Mo Tingayambiya Kukambiskana ndi Ŵanthu Mwakugwiriskiya Ntchitu Timapepala

Kwambiya mu January 2018, Kabuku ka Unganu wa Umoyu Widu Wachikhristu Ndipuso Uteŵeti kaja ndi masachizgu nga mo tingakambiskiyana ndi ŵanthu papeji lakwamba. Kutuliya nyengu yeniyi, tachiskika kuti tiŵikengi ukongwa mtima pakukambiskana ndi ŵanthu mumalu mwakuŵagaŵiya waka mabuku. Kweniso mavidiyo nga mo tingakambiskiyana ndi ŵanthu ngaŵawovya ukongwa apharazgi kuti aziŵi nthowa zakupambanapambana zo angayambiya kukambiskana ndi munthu mwakugwiriskiya ntchitu Bayibolu pe. Kumbi venivi ving’anamuwa kuti tingagwiriskiyanga ntchitu mabuku cha asani tipharazga nyumba ndi nyumba? Awa. Mwakuyeruzgiyapu, timapepala tingawovya ukongwa kuti tiyambi kukambiskana ndi ŵanthu. Asani tigwiriskiya ntchitu timapepala, tingagwiriskiya ntchitu nthowa iyi:

1. Mufumbeni fumbu la papeji lakwamba kuti wasankhepu yija kwamuka.

2. Mulongoni vo Bayibolu limuka pa lemba lo le pachanya papeji lachiŵi. Asani munthu yo we ndi nyengu, mungaŵerenga ndi kukambiskana nayu fundu zinyaki mukapepala ko.

3. Musiliyeni kapepala, ndipu muchiskengi kuti wakaŵerengi kosi.

4. Mwechendasiyani nayu, mulongoni fumbu la pachigaŵa chakuti “Ŵanaŵaniyani Fundu Iyi,” ndipu panganani nayu kuti muzi so kuti muzikambiskani vo Bayibolu limuka.

Asani mwaweliyaku, kambiskanani nayu vo Bayibolu limuka ndipu musiliyeni so fumbu linyaki kuti muzikambiskani ulendu unyaki. Mungasankha fumbu lelosi pa webusayiti yidu pamwenga mubuku lo lalongoleka papeji lakumaliya la kapepala ko. Asani muwona kuti mphakwenere, mungamukonkhoske za kabuku ka Uthenga Wamampha Wakutuliya Kwaku Chiuta pamwenga buku linyaki lelosi lakusambiriya la pamundandanda wa Vidya Vakusambiziya.