2 | Maluʻi Hoʻo Maʻuʻanga Moʻuí

ʻUHINGA ʻOKU MAHUʻINGA AÍ

Ko e kakai tokolahi ʻoku nau fāinga ʻi he ʻaho taki taha ʻi he feinga pē ke feau ʻenau ngaahi fiemaʻú. Ko e meʻa pangó, ko e māveuveu ʻa e māmaní ʻe lava ke ne ʻai ʻa e pole ko iá ke toe faingataʻa ange. Ko e hā hono ʻuhingá?

• Ka hoko ha māveuveu ʻi ha feituʻu, ʻoku kaka ki ʻolunga ʻa e totongi ʻo e koloá​—kau ai ʻa e meʻakaí mo e nofoʻangá.

• Ko e ngaahi fakatamakí ʻe lava ke ne ʻai ke fakautuutu ʻa e taʻemaʻungāué pe holoki ʻa e vahé.

• Ko e ngaahi fakatamakí ʻe lava ke ne maumauʻi pe fakaʻauha ʻa e ngaahi pisinisi ʻa e kakaí, ngaahi ʻapí pe ngaahi koloa kehé, ʻo fakamasivaʻi ai ʻa e tokolahi.

Meʻa ʻOku Totonu Ke Ke ʻIló

• Ko e lelei ange hoʻo levaʻi hoʻo paʻangá, ko e lelei ange ia hoʻo malava ke fekuki lolotonga ha fakatamaki.

• Ko e maluʻanga fakapaʻangá ʻoku ʻikai ke fakapapauʻi ia ʻe tuʻuloa; ko e paʻanga hū maí, tātānakí, mo e ngaahi koloá ʻe lava ke mole honau mahuʻingá.

• ʻOku ʻi ai ʻa e ngaahi meʻa ʻoku ʻikai ke lava ʻe he paʻangá ʻo fakatau mai, hangē ko e fiefiá mo e fāʻūtaha ʻa e fāmilí.

Meʻa ʻe Lava Ke Ke Fai he Taimi Ní

ʻOku pehē ʻe he Tohi Tapú: “ʻI hono maʻu ha meʻakai mo ha valá, te tau fiemālie pē ʻi he ngaahi meʻá ni.”​—1 Tīmote 6:8.

Ko e hoko ʻo fiemālié ʻoku kau ki ai ʻa hono fakasiʻisiʻi ʻetau holí kae fiemālie pē ʻi hono maʻu ʻetau fiemaʻu fakaʻahó. ʻOku mahuʻinga eni tautefito ʻi he taimi ʻoku uesia ai ʻetau maʻuʻanga moʻuí.

Ke fiemālié, ʻe fiemaʻu nai ke feʻunuʻaki hoʻo founga moʻuí. Kapau ʻokú ke moʻui koe ʻo fakalaka atu ia ʻi he meʻa ʻokú ke maʻú, ko ho tuʻunga fakapaʻangá ʻe ʻalu pē ke toe kovi ange.