Nozgekiyani Kuzisaziyaku Uteŵeti Winu
1. Kumbi tija ndi mwaŵi wapade nuwu mu nyengu ya Chikumbusku, nanga isi tingayinozgeke wuli nyengu yeniyi?
1 Chaka chechosi, nyengu ya Chikumbusku yititipaska mwaŵi ‘wakukambuliya viwongu kwaku Yehova.’ (Sumu 109:30) Kumbi mwazamusaziyaku uteŵeti winu mu March, nge nthowa yimoza yakulongole kuti muwonga Chiuta yo wakupereka sembi ya uwombozi? Yambani kunozgeke kweche sonu.—Ntha. 21:5.
2. Kumbi ŵanthu anyaki kweniso imwi munguchita wuli mwati mwavwa kuti pe mwaŵi wakuchita upayiniya wakovya wa maora ngakusikiyaku mu mwezi wa April?
2 Upayiniya Wakovya: Chaka chamala mipingu yingukondwa ukongwa kuvwa kuti pe mwaŵi wakuti munthu wangachita upayiniya wakovya kwa maora ngakusikiyaku mu mwezi wa April. M’bali munyaki wangulemba kuti: “Ndeche ku sukulu ya sekondale, ndipu nditiwusaniya cha mwaŵi wakuti ndichiti upayiniya wa nyengu zosi. Kweni ndilembesengi upayiniya wa maora 30 ndipu ndiyesesengi kupereka maora 50 mu mwezi wa April.” Muzichi munyaki yo wagwira nchitu wangulemba kuti: “Maora 30, ngambula kusuzga kukwanisa!” Mwaŵi uwu wati wapharazgika waka, mzichi munyaki wa vyaka 80, yo kali wenga mpayiniya wangukamba kuti: “Iyi ndiyu nyengu yo ndakhazanga! Yehova waziŵanga kuti nyengu yo ndachitanga upayiniya ndakondwanga ukongwa pa umoyu wangu.” Wo angutondeka kuchita upayiniya wakovya, angujiŵikiya vilatu vakuti asazgiyeku uteŵeti wawu.
3. Kumbi ndi vifukwa nivi vo vingatichitiska kuti tizilembesi upayiniya wakovya mu March, April ndi May?
3 Mwezi wa March uŵengi wamampha ukongwa chifukwa chakuti tapaskika so mwaŵi wakuchita upayiniya wakovya kwa maora 30 pamwenga 50. Kweniso, kwambiya pa 17 March, pazuŵa la Chisulu, tazamugwira nchitu yapade yakudaniya ŵanthu ku Chikumbusku cho chazamuchitika pa April 5. Ŵanthu anandi azamukondwa ukongwa chifukwa chakusazgiyaku uteŵeti wawu ndipu akhoza kuzichita upayiniya wakovya kwa maora 50 mu April ndi May.
4. Kumbi tingasazgiyaku wuli uteŵeti widu, nanga kuchita viyo kwazamuja ndi vakutuwapu wuli?
4 Sabata yamawa pa Kusopa kwa Pabanja, mungachita umampha ukongwa kuchikambiskana mo weyosi mu banja linu wangazisazgiyaku uteŵeti mu nyengu ya Chikumbusku. (Ntha. 15:22) Rombani kwaku Yehova kuti watumbiki phamphu linu. (1 Yoha. 3:22) Kuchita vinandi mu uteŵeti kwazakukuwovyani kuti mutumbiki Yehova kweniso kuti muzije ndi likondwa likulu.—2 Ŵako. 9:6.