga kehe.
5. Ko e hā ʻa e ngaahi ʻuhinga ʻoku ʻi ai ke kau ai ʻi he faifakamoʻoni ʻi he loto-maʻu ʻi he feituʻu pisinisí?
5 Naʻe malanga ʻa Sīsū mo Paula ki he kakaí ʻi honau ngaahi feituʻu pisinisí, pea ʻe lava ke pehē mo koe. (Māt. 4:18-21;9:9; Ngā. 17:17) Kole kia Sihova ke tokoniʻi koe ke maʻu ha loto-nonga pea ke hoko ʻo loto-toʻa. (Ngā. 4:29) Ko e feituʻu pisinisí ʻoku siʻi pē ha ʻikai-ha-taha-ʻi-ʻapi, ko ia ko e hā ʻoku ʻikai ke ke ʻahiʻahiʻi ai ʻa e founga faifakamoʻoni ola lelei ko ení?