Mazu Ngaku Chiuta Ngakwanduliska Pakusambiza
1. Kumbi mutu wa unganu wadera wa chaka cha uteŵeti cha 2014 ngwakuti wuli, nanga ndi fumbu nili lo lazamumukika?
1 “Musambizi” widu Mura, Yehova, ndiyu musambizi wamampha ukongwa m’chilengedu chosi. (Yes. 30:20, 21) Kumbi Yehova watitisambiza wuli? Wakutipaska buku lo liluska mabuku nganyaki ngosi. Buku ili ndi Mazu ngaki, Bayibolo. Kumbi vo Chiuta watitisambiza vingatiyanduliska wuli pa umoyu widu kweniso mwauzimu? Fumbu ili lazamumukika pa unganu wadera wa chaka cha uteŵeti cha 2014. Mutu wa unganu uwu ngwakuti, “Mazu Ngaku Chiuta Ngakwanduliska Pakusambiza,” ndipu watuwa pa 2 Timote 3:16.
2. Kumbi ndi fundu kweniso kwamuka kwa mafumbu nanga ko kwakukuwovyani kuti musaniyi fundu zikuluzikulu?
2 Mukavwisisengi Fundu Zikuluzikulu Izi: Kwamuka kwa mafumbu ngo nge m’mphata umu kwakukuwovyani kuti mukasaniyi fundu zikuluzikulu za unganu uwu:
• Kumbi vo Yehova watitisambiza vititiwovya wuli pa umoyu widu? (Yes. 48:17, 18)
• Kumbi titenere kuja ndi chigomezgu wuli asani tikhumba kusintha vinthu vinyaki pa umoyu widu kuti titeŵete Yehova mwakukwana? (Mal. 3:10)
• Kumbi titenere kuchita wuli asani tavwa ‘visambizu vachilendu’? (Ŵah. 13:9)
• Kumbi tingayezga wuli ‘kasambiziru’ kaku Yesu? (Mat. 7:28, 29)
• Nchifukwa wuli wo asambiza mumpingu nawu atenere kujisambiza? (Ŵar. 2:21)
• Kumbi Mazu Ngaku Chiuta ngakwanduliska pa vinthu nivi? (2 Tim. 3:16)
• Kumbi ŵanthu achita wuli ndi ‘kusukunyika’ kwa mitundu? (Hag. 2:6, 7)
• Kumbi Yehova we ndi chigomezgu wuli mwaku isi? (Ŵaef. 5:1)
• Nchifukwa wuli tikhumbika kuchita phamphu kuti tilutirizgi kusambizika ndi Yehova? (Luka 13:24)
3. Nchifukwa wuli titenere kuchisanirika ndi kuchivwisiya unganu wa pa nyengu yaki uwu?
3 Kukwamba kwa 2 Timote chaputala 3, Paulo wechendalembi mazu ngo pagona mutu wa unganu uwu, wangukonkhoska mijalidu yiheni yakulongo mazuŵa ngakumaliya. Iyu wanguti: “Ŵanthu ŵaheni ndi ŵafuzi ŵakalutiriyanga ku uheni, ŵakulandizga ndi ŵakulandizgika.” (2 Tim. 3:13) Kuti isi tileki kulandizgika, tikhumbika kuvwisiya ndi kugwiriskiya nchitu vo Yehova watitisambiza. Mwaviyo, titenere kuyesesa kuchisanirika ndi kuchivwisiya unganu uwu wo wanozgeka pa nyengu yaki.