Puha Fehuʻi

◼ Ko e hā ʻa e ngaahi ʻaonga ʻo e kau ki he fakatahaʻanga ʻoku vaheʻi ki he feituʻu ʻoku tau nofo aí?

Fakafou ʻi he fokotuʻutuʻu ʻa e fakatahaʻangá, ʻoku tau maʻu ai ʻa e fakalototoʻa ‘ke fakaʻaiʻai ai kitautolu ki he feʻofaʻakí mo e ngaue leleí.’ (Hep. 10:​24, 25) Fakafou ʻi he fakatahaʻangá ʻoku tau ako ai ʻa e moʻoní pea teuʻi ai kitautolu ke fakahoko ʻetau ngāue ngaohi-ākongá. (Mt. 28:​19, 20) ʻOku toe fakaivimālohiʻi ai kitautolu ke kātakiʻi loto-tōnunga ʻa e ngaahi ʻahiʻahí pea ʻoku tau maʻu ai ʻa e kau ʻovasia ʻofa ke tokoniʻi kitautolu ke fekuki mo e ngaahi tenge mo e loto-moʻua lahi. ʻOku hā mahino, ʻoku mātuʻaki mahuʻinga ʻa e fakatahaʻangá ki heʻetau hao fakalaumālié. Kae kehe, ʻoku ʻi ai ʻa e ngaahi ʻaonga ʻi he kau ki he fakatahaʻanga ʻokú ne tokangaʻi ʻa e feituʻu ʻoku tau nofo aí?

ʻOku kehekehe ʻa e ngaahi tuʻunga fakatāutahá, pea ko e ngaahi meʻa tefito ko ia hangē ko e ngāue fakamāmaní, ko ha hoa taʻetui, mo e fefonongaʻakí te ne uesia nai ʻa ʻete fili fakaʻosí ʻi he fekauʻaki mo e meʻá ni. Neongo ia, ʻoku ʻi ai ʻa e ngaahi ʻaonga, fakatouʻosi ʻi he fakalaumālié mo e founga kehé, ʻi he taimi ʻoku feohi ai ha tokotaha mo e fakatahaʻanga ʻokú ne tokangaʻi ʻa e feituʻu ʻokú ne nofo aí. ʻE malava nai ai ke fetuʻutaki vave ange ʻa e kau mātuʻá mo e kau malangá kotoa ʻi he ngaahi tuʻunga fakavavevavé. Kuo fakamamafaʻi ʻi he ngaahi Puha Fehuʻi he kuohilí ha ngaahi ʻaonga lahi kehe.​—Mē 1991, ʻEpeleli 1976, mo Fepueli 1967.

ʻI he fakalūkufuá, ʻoku totonu ange ke kau ki he ngaahi fakataha ofi maí, ʻo fakaʻatā ai ke tau aʻu tōmuʻa feʻunga ki ai ke talanoa mo e niʻihi kehé, tokangaʻi ʻa e ngaahi meʻa ʻoku fiemaʻú, pea kau ʻi he hiva mo e lotu kamatá. ʻI he taimi ʻoku nofo ai ʻa e faʻahinga mahuʻingaʻia foʻoú ʻi hotau feituʻu kaungāʻapí, ʻoku tau faʻa ʻi he tuʻunga lelei ange ai ke aʻu kia kinautolu, fai ha ngaahi ako Tohitapu mo kinautolu, pea tataki kinautolu ki he ngaahi fakataha ʻoku faingamālie taha kia kinautolú.

ʻOku mau tuipau ko e ngaahi ʻuluʻi fāmilí te nau fakakaukau ʻi he lotu ki he meʻá ni, ʻo fakakaukau lelei ki he ngaahi meʻa tefito kotoa ʻoku kau ki hono fakapapauʻi ʻa e meʻa ʻoku lelei taha fakalaumālie mo fakamatelie ki honau fāmilí.​—1 Tim. 5:8.