Mazu Ngaku Chiuta Nganthazi
1. Kumbi mutu wa unganu wapade wa chaka cha uteŵeti cha 2014 ngwakuti wuli?
1 Mwakupambana ndi chinthu chechosi cho ŵanthu ambula kufikapu angapanga, Bayibolo le ndi nthazi yakusintha umoyu widu ndipu lititiwovya kuti tiŵanaŵanengi mwakulingana ndi khumbu laku Yehova. Kumbi Mazu ngaku Chiuta nganthazi nadi? Kumbi tingangagwiriskiya wuli nchitu paumoyu widu? Kumbi tingachita wuli kuti tiwovyi nangu ŵanthu anyaki? Te ndi chigomezgu kuti tamuchiskika ukongwa ndi kwamuka kwa mafumu yanga pa unganu wapade wa chaka cha uteŵeti cha 2014, wa mutu wakuti, “Mazu Ngaku Chiuta Nganthazi,” ndipu watuliya pa Ŵahebere 4:12.
2. Kumbi tikavwisiyengi kuti tikasaniyi kwamuka kwa mafumbu nanga?
2 Mukayesesi Kusaniya Kwamuka kwa Mafumbu Yanga: Panyengu yo mwamuvwisiya unganu mukalembengi kwamuka kwa mafumbu yanga:
• Nchifukwa wuli titenere kugomezga Mazu ngaku Yehova? (Sumu 29:4)
• Kumbi tingachita wuli kuti tije ndi nthazi ya Mazu ngaku Chiuta? (Sumu 34:8)
• Kumbi tingazomerezga wuli kuti nthazi ya Mazu ngaku Chiuta yitiwovyi mu Uteŵeti? (2 Tim. 3:16, 17)
• Kumbi tingachita wuli kuti tileki kunyengeka ndi nthazi ya chinyengu chaku Satana? (1 Yoh. 5:19)
• Ampupuka, kumbi mungachita wuli kuti muteŵete umampha Yehova? (Yer. 17:7)
• Kumbi tingachita wuli kuti tije ndi nthazi chinanga kuti tingakumana ndi masuzgu? (2 Ŵakor. 12:10)
• Kumbi nchinthu wuli cho chingatiwovya kuti tilutirizgi kusintha viziŵirizga ndipuso mijalidu yidu yiheni? (Ŵaef. 4:23)
3. Kusazgiyapu pa kuvwisiya nkhani za unganu wapade uwu, kumbi tamukondwa so ndi vinthu wuli?
3 Tamuyanduwa ukongwa asani tamuvwisiya fundu zakukhumbika izi! Ngemo viliri ndi unganu wadera ndi wachigaŵa, unganu uwu nawu wakutipaska mwaŵi wakucheza kweniso kukondwa ndi abali ndi azichi a mumipingu yinyaki. (Sumu. 133:1-3; 2 Ŵakor. 6:11-13) Mwaviyo, kayeseseni kusaniya nyengu yakucheze ndi mabwezi nginu ngo mukuwona nangu kali ndipuso kasaniyeni mabwezi nganyaki ngasonu. Asani mulendu yo wazamuchitiska unganu wapade uwu ngwakuwonere chigaŵa pamwenga ngwakutuliya ku Beteli, kayeseseni kucheza nayu, pamoza ndi muwolu waki. Tamuyanduwa ukongwa ndi vinthu vakupambanapambana pa unganu wapade uwu!