Mo Tingagwiriskiya Ntchitu Kabuku ka Uthenga Wamampha pa Kusambiza
1. Kumbi kabuku ka Uthenga Wamampha kakulembeka wuli?
1 Nge mo Uteŵeti wa Ufumu wa July ungukambiya, kabuku ka Uthenga Wamampha Wakutuliya Kwaku Chiuta nkhamampha ukongwa kusambiziya ŵanthu. Malemba nga m’kabuku yaka ngakukoleka mazu cha kuti ŵanthu aŵerengengi ŵija kutuliya m’Bayibolu. Mabuku ngidu nganandi ngo tisambiziya ŵanthu ngakulembeka munthowa yakuti munthu wangasambira pakuyija. Kweni kabuku yaka kakulembeka munthowa yakuti munthu wangakavwisa cha pakuyija. Mwaviyo, asani tigaŵiya kabuku ka Uthenga Wamampha, tiyesesengi kuŵalongo mo tisambiriya ndi ŵanthu kuti awoni kuti uthenga wa m’Bayibolu ngwakukondwesa.—Mat. 13:44.
2. Kumbi tingagwiriskiya wuli ntchitu kabuku ka Uthenga Wamampha pa ulendu wakwamba?
2 Pa Ulendu Wakwamba: Mungakamba kuti: “Ŵanthu anandi afipa mtima ndi vinthu vo vichitika m’charu. Kumbi muŵanaŵana kuti vinthu vijengi umampha? [Lindizgani kwamuka.] M’Bayibolu mwe uthenga wamampha wo utitipasa chilindizga. Wonani vo Bayibolu likamba.” Mpaseni kabuku mweneku wa nyumba, ndipu mulongoni peji lakumaliya kuti wasankhepu fumbu. Sambirani nayu ndimi yakwamba ya sambiru lo wasankha kuti mumulongo mo tisambiriya ndi ŵanthu. Nyengu zinyaki mungafumba fumbu kutuliya pa sambiru lo imwi mwasankha, ndipu mulongoni mo kabuku yaka kangamuwovye kuti wasaniyi kwamuka m’Bayibolu. Apharazgi anyaki atimulongo kavidiyo ka sambiru lo akambiskana asani kalipu pa jw.org.
3. Konkhoskani mo mungagwiriskiya ntchitu kabuku ka Uthenga Wamampha asani muchitisa sambiru la Bayibolu.
3 Mo Tingachitiskiya Sambiru: (1) Ŵerengani fumbu lo le ndi vilembu vifipa ukongwa kuti wakusambira waziŵi fundu yikulu. (2) Ŵerengani ndimi yo ye pasi pa fumbu. (3) Ŵerengani malemba ngo nge ndi vilembu vakugoneka. Pavuli paki, mufumbeni mafumbu mwazeru kuti wawoni mo malemba ngamukiya fumbu lo mwamufumba pakwamba. (4) Asani pe ndimi zinyaki, mungachita so vo valembeka mu fundu 2 ndi 3. Asani kavidiyo ko mwenaku kakoliyana ndi fumbu lo mukambiskana ndipu mwechendamulongo mweneku wa nyumba, mungachita umampha kumulongo pa nyengu yeniyi. (5) Pakumaliya, mufumbeni so fumbu lo mwafumba pakwamba kuti muziŵi asani wavwisa nadi.
4. Kumbi nchinthu wuli cho chingatiwovya kuti tigwiriskiyengi ntchitu umampha kabuku ka Uthenga Wamampha?
4 Kaziŵeni umampha kabuku ka Uthenga Wamampha kuti mukagwiriskiyengi ntchitu nyengu yeyosi. Mwechendaluti kuchisambira ndi munthu, muŵanaŵaniyengi dankha fundu zamampha zo mungachikambisana nayu mwakugwiriskiya ntchitu malemba ngo nge mu sambiru lo mwamukambiskana nayu. (Nthanthi 15:28; Mac. 17:2, 3) Asani mwakaziŵiliya kabuku yaka, muwonengi kuti nkhamampha ukongwa kusambiziya ŵanthu uneneska.