Mo Tingagwiriskiya Nchitu Kabuku Kakuti Kumbi Mbayani Wo Achita Khumbu Laku Chiuta Mazuŵa Nganu?
Kabuku Kasonu ko Kakunozgeka Kuti Kawovyi Ŵanthu Kuziŵa Gulu Laku Chiuta
1. Kumbi kabuku ka Khumbu Laku Chiuta kakulembeke vilatu vitatu nivi?
1 Kumbi mwayambapu kugwiriskiya nchitu kabuku kakuti, Kumbi Mbayani Wo Achita Khumbu Laku Chiuta Mazuŵa Nganu? Kabuku yaka kakulembeke kuti (1) ŵanthu wo tisambira nawu Bayibolo atiziŵi umampha nge Akaboni aku Yehova, (2) aziŵi vo tichita, ndipu (3) aziŵi mo gulu lidu ligwiriya nchitu. Kabuku ka, Khumbu Laku Chiuta, ke ndi sambiru limoza pa peji lelosi ndipu mukhoza kukambiskana ndi munthu kwa maminiti 5 pamwenga 10 pavuli pa sambiru la Bayibolo.
2. Konkhoskani mo kabuku yaka kakulembeke ndi vinthu vo vilimu
2 Mo Kakulembeke: Kabuku yaka ke ndi vigaŵa vitatu ndipu chigaŵa chechosi pakuchija chikonkhoska vakukwaskana ndi gulu laku Yehova nge mo tasambiriya mu ndimi yakwamba. Mitu yosi 28 ya m’kabuku yaka yikulembeka nge fumbu ndipu mitu yimanayimana yo yikulembeka mu malembu ngafipa ndiyu yimuka fumbu lo. Ke ndi vithuzi vakutuliya mu vyaru vakujumpha 50 vo vilongo nchitu yo yichitika pacharu. Mitu yinandi ye ndi mabokosi nga mutu wakuti: “Kuti Muziŵi Vinandi,” ngo nge ndi masachizgu ngo ngangachiska munthu yo musambira nayu Bayibolo.
3. Kumbi tingakagwiriskiya wuli nchitu kabuku ka Khumbu Laku Chiuta?
3 Mo Mungakagwiriskiya Nchitu: Chakwamba, alongoni mutu pavuli paki muŵerenge limoza sambiru lo ndi kukonkhoska timitu timanatimana to talembeka mu malembu ngafipa. Pakumaliya kambiskanani nawu mafumbu ngakuweriyamu ngo nge mumphata mwa peji. Mungasankha kukambiskana asani mwaŵerenga sambiru losi pamwenga kukambiskana ndimi yimoza yimoza. Musankhengi mwija lemba lo mungaŵerenga. Kweni mungaluwanga cha kukonkhoska vithuzi ndi mabokosi ngakuti “Kuti Muziŵi Vinandi.” Mungachita umampha kukambiskana masambiru yanga m’ndondomeku yaki. Mukhoza kujumphiya asani mwawona kuti pe sambiru linyaki lo lingamuwovya ukongwa munthu yo musambira nayu. Mwakuyeruzgiyapu, mungaluta pa mutu 11 asani mutimudaniya ku unganu wachigaŵa, wadera pamwenga wapade.
4. Nchifukwa wuli te akukondwa kuja ndi kabuku kasonu yaka?
4 Asani tisambira Bayibolo ndi munthu, titimuwovya kuti waŵaziŵi umampha Awuskefwi akuchanya. Kweni titenere so kumusambiza vakukwaskana ndi gulu laku Yehova. (Nthanthi 6:20) Te akukondwa ukongwa kuja ndi kabuku kasonu yaka ko kangatiwovya kuti tilongozge ŵanthu ku gulu laku Yehova.