Saishet ra ỹaʼalyiñi naua l-llectel

Lcopague so ntaʼa Nabucodonosor huoʼo so lchoxonaxac ỹoxosaʼa nache ramaxasoxolec ra qaỹoʼot so ltaʼaraic nenaqtac oro. Nache ỹanaña ye nalochiguiñe ʼalhua ye Dura taq laỹonaʼt ʼenauac so shiỹaxauapi ʼamaqtaqaicpi ye país, taqaʼen soua Sadrac, Mesac taq Abednego. So ntaʼa ramaxasoxolec: «Qom choche qauaʼaxaỹa ra qaỹashiyigui aca nasheere, arpapi taq flautapi, nache qauaʼayiiyiñi qome naua qarllectelli neʼena nenaqtac. Qaq ca saishet ra ỹoʼot reʼera nache qaỹasaxaigui aca nqatelaxanaxaqui maye ʼettaigui». ¿Négueʼt ca apetaʼa, soua tres nsoxoppi ỹaʼalyiñi naua l-llectel? ¿Qoʼ ndoteʼec ỹioʼoxoren ñi Jehová?

Nache so ntaʼa ramaxasoxolec ra qaivigui aso inviquepi. ʼEnauac so shiỹaxauapi ỹaʼalyiñi naua l-llectel taq ỹioʼoxoren seʼeso nenaqtac. Qalaxaye soua Sadrac, Mesac taq Abednego saishet ra ỹioʼoxoren. Huoʼo soua ỹaleʼt ỹalletaguilo taq ỹaxateuo so ntaʼa: «ʼEraua tres nsoxoppi israelitapi saishet ra ỹioʼoxoretac ñi aralamaxat nenaqtac». So Nabucodonosor ramaxasoxoneugalo soua nsoxoppi taq ʼenapec: «Nagui ỹoltaxa qamiʼ sanem ra lhuotteʼ ra qanatamñiỹot ñi nenaqtac. Ra saishet ra qauoche reʼera nache qamiʼ qaỹasaxaiguilo aca nqatelaxanaxaqui maye ʼettaigui. Qaica ca lỹa dios ishet ra qamiʼ ncaʼalaxateguesopa aỹem». Soua maye ỹasateguet: «Saishet iuen ra ñeqotaqtapigui reʼera. Ñi qanatamnaxala Dios ishet ra qomiʼ ncaʼalaxateguesop. Qaq naicʼtaxa saishet ra qomiʼ ncaʼalaxateguesop saishet ra shoxorenac ñiʼiñi nenaqtac».

So Nabucodonosor ỹataqta ralemata. ʼEnapega soua ỹalleppi: «¡Iuen ra siete qaỹeguelaxalec ra qaỹalonoigui aca nqatelaxanaxaqui napaqalec ye lcata naxa!». Lcopague ỹamaq soua alleppi: «Iuen ra qaiqoñeraiʼsalo naua nsoxoppi taq qaỹasaxaiguilo añi nqatelaxanaxaqui». Aso nqatelaxanaxaqui ỹataqta ltaʼaraic na leʼeraxa, iviraugalo so alleppi ra ỹavic nache ileu. Soua tres nsoxoppi qaỹasaxaroigui so norec. Lcopague so Nabucodonosor nachaañi ra ỹallaʼa aso nqatelaxanaxaqui taq ilaʼa ra huoʼo soua cuatro shiỹaxauʼ coleetrapoigui. So maye ỹataqta ñiʼi taq inat so lamaxashecpi: «¿Saisheto ra tres soua shiỹaxauʼ som sasaxasoxoreuaʼq? Selaʼa raua cuatro, ¡qaq ra ʼoonolec ʼenaʼam ca ángel!».

So Nabucodonosor yoqtaʼ nquigueuaʼa taq naʼaxannec ra lʼaqtac: «¡Qampaʼaiuec qamiʼ lamaxashec ñi Dios yoqtaʼ ʼeesa!». ʼEnauac ỹaʼalac coʼollaq qailaʼa ra mpauec qaica machaqca soua Sadrac, Mesac taq Abednego. Na loquiaxac qaica ca lliguiñi, na logoxot saishet ra ỹavic taq huoʼotaq huoʼo ca laita na lmalaʼq so norec.

So Nabucodonosor ʼenapec: «¡Ñim Natamnaxala ra Sadrac, Mesac taq Abednego ỹataqta ltaʼaraic ra lañaxac! Namac so lamaxashec ángel yaqtoʼ ncaʼalaxatec. Qaica ca lỹa dios ʼenaʼam ñi maye».

Soua tres israelitapi ỹataqta lhuotteʼ ra saishet ỹalat ñi Jehová, naicʼtaxa ra qalaqaic. ¿Ñaq ʼam auotaique anauochaxaua ñi Dios ʼenaʼam soua maye?