Vikiliyani Maŵanaŵanu Nginu
1. Kumbi unganu wadera wa chaka cha uteŵeti cha 2013 we ndi mutu wuli, nanga chilatu cha unganu uwu nchakuti wuli?
1 Yesu wangusambiza akusambira ŵaki kuti ayanjengi Yehova ndi mtima wawu wosi, umoyu wawu wosi kweniso chinjeru pamwenga kuti maŵanaŵanu ngawu ngosi. (Mate. 22:37, 38) Maunganu nga chaka chinu nganozgeka kuti ngatiwovyi kuja ndi munthu wamkati wakukho. Mukumbuka kuti unganu wachigaŵa we ndi mutu wakuti “Vikiliyani Mtima Winu!” Unganu wapade wa chaka cha uteŵeti cha 2013 we ndi mutu wakuti “Vikiliyani Njuŵi Yinu.” Unganu wadera wo uyambengi mwezi wamawa we ndi mutu wakuti “Vikiliyani Maŵanaŵanu Nginu,” ndipu watuwa pa lemba la Mateyu 22:37. Unganu uwu wanozgeka kuti uwovyi weyosi pakuyija kusanda maŵanaŵanu ngaki ndi chilatu chakuti ngaje ngakukondweska Yehova.
2. Kumbi tikhumbika kuchivwisisa kwamuka kwa mafumbu nanga pa unganu wadera?
2 Vo Tamusambira: Tichivwisiya unganu tikavwisisengi kwamuka kwa mafumbu yanga ngo ngakonkhoska fundu zikuluzikulu:
• Kumbi tingachita wuli kuti tileki kutole maŵanaŵanu nga ‘ŵanthu’?
• Kumbi tingawovya wuli ŵanthu ambula chivwanu wo aburumutizgika maŵanaŵanu kuti aziŵi uneneska?
• Kumbi titenere kuja ndi maŵanaŵanu nanga?
• Kumbi tiyanduwanji chifukwa cha kulunguruka pa vinthu vakwenere?
• Kumbi tingachita wuli kuti tizomerezgi Yehova kuti wawumbi maŵanaŵanu ngidu?
• Kumbi anthurumi akuto, anthukazi akuyirwa, apapi, ndi ŵana angawovya wuli kuti banja lijengi mwalikondwa?
• Kumbi tinganozgeke wuli zuŵa laku Yehova?
• Kumbi kunozgekereska maŵanaŵanu ngidu pa nchitu kung’anamuwanji?
• Kumbi ŵanthu wo agwiriskiya nchitu vo asambira ayanduwa wuli?
3. Kumbi kuchisanirika pa unganu mazuŵa ngosi ngaŵi, kuchivwisiya, kweniso kugwiriskiya nchitu vo tamusambira nkhwakukhumbika chifukwa wuli?
3 Satana wakhumbisiska kunanga maŵanaŵanu ngidu. (2 Ŵako. 11:3) Mwaviyo, titenere kwesesa kuŵanaŵana vinthu vo vikondweska Yehova. Nyengu zosi tikhumbika kuja ndi maŵanaŵanu ngaku Khristu, ndipuso kukanisiska kulongozgeka ndi charu chiheni ichi. (1 Ŵako. 2:16) Mwaviyo yesesani kuti muzisanirikepu mazuŵa ngosi ngaŵi nga unganu wadera. Mukavwisisengi. Kugwiriskiya nchitu fundu zo zamukambika, kwazakutiwovya kuti tinozgekereski maŵanaŵanu ngidu pakuchita uteŵeti wa Ufumu mwaphamphu.—1 Pet. 1:13.