Fakaleleiʻi ʻEtau Pōtoʻi ʻi he Ngāue Fakafaifekaú—Taʻofi ʻa e Ngaahi Ako Tohi Tapu ʻOku ʻIkai Fakalakalaká

ʻUHINGA ʻOKU MAHUʻINGA AÍ: Kuo pau ke ui ʻa e kakaí ki he huafa ʻo Sihová koeʻuhí ke fakahaofi. (Loma 10:13, 14) Kae kehe, ʻoku ʻikai loto ʻa e tokotaha kotoa ke ako ʻa e Tohi Tapú pea moʻuiʻaki ʻa e ngaahi tuʻunga ʻa Sihová. ʻOku tau ngāueleleiʻaki hotau taimí ʻi he ngāue fakafaifekaú ʻi hono tokoniʻi ʻa e faʻahinga ʻoku nau loto-moʻoni ke fai ha ngaahi liliu ke fakahōifuaʻi ʻa Sihova. Kapau ʻoku ʻikai ke fai ʻe he tokotaha akó ha fakalakalaka ʻi he hili ha vahaʻa taimi feʻungamālie, ʻoku fakapotopoto ke taʻofi ʻa e akó pea ngāueʻaki hotau taimí ke tokoniʻi ʻa e faʻahinga ʻoku tohoaki mai ʻe Sihova ki heʻene kautahá. (Sione 6:44) Ko e moʻoni, kapau ʻi he kahaʻú ʻe fakahaaʻi ʻe he tokotahá ha “hehema totonu ki he moʻui taʻengatá,” ʻoku tau fiefia ke toe hoko atu ʻene ako Tohi Tapú.—Ngā. 13:48.

FOUNGA HONO FAI IÁ:

• Fakaongoongoleleiʻi ʻa e tokotaha akó ʻi heʻene loto ke maʻu ʻa e ʻilo totonú.—1 Tīm. 2:4

• Fakamamafaʻi ʻa e mahuʻinga ʻo ʻene ngāueʻaki ʻa e meʻa kuó ne akó.—Luke 6:46-49

• Lāulea anga-ʻofa ki he talanoa fakatātā ʻa Sīsū ʻo fekauʻaki mo e tokotaha tūtūʻí, pea ʻeke ange ʻa e meʻa ʻokú ne taʻofi nai ia mei heʻene hoko ʻo fakalakalaká.—Māt. 13:18-23

• Fakamatalaʻi fakapotopoto ʻa e ʻuhinga ʻokú ke taʻofi ai ʻa e akó

• ʻAi ke ne ʻiloʻi te ke toutou ʻaʻahi atu ke fakalototoʻaʻi ia pea ʻe lava ke hoko atu ʻa e akó ʻi he kahaʻú ʻo kapau ʻokú ne fai ha fakalakalaka

SIO ʻI HE VITIOÓ, PEA TALI LEVA ʻA E NGAAHI FEHUʻI KO ENÍ:

• Ko e hā naʻá ke ako mei he fetalanoaʻakí naʻe fakahaaʻi mahino ai naʻe ʻikai fai ʻe he tokotaha akó ha fakalakalaka fakalaumālie?

• Naʻe anga-fēfē hono tokoniʻi ʻe he tokotaha malangá ʻa e tokotaha akó ke ne mahinoʻi ʻa e fiemaʻu ke ne fai ha ngaahi liliú?

• Naʻe anga-fēfē hono fakahaaʻi ʻe he tokotaha malangá ʻe kei lava pē ke toe hoko atu ʻa e akó ʻi he kahaʻú?