Kumbi Mwayesapu Kulongo po Mungachitiya Sambiru la Bayibolo pa Ulendu Wakwamba?

Asani tapempha ŵanthu kuti tichitengi nawu sambiru la Bayibolo, ŵeneku anyumba anyaki akamba kuti akhumba cha pamwenga kuti ŵe ndi sambiru la Bayibolo kutchalitchi kwawu. Chifukwa chakuti aziŵa cha kuti tisambira Bayibolo mwakupambana ndi visopa vinyaki, yiwu aziŵa so cha kuti angaziŵa vinthu vinandi ndipuso kuti angasaniya likondwa. Mwaviyo, m’malu mwakuŵapempha waka kuti muyambi kusambira nawu, wuli kuti kwa kanyengu kamanavi muŵalongo po tichitiya sambiru la Bayibolo pa ulendu wakwamba? Mwakuyeruzgiyapu: Mungaŵakambiya waka cha ŵanthu kuti mukuziŵa kubika ndipu kuti muzengi ndi chakurya zuŵa linyaki penipo chakurya mwapinga, wuli kuŵapaska nyengu yeniyo kuti achiyesi. Mu Uteŵeti widu wa Ufumu wa January 2006 pa peji 6, pe sachizgu la mo tingachitiya venivi kwakanyengu kamanavi.

Mungakamba kuti: “Kumbi muŵanaŵana kuti lazamuŵapu zuŵa lo mazu yanga ngazamufiskika? [Ŵerengani Yesaya 33:​24, ndipu lindizgani kwamuka.] Ndikhumba ndikulongoni kanthu kanyaki kakukondwesa pa nkhani yeniyi.” Paskani mweneku wa nyumba buku la Kodi Baibulo Limaphunzitsa Chiyani? Julani pa peji 36 ndipu mulongoni ndimi 22. Ŵerengani fumbu laki ndipu mupempheni kuti wasaniyi kwamuka mu ndimi, panyengu yo imwi muŵerenga. Pavuli paki, fumbani so fumbu ndipu vwisiyani vo mweneku wa nyumba wamukengi. Ŵerengiyani nayu limoza lemba linyaki. Pakumaliya, fumbani fumbu lo mwazamumuka pa ulendu wakuweriyaku ndipu musimikizgiyeni kuti mwamuwe so. Kuchita viyo kulongo kuti mwayambapu kuchita sambiru la Bayibolo.