Tali ʻa e Fefaikehekeheʻakí​—Founga ʻe Lava ke Tokoni Ai ʻa e Tohi Tapú

“Ko hono tali ʻa e fefaikehekeheʻaki ʻa e fakakaukaú mo e tōʻongá ko e meʻa ia ʻokú ne ʻai ke ala maʻu ʻa e melinó.”​—UNESCO Declaration of Principles on Tolerance, 1995.

ʻI he tafaʻaki ʻe tahá, ko e ʻikai tali ʻa e fefaikehekeheʻakí ʻe lava ke fakatupunga ai ʻa e anga-taʻefakaʻapaʻapá pea naʻa mo e tāufehiʻá. Ko e ngaahi ongoʻi loloto peheé ʻe lava ke tupulaki ia ʻo hoko ai ʻa e lea taʻeʻofá, filifilimānakó mo e anga-fakamālohí.

Ka ʻoku kehekehe pē ʻa e ngaahi fakakaukau ʻa e kakaí ʻo fekauʻaki mo e meʻa ʻoku kaunga ki hono tali ʻa e fefaikehekeheʻakí. ʻOku tui ʻa e niʻihi ko e kakai ʻoku nau tali ʻa e fefaikehekeheʻakí kuo pau ke nau loto-tatau mo e ngaahi ngāue mo e tōʻonga kotoa ʻa e niʻihi kehé. Ko e niʻihi ʻoku nau maʻu ʻa e vakai ʻa e Tohi Tapú, ʻa ia ko e kakai ʻoku nau tali ʻa e fefaikehekeheʻakí ʻoku nau fakaʻapaʻapaʻi ʻa e totonu ʻa e tokotaha taki taha ke fili ʻa ʻene ngaahi tuʻunga fakaeʻulungaanga mo e ngaahi tui pē ʻaʻana, neongo kapau ʻoku ʻikai ke nau loto-tatau mo e ngaahi meʻa ko iá.

ʻE lava ke tokoniʻi ʻe he Tohi Tapú ʻa e kakaí ke nau tali ʻa e fefaikehekeheʻakí ʻi he ʻaho ni?

Ko e makatuʻunga Fakatohitapu ki hono tali ʻa e fefaikehekeheʻakí

ʻOku pouaki ʻe he Tohi Tapú hono tali ʻa e fefaikehekeheʻakí. ʻOku pehē ai: “Tuku ke hoko hoʻomou fakakaukau leleí ʻo ʻiloʻi ʻe he tangata kotoa pē.” (Filipai 4:5) ʻOku fakalototoʻaʻi kitautolu ʻe he Tohi Tapú ke tau fakafeangai ki he niʻihi kehé ʻi ha founga fakaʻatuʻi, fakaʻapaʻapa mo totonu. Ko e faʻahinga ʻoku nau ngāueʻaki ʻa e faleʻi ko ení heʻikai nai ke nau loto-tatau pe ohi ʻa e tuʻunga fakaeʻulungaanga ʻa e tokotaha ʻe tahá, ka ʻoku nau fakaʻatā ʻa e tokotaha ko iá ke ne tōʻongafai ʻo fakatatau ki heʻene fili pē ʻaʻana.

Kae kehe, ʻoku fakahaaʻi ʻe he Tohi Tapú ʻoku ʻi ai ʻa e ngaahi tuʻunga ʻa e ʻOtuá ki he tōʻonga ʻa e faʻahinga ʻo e tangatá. ʻOku pehē ai: “[Ko e ʻOtuá] kuó ne fakahā kiate koe, ʻe tangata, ʻa e meʻa ʻoku leleí.” (Maika 6:8) ʻOku fakahaaʻi ai ʻa e tataki ʻoku ʻomai ʻe he ʻOtuá ke tokoniʻi ʻa e kakaí ke nau fiefia ʻi he moʻui lelei taha ʻe ala lavá.​—ʻAisea 48:17, 18.

ʻOku ʻikai ke fakamafaiʻi kitautolu ʻe Sihova ke tau fakamāuʻi ʻa e niʻihi kehé. Fakatatau ki he Tohi Tapú, “ʻOku toko taha pē ʻa e Tokotaha Foaki-Laó mo e Fakamāú . . . Ko hai koe ke ke fakamāuʻi ho kaungāʻapí?” (Sēmisi 4:12) ʻOku ʻomai ʻe he ʻOtuá kiate kitautolu taki taha ʻa e tauʻatāina ke fai ʻa e ngaahi fili ʻa ia ʻoku tau fuesia pē ʻe kitautolu fakafoʻituitui.​—Teutalōnome 30:19.

Meʻa ʻoku leaʻaki ʻe he Tohi Tapú fekauʻaki mo e fakaʻapaʻapá

ʻOku tala mai ʻe he Tohi Tapú ʻoku totonu ke tau “fakaʻapaʻapa ki he faʻahinga kotoa pē ʻo e tangatá.” (1 Pita 2:17) Ko ia ko e faʻahinga ʻoku nau fili ke moʻuiʻaki ʻa e ngaahi tuʻunga Fakatohitapú ʻoku nau fakafeangai ki he kakai kotoa pē ʻi he anga-fakaʻapaʻapa, neongo pe ko e hā ʻa e tui pe founga moʻui ʻoku nau filí. (Luke 6:31) ʻOku ʻikai ʻuhinga eni iá ko e faʻahinga ʻoku nau muimui ki he Tohi Tapú te nau loto-tatau mo e tui pe fakakaukau kotoa pē pe te nau poupouʻi ʻa e fili kotoa pē ʻoku fai ʻe he niʻihi kehé. Ka ʻi he ʻikai ke fakafeangai ʻi he anga-kovi pe anga-taʻefakaʻapaʻapá, te nau feinga honau lelei tahá ke faʻifaʻitaki ki he anga ʻo e fakafeangai ʻa Sīsū ki he niʻihi kehé.

Ko e fakatātaá, ʻi he taimi ʻe taha naʻe fetaulaki ʻa Sīsū mo ha fefine ʻa ia naʻá ne kau ki ha lotu naʻe ʻikai loto-tatau mo ia ʻa Sīsū. Ko e fefine ko ení naʻá ne nofo foki mo ha tangata ʻa ia naʻe ʻikai ko hono husepāniti​—ko ha founga moʻui naʻe ʻikai tali ʻe Sīsū. Neongo ia, naʻá ne lea ki he fefiné ʻi he anga-fakaʻapaʻapa.​—Sione 4:9, 17-24.

Hangē ko Sīsuú, ko e kau Kalisitiané ʻoku nau mateuteu ke fakamatalaʻi ʻa e ʻuhinga ki heʻenau ngaahi tuí ki he faʻahinga ʻoku loto-lelei ke fanongó, ka ʻoku nau fai eni ʻi he “fakaʻapaʻapa loloto.” (1 Pita 3:15) ʻOku fakahinohinoʻi ʻe he Tohi Tapú ʻa e kau Kalisitiané ke ʻoua te nau fakamālohiʻi ʻenau fakakaukaú ke tali ʻe he niʻihi kehé. ʻOku pehē ai ko ha muimui ʻo Kalaisi “ʻoku ʻikai fiemaʻu ia ke ne kē, ka ʻoku fiemaʻu ke ne hoko ʻo anga-fakaalaala ki he tokotaha kotoa pē,” kau ai ʻa e faʻahinga ʻoku kehe ʻenau ngaahi tuí.​—2 Tīmote 2:24.

Meʻa ʻoku leaʻaki ʻe he Tohi Tapú fekauʻaki mo e tāufehiʻá

ʻOku tala mai ʻe he Tohi Tapú ke tau “tuli ke melino mo e kakai kotoa pē.” (Hepelū 12:14) Ko e tokotaha ʻoku tuli ki he melinó ʻokú ne talitekeʻi ʻa e tāufehiʻá. ʻI he ʻikai fakangaloku ʻene ngaahi tuʻunga fakaeʻulungāngá, ʻokú ne feinga mālohi ke nofo melino mo e niʻihi kehé. (Mātiu 5:9) Ko hono moʻoní, ʻoku toe fakalototoʻaʻi ʻe he Tohi Tapú ʻa e kau Kalisitiané ke nau ʻofa ki honau ngaahi filí ʻaki ʻa e fakafeangai ʻi he anga-lelei ki he faʻahinga ʻoku nau ngaohikoviʻi kinautolú.​—Mātiu 5:44.

Ko e moʻoni, ʻoku pehē ʻe he Tohi Tapú ko e ʻOtuá ʻokú ne “fehiʻa,” pe “fakaliliʻa,” ʻi he ngaahi tōʻonga ʻokú ne tuku hifo ʻa e ngeia ʻo e kakaí pe fakatupunga ha kovi ki he niʻihi kehé. (Palōveepi 6:16-19) Ka ʻoku ngāueʻaki heni ʻe he Tohi Tapú ʻa e foʻi lea “fehiʻa” ke fakamatalaʻi ha ongoʻi mālohi ʻo e fakaliliʻa ki he ngaahi tōʻonga koví. ʻOku fakahaaʻi ʻe he Tohi Tapú ko e ʻOtuá ʻokú ne loto-lelei ke fakamolemoleʻi pea tokoniʻi ʻa e kakai ʻoku nau loto ke liliu ʻenau ngaahi tōʻongá pea moʻui ʻo fakatatau ki heʻene ngaahi tuʻungá.​—ʻAisea 55:7.

Ngaahi veesi Tohi Tapu ʻoku felāveʻi mo hono tali ʻa e fefaikehekeheʻakí mo e fakaʻapaʻapá

Taitusi 3:2: “Hoko ʻo fakakaukau lelei, ʻo fakahāhā ʻa e anga-malū fakaʻaufuli ki he tangata kotoa pē.”

Mātiu 7:12: “Ko ia ai, ko e ngaahi meʻa kotoa pē ʻoku mou loto ke fai atu ʻe he kakaí kiate kimoutolú, kuo pau foki ke mou fai ia kiate kinautolu.”

Siosiua 24:15: “Mou fili maʻamoutolu he ʻahó ni pe ko hai te mou tauhí.”

Ngāue 10:34: “ʻOku ʻikai ke filifilimānako ʻa e ʻOtuá.”

Hapakuke 1:12, 13: ‘[Ko e ʻOtuá] heʻikai lava ke ne kātakiʻi ʻa e fulikivanú.’

Loma 12:19: “Tuku ia ki he houhaú [ʻa e ʻOtuá]; he kuo tohi: ‘Ko e sāuní ʻoku ʻaʻaku ia; te u fai ʻe au ʻa e totongi fakafokí,’ ko e folofola ia ʻa Sihová.”a

Ko Sihova ko e ʻOtuá ʻoku ʻikai ke ne fakamafaiʻi ha taha ke faisāuni. Te ne fakapapauʻi ko e fakamaau totonú ʻe fakahoko ia ʻi he taimi kuó ne kotofá. Ke ako lahi ange, lau ʻa e kupu “ʻE Fanongoa ʻa e Tangi ki he Fakamaau Totonú?”