Mo Tingasambiziya Asonu Kupharazga

1. Kumbi munguvwa wuli pa nyengu yakwamba yo munguluta mu uteŵeti?

¹ Kumbi mukumbuka nyengu yakwamba yo munguluta mu uteŵeti wa nyumba ndi nyumba? Nchachiziŵikiyevi kuti mwenga ndi mantha ukongwa. Asani mwapharazganga ndi Musambizi winu pamwenga mpharazgi munyaki, nchambula kukayikisa kuti mungukondwa chifukwa cha chovyu chaki. Chifukwa chakuti sonu ndimwi muteŵeti walusu, mutenere kusambiza asonu kupharazga.

2. Kumbi apharazgi asonu akhumbika kusambiranji?

² Apharazgi asonu akhumbika kusambira mo angayambisiya kukambiskana ndi mweneku wa nyumba, kugwiriskiya nchitu Bayibolo asani afika pakhomu, kuweriyaku ndipuso kuyambisa ndi kuchitisa masambiru nga Bayibolo. Atenere so kusambira kupharazga mu nthowa zakupambanapambana nge, upharazgi wa mumsewu ndipuso mo angakambiskiyana ndi ŵanthu wo ŵe pa malu ngo achitiyapu malonda. Mungaŵawovya kuti aluti panthazi mu vigaŵa venivi mwakuja chakuwoniyapu chamampha ndipuso mwakupereka masachizgu ngakovya.

3. Kumbi tingaŵawovya wuli anyaki mwakuchita vo tisambiza?

³ Muchitengi vo Musambiza: Yesu wangurongo akusambira ŵaki mo angapharazgiya. (Luka 8:1; 1 Pet. 2:21) Asani munozgeke kuchipharazga ndi mpharazgi wasonu, nozgekiyani upharazgi wambura kusuzga wakuti mpharazgi wasonu wangayezge, pamwenga gwiriskiyani nchitu masachizgu ngo ngasanirika mu mabuku ngidu. Asani mwamaliza kunozgeke, yambani ndimwi kupharazga ndipu pharazgani pa khomu limoza pamwenga ngaŵi kuti mpharazgi wasonu wavwi vo imwi mukambengi. Mwechendafiki pakhomu linyaki, mungamufumba kuti wakambi vinthu vakuko mtima vo wawona mu upharazgi winu. Ivi vimuwovyengi kuti wawoni kukhumbika kwa kwende limoza ndi anyidu mu uteŵeti, ndipuso kungaŵa kwambura kusuzga kuzomereza sachizgu lelosi lo mungamupaska asani wamaliza kupharazga.

4. Kumbi tingawovya wuli mpharazgi wasonu pavuli pakuvwisiya upharazgi waki?

⁴ Perekani Masachizgu: Yesu nayu wangupaska akusambira ŵaki masachizgu nga mo angapharazgiya. (Mate. 10:​5-14) Namwi mungawovya mpharazgi wasonu mu nthowa yeniyi. Asani ndi nyengu yaki yakuti wapharazgi, vwisiyani ukongwa. Asani mwatuwapu pa khomu lo wapharazganga, ŵani akufwatuka kumuwonga kutuliya pasi pa mtima, chinanga kuti mungawona vigaŵa vinyaki mu upharazgi waki vo vikhumbika kuti wanozgi. Mwechendamukambiyi sachizgu lo mwenalu, mungasankha kuwona dankha asani waleka kuwereza so pa khomu lachiŵi vo wangunangisa. Vingachitika kuti panyaki wenga waka ndi mantha. Kumbukani so kuti, apharazgi wosi angaŵa ndi lusu lakuyanana cha, ndipu pe nthowa zinandi zo zingaŵa zamampha zakuchitiya chinthu.​—⁠1 Ŵako. 12:​4-7.

5. Kumbi tingakambanji asani tikhumba kwamba ndisi kovya?

⁵ Nyengu zinyaki mpharazgi wasonu wangakupemphani kuti mumuwovyi kweni asani waleka kukupemphani, yambani ndimwi kumuwovya. Kumbi venivi vingachitika wuli mu nthowa yakwenere? Apharazgi anyaki wo akuziŵiriya afumba kuti, “Kumbi ndingakukambiya nthowa inyaki?” Pamwenga, “Kumbi wawuwona wuli upharazgi widu?” Panyaki mungakamba kuti, “panyengu yo ndingwamba kupharazga ndasuzgikanga ku . . . ,” kweni cho chingundiwovya ukongwa chenga, . . . ” Nyengu zinyaki chingaŵa chakovya kuwone limoza buku la Kukambitsirana. Kuti muleki kumuguŵisa perekani masachizgu pa chigaŵa chimoza pe cha upharazgi waki.

6. Pankhani ya uteŵeti, kumbi ‘chisulu chinora wuli chisulu chinyaki’?

⁶ Chisulu Chinora Chisulu: Paulo wanguchiska Timote, yo wenga mpharazgi walusu kuti walutirizgi kuŵikiyapu mtima pakusambiza, kuti waluti panthazi. (1 Timo. 4:​13, 15) Chinanga kuti pajumpha vyaka kutuwa panyengu yakwamba yo munguluta mu uteŵeti, mungalekanga cha kuyesesa kukuzga malusu nginu. Sambirani kutuliya kwa apharazgi anyaki wo mupharazga nawu, chinanga ndi wo ŵe ndi lusu limana mu uteŵeti, ndipu nozgekani kuwovya anyaki mwachanju, ukongwa asonu kuti nawu aje ateŵeti alusu a uthenga wamampha.​—⁠Ntha. 27:17.