Masachizgu nga vo Mungakamba

Pakwambisa Masambiru nga Bayibolo pa Chisulu Chakwamba mu April

“Ubatizu uchitika ndi ŵanthu anandi achikhristu. Kumbi imwi muwona kuti ubatizu ngwazirwa? [Lindizgani kwamuka.] Magazini iyi yikonkhoska fundu zamampha ukongwa.” Apaskeni Nsanja ya Olonda ya April 1 ndipu kambiskanani nkhani yo ye pa kamutu kakwamba pa peji 16, kweniso lemba limoza pa malemba ngo ngalipu. Agaŵiyeni magazini ndipu panganani zuŵa lakuti muziweriyeku kuzikambiskana fumbu lachiŵi.

Nsanja ya Olonda April 1

“Pe vinthu vinandi vo ŵanthu akamba vakukwaskana ndi Yesu. Anyaki aŵanaŵana kuti wenga Mesiya wakulayizgika. Anyaki aŵanaŵana kuti wenga waka munthu wamampha. Ndipuso anyaki weche kugomezga kuti kwengavi Yesu. Imwi muwona wuli? [Lindizgani kwamuka.] Malinga ndi vo Bayibolo likamba, kuziŵa uneneska wakukwaskana ndi iyu nkhwakukhumbika ukongwa. [Ŵerengani Yohane 17:⁠3.] Magazini iyi yilongo vo Bayibolo limuka pa mafumbu ngo ŵanthu nganandi afumba ngakukwaskana ndi Yesu.”

Galamukani! April

“Tikambiskana ndi mabanja nganandi m’chigaŵa chinu. Kumbi namwi muzomerezga kuti mabanja ngakumana ndi masuzgu nganandi ukongwa mazuŵa nganu? [Lindizgani kwamuka.] Wonani ko mabanja nganandi ngasaniya ulongozgi wamampha ukongwa. [Ŵerengani Sumu 119:105.] Magazini iyi yikonkhoska mo mabanja ngamsaniyapu ngachitiya kuti ngamalani umampha ndi masuzgu ngakulungakulu ngo ngakumana nangu mwakulondo fundu za m’Bayibolo.”