‘Khumbu Laku Chiuta Lichitiki’
1. Kumbi mutu wa pulogilamu ya unganu wapade wa chaka cha uteŵeti cha 2012 ngwakuti wuli, ndipu nchifukwa wuli nkhwakukhumbika ukongwa kuti tikakambiskani nkhani yeniyi?
1 Tikulengeka chifukwa cha khumbu laku Yehova. (Chivu. 4:11) Mwaviyo, nkhwakusuzga kuziŵa chilatu cho tijaliya ndi umoyu asani tingaleka kusambira ndi kuchita khumbu laku Chiuta. Kuchita ivi nkhupusu cha, chifukwa tilimbana ndi mijalidu yinyaki yo tikuwa nayu yakuchita “makhumbu nga liŵavu ndi maŵanaŵanu” pamwenga kuchita “khumbiru la ŵa mitundu.” (Ŵaefe. 2:3; 1 Pet. 4:3; 2 Pet. 2:10) Kwambula chovyu chaku Chiuta, tingaja pa ngozi ya “kukoleka amoyu ndi [Diabolo] yo wakhumba kufiska vilatu vaki.” (2 Timo. 2:26, NW ) Pulogilamu ya unganu widu wapade wa chaka cha uteŵeti cha 2012, yitiwovyengi tosi kuti tichitengi vinthu mwakuyana ndi yimoza mwa fundu zitatu za murombu lakuwoniyapu, fundu yakuti, “khumbu linu lichitiki”—Mate. 6:9, 10.
2. Kumbi ndi mafumbu nanga ngo ngamumukika pa unganu uwu?
2 Mafumbu ngo Ngamumukika: Pakuvwisiya pulogilamu ya unganu uwu, kayeseseni kuti mukasaniyi kwamuka kwa mafumbu yanga: Kumbi chinthu chakuzirwa cho chiyanana ndi kuvwa Mazu ngaku Chiuta nchinthu wuli? Kumbi tingachita wuli kuti tilutirizgi kuziŵa vo Chiuta wakhumba kuti tichitengi? Nchifukwa wuli tikhumbika kuja ndi mtima wakukhumbisiska kovya ŵanthu a mitundu yosi? Kumbi tingachita wuli kuti tije ndi umoyu wakukhorweska? Ampupuka kumbi mutenere kumulongonji Yehova? Kumbi tisaniya vitumbiku wuli asani tichita khumbu laku Chiuta? Kumbi nchifukwa wuli kovya anyidu ndi kuŵachiska nkhwakukhumbika ukongwa?
3. Kumbi tingayanduwa wuli ndi unganu wapade uwu?
3 Yesesani kuti mukasanirikepu ndipuso mukavwisiyengi ukongwa unganu wosi. M’bali wakutuwa ku Beteli pamwenga wakuwonere dera pamwenga chigaŵa ndiyu wazamuja mlendu pa unganu uwu. Unganu wechendayambi pamwenga asani wamala, muzifwatukengi kuzikambiskana nayu pamoza ndi muwolu waki asani ngawakuto. Asani mwaziwere ku nyumba, mungazijanga ‘ŵakuvwa ndi kuluwa cha,’ kweni muziweriyengemu ndi kukambiskana fundu zo mwasambira nge banja ndi kuwona mo mungachitiya vinthu mwakukolerana ndi khumbu laku Chiuta nyengu zosi.—Yako. 1:25.
4. Nchifukwa wuli kuchita khumbu laku Chiuta kutenere kuja chinthu chakwamba pa umoyu widu?
4 Pambula kuswera yapa, ŵanthu wosi wo achita makhumbiru ngawu ndi kukana khumbu laku Yehova azamubayika. (1 Yoha. 2:17) Tiwonga ukongwa kuti Yehova watinozge unganu wa pa nyengu yaki uwu wo utiwovyengi kuti kuchita khumbu laku Chiuta kujengi chinthu chakwamba pa umoyu widu!