ʻAi ke ʻAufuatō ʻi Hoʻo Ngāué
1 ʻI he hoko ko e kau ākonga ʻa Sīsuú, kuo vaheʻi mai kiate kitautolu ke malangaʻi ʻa e ongoongo lelei ʻo kau ki he Puleʻanga ʻo e ʻOtuá mo ngaohi ākonga maʻa Sīsū Kalaisi. (Mt. 24:14; 28:19, 20) ʻOku ʻikai mo ha toe ngāue kehe ʻi māmani ke fakatataua ki hono fakavavevavé pe ko hono mahuʻingá. ʻOku kaunga ki ai ʻa e moʻui ʻa e kakai ʻe laui miliona. ʻOku tuha mo ia ʻetau feinga lelei tahá. ʻOku feʻungamālie ʻa e akonaki ʻa Paula ki he meʻá ni: “Bea iloga aia oku mou fai, fai loto lelei [“ʻaufuatō”, NW], o hage ki he Eiki.” (Kol. 3:23, PM) ʻOku fakamatalaʻi ʻa e “ʻaufuatō” ko e “faivelenga loto-māfana pe anga-līʻoa tāfataha.” ʻOkú ke ʻaufuatō ʻi hoʻo ngāué?
2 Ko e hā ʻa e meʻa ʻoku fiemaʻu ke tau fai ka tau ʻaufuatō? Naʻe lave ʻa Sihova ki he ngāue ʻoku hōifua ki aí ʻo hangē ko e vahe hongofulú. (Mal. 3:10) ʻI he lelei ange ke ʻoua ʻe fakahā ha lahi pau, ʻoku fakatātaaʻi ʻe he vahe hongofulú ʻa e taimi mo e feinga ʻoku tuku taha ʻi hono fai ʻa e ngāue ʻa Sihová ko e fakahāhā ia ʻo ʻetau ʻofa kiate ia pea mo hono fakatokangaʻi ʻo ʻetau fakatapui kiate iá. (wE92 12/1 p. 15) ʻOku totonu ke fakahā ʻe heʻetau ngāué ʻa e loloto ʻo ʻetau anga-līʻoa mo e ʻofa kia Sihová. Ko ha taha ʻoku ʻaufuatō ʻokú ne ongoʻi ʻoku ueʻi ia ke faitauhi kia Sihova ki he kakato taha ʻe malavá ʻo fakatatau ki heʻene moʻui fakasino mo e ngaahi tuʻunga ʻokú ne ʻi aí.
3 Naʻe fakaongoongoleleiʻi ʻe Paula ʻa e kau Kalisitiane naʻa nau “ngāue mālohi mo feinga mālohi” ʻo fakatuʻunga ʻi he ʻamanaki. (1 Tīm. 4:10, NW) ʻOku fakapaleʻi kinautolu ʻaki ʻa e tāpuaki ʻa Sihova, ʻa ia ʻokú ne ‘fakakoloa kinautolu.’ (Pal. 10:22) Ko hono kehe ʻaupitó, ko kinautolu ʻoku nau foaki mamae pe anga-taʻefiefoakí ʻoku ʻikai maʻu ʻe kinautolu ʻa e fiefia ʻoku ō fakataha mo e foaki atú. (Ng. 20:25) Ko e ʻikai ke ʻoatu ʻetau lelei tahá ko hono moʻoní ko e kaihaʻasi ia meia Sihova ʻa e “vahe hogofulu” ʻoku taau ke ne maʻu.—Mal. 3:8, PM.
4 Foaki ʻEtau Lelei Tahá: ʻI heʻetau kau ʻi he ngāue fakamalangá pea tohi ʻetau lipootí, ʻoku hiki totonu ʻa e lipootí? ʻOku pehē ʻe heʻetau tohi ko e Our Ministry, ʻi he peesi 104: “ʻOku kamata hoʻo taimi ngāue fakamalangá ʻi he taimi ʻokú ke kamata ai hoʻo ngāue fakaefakamoʻoní pea ngata ʻi he ʻosi hoʻo ʻaʻahi fakamuimui ʻi he vahaʻa taimi ʻo e ngāue fakaefakamoʻoni taki taha. ʻOku ʻikai ke lau ʻa e taimi ʻe fai ai ha kiʻi fakamāmālohi pe maʻu meʻatokoni lolotonga ʻa e ngāue fakamalangá.” ʻOku fiemaʻu ha teuteu lelei mo ha feinga ke fai ʻa e lelei tahá ke lavaʻi ʻa e lahi taha ʻe malava he lolotonga ʻetau kau ki he ngāue fakamalangá.
5 ʻOku ʻuhinga ʻa e foaki atu ʻo ʻetau lelei tahá ki heʻetau fai ʻa e meʻa lahi taha ʻoku tau malava ʻi he lolotonga ʻetau kau ki he ngāue fakamalangá. Ko ha taha ʻokú ne ʻaufuatō ʻe ʻikai te ne fakangatangata fakakaukauʻi ʻene ngāue fakamalangá ki he ngaahi feinga ʻokú ne fai mei he taimi ki he taimi pē ke fakamoʻoni ʻikai ʻi he founga anga-mahení kae ʻikai ke kau ki he ngāue fale-ki-he-falé. ʻE ʻikai ʻalu ha taha kei talavou ʻaufuatō ko ha tokotaha malanga taʻepapitaiso ki he ngāue fakamalangá koeʻuhi pē ko e vili ʻa ʻene ongo mātuʻá, ʻo fakahāhā ha mahuʻingaʻia siʻisiʻi pē ʻi he ʻalu ki he ngaahi ʻapí pe kau ki he lea atu ki he kakaí.
6 Naʻe naʻinaʻi mai ʻa Paula ke tauhi maʻu ʻetau faʻa ngāué naʻa tau hoko ʻo fakapikopiko. (Hep. 6:11, 12) Ko e meʻa fakafiefia ē ke tau malava ʻo toe vakai ki heʻetau ngāué fakafoʻituitui pea ʻikai ke ʻi ai ha ʻuhinga ke tau mā ai, koeʻuhi he kuo tau ngāue ʻaufuatō! (2 Tim. 2:15) Te tau fiefia lahi tahá ʻi heʻetau sio ki he faʻahinga taautaha naʻa tau tokoniʻí ʻoku nau ʻi he lotolotonga ʻo kinautolu ʻe hao moʻui atu ʻi he mamahi lahí. Ko e moʻoni, ʻoku fakakoloa lahi ʻe Sihova ʻa kinautolu ʻoku faitauhi kiate ia ʻi he ʻaufuatō.