Kumbi Mungasaniya Wuli Chimangu Kweniso Likondwa Asani Mufipa Mtima?

KUFIPA mtima tingakuyeruzgiya ndi katundu muzitu yo we mumtima mwidu. (Nthanthi 12:25) Kumbi mukusuzgikapu pa umoyu winu chifukwa cha kufipa mtima? Kumbi nyengu zinyaki muwona kuti mungakunthiyapu cha venivi? Asani ve viyo, mwe mwija cha. Tanandi aku isi, titamiza abali ŵidu, mubali widu wakutayika, tikumana ndi masoka nga chilengedu pamwenga vinthu vinyaki vo vititideluwa nthazi kweniso kutifipiska mtima. Kweni kumbi ntchinthu wuli cho chingatiwovya kuti tikunthiyengepu asani tifipa mtima?a

Tingasambira vinandi pa nkhani ya mo tingakunthiyapu asani tifipa mtima, mwakuŵanaŵaniya chakuwoniyapu cha Fumu Davidi. Iyu wangukumana ndi masuzgu nganandi pa umoyu waki ndipu nyengu zinyaki umoyu waki waŵanga pangozi. (1 Samu. 17:34, 35; 18:10, 11) Kumbi ntchinthu wuli cho chinguwovya Davidi kuti wakunthiyengepu asani wafipa mtima? Kumbi tingamuyezga wuli?

KUMBI NTCHINTHU WULI CHO CHINGUWOVYA DAVIDI KUKUNTHIYAPU ASANI WAFIPA MTIMA?

Davidi wangukumana ndi masuzgu nganandi pa nyengu yimoza. Mwakuyeruzgiyapu, ŵanaŵaniyani vo vinguchitika pa nyengu yo wathaŵanga Fumu Sauli yo yakhumbanga kumubaya. Pa nyengu yo Davidi ndi anthulumi ŵaki awenga ku nkhondu, anguguŵa ukongwa kuwona kuti arwani aba katundu wawu, awotcha mahema ngawu, kweniso mabanja ngawu ngakoleka ukapolu. Kumbi Davidi wanguchita wuli? “Davidi ndi anthulumi wo wenga nawu angwamba kuliya mwa kudaniriza mpaka nthazi zakuti aliriyi zingumala.” Iyu wangufipa so mtima ukongwa chifukwa ŵanthu “akambanga kuti amuponyi mya.” (1 Samu. 30:1-6) Yapa sonu Davidi wangukumana ndi masuzgu ngatatu ngakulungakulu pa nyengu yimoza: Umoyu wa banja laki wenga pangozi, wawopanga kuti anthulumi ŵaki amubayengi, ndipuso Fumu Sauli yenga yeche kumusaka. Mwaviyo, Davidi watenere kuti wafipanga mtima ukongwa!

Kumbi Davidi wanguchita wuli? Nyengu yeniyo iyu “wangusaniya nthazi mwaku Yehova Chiuta waki.” Kumbi wanguchita wuli venivi? Davidi wayanjanga kupemphera kwaku Yehova kuti wamuwovyi kweniso kuŵanaŵaniyapu mo wangumuwovyiyapu kuvuli. (1 Samu. 17:37; Salimo 18:2, 6) Davidi wanguziŵa kuti wakhumbikanga kufumba Yehova vakuti wachiti, mwaviyo, wangufumba Yehova. Yehova wati wakambiya Davidi vakuti wachiti, nyengu yeniyo wanguchitapu kanthu. Mwaviyo, iyu ndi ŵanthu ŵaki angutumbikika ndi Yehova ndipu angutaska mabanja ngawu kweniso katundu wawu. (1 Samu. 30:7-9, 18, 19) Kumbi mwaviwona vinthu vitatu vo Davidi wanguchita? Iyu wangupemphera kwaku Yehova kuti wamuwovyi, wanguŵanaŵaniya mo Yehova wangumuwovyiyapu kuvuli kweniso wanguvwiya ulongozgi wo Yehova wangumukambiya. Kumbi tingamuyezga wuli Davidi? Tiyeni tiwoni nthowa zitatu.

MUYEZGENGI DAVIDI ASANI MUFIPA MTIMA

1. Mupempherengi. Nyengu yeyosi asani tayamba kufipa mtima, tingapemphera kwaku Yehova kuti watiwovyi kweniso kutipaska zeru. Pempheru lingatiwovya kuvwaku umampha asani tamukambiya vosi vo vititifipiska mtima. Pamwenga tingapemphera mwakudumuwa kweniso mumtima asani ndivu tingafiska kuchita pa nyengu yo. Nyengu yeyosi yo tipempha Yehova kuti watiwovyi, tilongo kuti titimuthemba nge mo wanguchitiya Davidi, yo wangukamba kuti: “Yehova ndi jalawi langu, malu ngangu ngakuvikilirika kweniso Iyu ndiyu watinditaska. Chiuta wangu ndi jalawi langu, ini ndibisama mwaku iyu.” (Salimo 18:2) Kumbi pempheru litovya nadi? Mpayiniya munyaki zina laki Kahlia wanguti: “Asani ndapemphera ndija ndi chimangu. Pempheru litindiwovya kuti ndiŵanaŵanengi nge mo Yehova waŵanaŵaniya kweniso kuti ndimuthembengi ukongwa.” Kukamba uneneska, pempheru ntchidya chanthazi chakutuliya kwaku Yehova cho chititiwovya kuti tikunthiyengepu asani tifipa mtima.

2. Muŵanaŵaniyengi mo Yehova wangukuwovyiyanipu kuvuli. Asani mukumbuka vo vingukuchitikiyanipu kuvuli, kumbi mungaŵanaŵaniya masuzgu ngo mungufiska kukunthiyapu chifukwa chakuti Yehova ndiyu wangukuwovyani? Asani tiŵanaŵaniya mo Yehova watiwovyiyapu, kweniso mo wanguwovye ateŵeti ŵaki a mu nyengu yakali, tingaja ndi chimangu chikulu kweniso tingamuthemba ukongwa Yehova. (Salimo 18:17-19) Mura munyaki zina laki Joshua wanguti: “Nde ndi mundandanda wa mapempheru nganandi ngo Yehova wangundimuka. Venivi vandiwovya kuti ndikumbukengi nyengu zo ndingupempha Yehova vinthu chayivu ndipu wangundipaska vo ndakhumbanga.” Kukamba uneneska, asani tiŵanaŵaniya vo Yehova watichitiyapu, tisaniya nthazi zo zitovya kuti tilutirizgi kukunthiyapu asani tifipa mtima.

3. Muvwiyengi ulongozgi waku Yehova. Techendasankhi vo tikhumba kuchita asani takumana ndi suzgu yinyaki, tikhumbika dankha kufufuza mu Mazu ngaku Chiuta kuti tisaniyi ulongozgi wakuthembeka ukongwa. (Salimo 19:7, 11) Anandi asaniya kuti asani afufuza lemba linyaki, avwisa umampha ukongwa mo vesi lo angaligwiriskiya ntchitu pa umoyu wawu. Mura munyaki zina laki Jarrod wanguti: “Kufufuza kutindiwovya kuti ndisambiri vinandi vakukwaskana ndi vesi lo ndipuso kuvwisa vo Yehova watindikambiya. Venivi vitindiwovya kuti ndigomezgengi ukongwa vo ndaŵerenga ndi chilatu chakuti ndigwiriskiyi ntchitu ulongozgi waki.” Asani tifufuza ulongozgi waku Yehova mu Malemba, kweniso kuwugwiriskiya ntchitu, vititisuzga cha kukunthiyapu asani tifipa mtima.

YEHOVA WAKUWOVYENINGI KUKUNTHIYAPU

Davidi waziŵanga kuti wakhumbikanga chovyu chaku Yehova kuti wakunthiyepu asani wafipa mtima. Iyu wawonganga ukongwa chovyu cho Yehova wamupaskanga mwakuti wangukamba kuti: “Ndi nthazi zaku Chiuta, ndingakwera mpanda. Chiuta wauneneska ndiyu watindivwalika nthazi.” (Salimo 18:29, 32) Panyaki tingawona kuti masuzgu ngidu ngenge mpanda wakusuzga wo tingafiska cha kukwera. Kweni ndi chovyu chaku Yehova, tingafiska kukunthiyapu mayeseru ngengosi ngo ngenge mpanda! Kukamba uneneska, asani tipemphera kwaku Yehova kuti watiwovyi, tiŵanaŵaniya vosi vo Yehova watichitiyapu kweniso tigwiriskiya ntchitu ulongozgi waki, tingasimikiza kuti watipaskengi nthazi ndipuso zeru, vo tikhumbikiya kuti tikunthiyepu asani tifipa mtima!