Fakamanatu ki he Fakataha-Lahi

◼ Taimi ʻo e Polokalamá: ʻE fakaava ʻa e ʻū matapaá ʻi he 8:00 pongipongi. Ko e fasi talateú ʻe kamata hono taá ʻi he 9:20 pongipongi ʻi he ʻahó kotoa ʻe tolu. ʻI he taimi ko iá, ko kitautolu hono kotoa ʻoku totonu ke tau ʻalu ki hotau nofoʻangá koeʻuhí ke lava ʻa e polokalamá ʻo kamata ʻi ha founga fakangeingeia. Ko e polokalamá ʻe ʻosi ʻi he 5:00 efiafi ʻi he Falaite mo e Tokonaki pea ʻi he 4:00 efiafi ʻi he Sāpaté.

◼ ‘Fakamālō kia Sihova ʻAki ʻa e Hiva’: Ko e kakai ʻa e ʻOtuá ʻi he taimi ʻo e kuonga muʻá naʻa nau fakamālō kia Sihova ʻi he hiva, pea ko e fasí ʻoku hokohoko atu ʻene hoko ko e konga mahuʻinga ʻo e lotu moʻoní ʻi he ʻahó ni. (Saame 28:7) Ko e konga taki taha ʻo ʻetau fakataha-lahi fakavahefonuá ʻoku kamataʻaki ʻa e tā fasi. ʻOku ʻikai ko ha tā fasi pē ka ʻoku teuteuʻi ia koeʻuhi ke lava ʻo tau ako mo lotu kia Sihova. Ko ia, ʻi hono fanongonongo ʻe he seá ʻa e teu ke kamata ʻa e tā fasí, koe taimi ia ke tangutu ai pea fanongo ʻi he houngaʻia ki he fasí, kae ʻikai ko e fetalanoaʻaki. ʻI heʻetau fai peheé ʻoku fakahaaʻi atu ai ʻetau fakamahuʻingaʻi ʻa e ngaahi feinga ʻa e ngaahi mēmipa tā meʻalea ʻa e Taua Leʻó. Tuʻo ua he taʻu ʻoku fononga ʻa e fanga tokoua mo e fanga tuofāfine ko ení ʻi he fakamole pē ʻa kinautolu ki Patterson, Niu ʻIoke, koeʻuhi ke faʻu ha hiva mālie ke tau fiefia ai. Hili ʻa e fanongo lelei ki he tā fasí, ʻoku totonu ke kau fakataha ʻa e tokotaha kotoa ʻi he fakamālō kia Sihova ʻaki hono hivaʻi ʻetau ngaahi hiva ʻo e Puleʻangá.

◼ Tauʻangá: ʻI he kotoa ʻo e ngaahi feituʻu faiʻanga fakataha-lahi ko ia ʻoku tau puleʻi ʻa e tauʻangá, ʻe ala maʻu taʻetotongi ʻa e ngaahi tauʻangá ʻo fai pē ki he ʻuluaki aʻu ki aí. ʻOku faʻa siʻisiʻi ʻa e tauʻangá, ko ia ʻoku totonu ke heka fakatokolahi ʻi ha meʻalele ʻe taha ʻi he lahi taha ʻe ala lavá. Ko e faʻahinga pē ʻoku ʻi ai ʻenau Ngofua Tauʻanga ki he Faingataʻaʻiá ʻe fakaʻatā ke nau tau ʻi he feituʻu ʻoku taʻofi maʻanautolú.

◼ Taʻofi ʻo e Nofoʻangá: ʻI he taimi pē ʻoku fakaava ai ʻa e fale faiʻanga fakataha lahí ʻi he pongipongi taki taha, kātaki ʻoua ʻe fakavave ki he tangutuʻanga ʻokú ke saiʻia aí kapau ʻoku saiʻia mo ho kaungāmaʻu fakatahá ʻi he nofoʻanga ko iá. Kātaki ʻo fakaʻatuʻi ʻa e niʻihi kehé naʻa mo hono feilaulauʻi ʻetau ngaahi saiʻiá koeʻuhi ko hotau fanga tokouá. Ko ha laumālie feilaulauʻi-kita ʻoku tapua atu ai ko e kau Kalisitiane moʻoni kitautolu pea ueʻi mo e faʻahinga kehé ke nau fakahīkihikiʻi ʻa e ʻOtuá. (Sione 13:34, 35; 1 Kol. 13:5; 1 Pita 2:12) Ko e nofoʻangá ʻe taʻofi pē ki he faʻahinga ʻoku nofo ʻi ho ʻapí pe heka mai ʻi hoʻo meʻalelé pe ko hoʻo kau ako Tohi Tapu lolotongá. Kātaki ʻoua ʻe toe tuku ha ngaahi meʻa ʻi he nofoʻanga ʻoku ʻikai te ke taʻofí. Ko hoʻo tokoni ʻi he meʻá ni ʻe malava ai ke sio ʻa e niʻihi kehé ʻoku ʻataʻatā ʻa e ngaahi nofoʻanga ko iá. Kuo tokonaki ʻa e ngaahi nofoʻanga makehe maʻá e kau taʻumotuʻá mo e kau mahamahakí. Koeʻuhi ʻoku fakangatangata ʻa e nofoʻangá, ko e toko taha pe toko ua pē ke tangutu fakataha ʻo tokangaʻi ʻa e tokotaha taʻumotuʻá pe mahamahakí.

◼ Vala Fakanānā: ʻI he lolotonga ʻa e fakataha-lahí ko hotau valá ʻoku totonu ke taau mo anga-fakanānā, kae ʻikai tapua atu ai ʻa e ngaahi sitaila tōtuʻa ʻoku anga-maheniʻaki ʻi he māmaní. (1 Tīm. 2:9) Naʻa mo e taimi ʻoku tau hū ai ki he hōtelé pe mavahe mei ai mo e lolotonga ʻo e ngaahi taimi mālōloó, ki muʻa mo e hili ʻo e ngaahi kongá, ʻoku tau loto ke fakaʻehiʻehi mei he teuteu ʻaiʻainoaʻia pe taʻemaau. Ko ia ai, ʻoku totonu ke tau pōlepole ʻi hono tui hotau fakaʻilonga fakataha-lahí pea ʻoua ʻe mā ke fai ha fakamoʻoni ʻi he taimi ʻoku maʻu ai ha faingamālie. Ko hotau teuteú mo e ʻulungaanga lelei lolotonga hono maʻu ʻa e ngaahi fakataha-lahi ʻoku teu ke hokó, ʻe ʻikai ngata pē ʻi hono tohoakiʻi mai ʻa e kakai loto-totonú ki he pōpoaki fakahaofi moʻui ʻo e Tohi Tapú ka ʻoku toe ʻoatu ai ʻa e fiefia kia Sihova.—Sēf. 3:17.

◼ ʻUlungaanga Lelei ʻi Hono Ngāueʻaki e Meʻangāue Fakaʻilekitulōniká: ʻOku tau fakahāhā ʻa e ʻulungaanga lelei ʻi he lolotonga ʻa e polokalamá ʻaki hono seti ʻetau telefoní pe ngaahi meʻangāue fakaʻilekitulōnika kehé ki ha tuʻunga ʻe ʻikai fakahohaʻasi ai ʻa e niʻihi kehé. Kapau ʻoku tau ngāueʻaki ha meʻa faitā, meʻa hiki vitiō, tepileti pe ko ha meʻangāue kehe, ʻoku fiemaʻu ke tau fakaʻatuʻi ʻa e niʻihi kehé ke ʻoua ʻe fakapuliki ʻenau sió. ʻOku tau toe fakahāhā ʻa e ʻulungaanga leleí ʻo ʻoua ʻe feʻaveʻaki pōpoaki pe ʻīmeili noaʻia ʻi he lolotonga ʻo e polokalamá.

◼ Houa Kai Hoʻataá: Kātaki ʻo ʻomai ha kai hoʻatā maʻamaʻa kae ʻoua ʻe mavahe mei he feituʻu faiʻanga fakataha-lahí ke ʻomai ha meʻakai lolotonga ʻa e mālōlō hoʻataá. ʻE ngāueʻaki nai ha kiʻi kula ʻe lava ke hao ʻi he lalo seá. Ko e ngaahi kula lalahí mo e ngaahi meʻa sioʻatá ʻoku ʻikai ngofua ia ʻi he fale faiʻanga fakataha-lahí.

◼ Ngaahi Tokoní: ʻOku lava ke tau fakahaaʻi ʻetau houngaʻia ki he ngaahi fokotuʻutuʻu ki he fakataha-lahí ʻaki hono fai ha ngaahi tokoni loto-fiefoaki ki he ngāue ʻi māmani lahí ʻi he fakataha-lahí. Ko e sieké ʻoku totonu ke ʻai ke ala totongi ia ki he “Tonga Association of Jehovah’s Witnesses.” ʻI he ngaahi feituʻu ʻe niʻihi ko e tokoní ʻe lava foki ke fai fakafou ʻi ha kaati kulētiti.

◼ Faitoʻó: Kapau ʻokú ke fiemaʻu ha foʻiʻakau fakamafaiʻi fakatoketā, kātaki ʻo fakapapauʻi ke ke haʻu mo ha foʻiʻakau feʻunga, he ʻoku ʻikai ala maʻu ia ʻi he fakataha-lahí. Ko e ngaahi naunau huhu suká, kātaki ʻo tokanga fakapotopoto ki ai, ʻoua ʻe laku ki he tānakiʻanga veve anga-mahení.

◼ Tokanga ki he Tuʻunga Malú: Kātaki ʻo tokanga ki hono fakasiʻisiʻi ʻo e lavea ʻe lava ke fakatupunga koeʻuhi ko e hekea pe humu. ʻI he taʻu taki taha ʻoku hoko ha ngaahi lavea ʻoku felāveʻi mo e suú, tautefito ki he ngaahi sū ʻeté. ʻOku lelei tahá ke fili ha sū ʻoku fakanānā mo feʻunga lelei ʻo malava ai ke ke lue lelei ʻi he tahifó, ngaahi sitepú, faliki vangavanga mo e ngaahi meʻa pehē.

◼ Saliote Pēpeé: Ko e ngaahi saliote pēpeé ʻoku ʻikai totonu ke ʻomai ia ki he faiʻanga fakataha-lahí. Neongo ia, ʻoku tali pē ʻa e sea maʻá e fānaú kapau ʻoku lava ke fakamaʻu he nofoʻanga hoko atu ki he mātuʻá.

◼ Meʻa Fakanamuleleí: Ko e lahi taha ʻo e ngaahi fakataha-lahí ʻoku fai ia ʻi he feituʻu ʻoku mapunipuni ʻa ia ʻoku ngāueʻaki ai ʻa e mīsini ʻea fakamokomoko. Ko ia ai, ko ha anga-ʻofa ia kapau ʻe fakasiʻisiʻi hono ngāueʻaki ʻa e ngaahi meʻa fakanamuleleí mo e kaloni namu mālohí ʻa ia ʻe fakatupunga ha puke ki he faʻahinga ʻoku faingataʻaʻia ʻenau mānavá pe palopalema kehe meimei tatau.—1 Kol. 10:24.

◼ Falekaí: Fakalāngilangiʻi ʻa e huafa ʻo Sihová ʻaki hoʻo ʻulungaanga lelei ʻi he ngaahi falekaí. Teuteu ʻi ha founga ʻoku tuha ko ha faifekau Kalisitiane.

◼ Hōtelé:

(1) Kātaki ʻoua ʻe taʻofi ha ngaahi loki lahi ange ʻi he meʻa te ke ngāueʻakí, pea ʻoua ʻe nofo ha kakai ʻi ho lokí ʻo tokolahi ange ia ʻi he meʻa ʻoku fakaʻataá.

(2) ʻOua ʻe kaniseli hoʻo taʻofi nofoʻangá tuku kehe ʻi ha tuʻunga fakavavevave, pea fakahā ki he hōtelé ʻi he taimi pē ʻoku hoko aí, koeʻuhi kae lava ʻa e niʻihi kehé ʻo ngāueʻaki. (Māt. 5:37) Kapau ʻe kaniseli hoʻo taʻofi nofoʻangá, fakapapauʻi ʻokú ke maʻu hoʻo fika tali totongí pea vakaiʻi ʻa e ngaahi fiemaʻu ʻa e hōtelé ki hono kaniseli ha loki ke ʻoua ʻe mole hoʻo tipōsití.

(3) Feimeʻakai pē ʻi he ngaahi loki ʻoku ngofua ke fai ai ha feimeʻakaí.

(4) ʻOua ʻe ngāuehalaʻaki ʻa e meʻakai pongipongí, kofi pe ʻaisi poloka taʻetotongi ʻoku ʻai ke ala maʻu ke ngāueʻaki ʻe he kau ʻaʻahí lolotonga ʻenau ʻi he hōtelé ʻo ʻave ia ki he fakataha lahí.

(5) Fakahāhā ʻa e fua ʻo e laumālié ʻi he feangainga mo e kau ngāue hōtelé ʻi he taimi kotoa. ʻOku nau tokangaʻi ha fuʻu kau ʻaʻahi tokolahi pea te nau houngaʻia ʻi heʻetau anga-leleí, kātakí mo e fakaʻatuʻí.

(6) ʻOku totonu ki he ngaahi mātuʻá ke nau tokangaʻi ʻenau fānaú ʻi he taimi kotoa pē ʻi he hōtelé.

(7) Kapau ʻe hoko ha palopalema ʻi ho loki ʻi he hōtelé, fakahā ki he Potungāue Nofoʻangá lolotonga hoʻo ʻi he fakataha-lahí koeʻuhi kae lava ke nau tokoniʻi koe.

◼ Ngāue Polé: Ko ha taha pē ʻoku loto ke pole ʻoku totonu ke ne fetuʻutaki ki he Potungāue Ngāue Pole ʻi he fakataha-lahí. Ko e fānau siʻi hifo he taʻu 16 ʻe lava ke nau ngāue foki ʻi he malumalu ʻo e tataki ʻa ha taha ʻo e ongo mātuʻá pe ko hono tauhí pe ko ha tokotaha lahi ʻoku loto ki ai ʻa e taha ʻo e ongo mātuʻá pe tokotaha tauhí.