1 | Pempheru—‘Muponyiyeni Chiuta Vosi vo Vitikufipiskani Mtima’

BAYIBOLU LIKAMBA KUTI: “Muchiponya paku [Chiuta] vosi vo vitikufipiskani mtima, chifukwa iyu watikuŵanaŵaniyani.”—1 PETURO 5:7.

Kumbi Lemba Ili Ling’anamuwanji?

Yehova Chiuta watitikambiya kuti timukambiyengi chechosi cho chititifipiska mtima kweniso kutisuzga maŵanaŵanu. (Salimo 55:22) Suzgu yeyosi kwali njikulu pamwenga njimana titenere kumukambiya Yehova. Asani suzgu lo ndakukhumbika kwaku isi, mbwenu ndakukhumbika so kwaku Yehova. Kupemphera kwaku Yehova kungatiwovya kuti tisaniyi chimangu cha mumtima.—Afilipi 4:6, 7.

Mo Venivi Vingatiwovye

Asani titama matenda ngakusuzgika maŵanaŵanu, tingajivwa nge kuti te tija. Ŵanthu anyaki angavwisa cha vo vititichitikiya. (Nthanthi 14:10) Kweni asani titimukambiya Chiuta kutuliya pasi pa mtima mo tivwiya, tiziŵa kuti iyu watitivwisa kweniso watitichitiya lisungu. Yehova watitiwona, waziŵa mo vititiŵaŵiya mumtima kweniso masuzgu ngo tikumana nangu ndipu wakhumba kuti timukambiyengi chechosi cho chititifipiska mtima.—2 Mbiri 6:29, 30.

Kupemphera kwaku Yehova kutitiwovya kuti tigomezgengi ukongwa kuti watitiŵanaŵaniya. Nasi tingavwa nge wa masalimo yo wangupemphera kuti: “Yimwi mwawona kusuzgika kwangu; ndipuso muziŵa umampha mo ndisuzgikiya maŵanaŵanu.” (Salimo 31:7) Kuziŵa ŵaka kuti Yehova wawona masuzgu ngo tikumana nangu kungatiwovya kuti tilutirizgi kukunthiyapu masuzgu ngidu. Kweni iyu wachita vinandi kuluska ŵaka kuwona masuzgu ngidu. Kuluska munthu weyosi, iyu wavwisa umampha masuzgu ngidu ndipu watitipembuzga kweniso kutichiska kuziya mu Bayibolu.

Mo Bayibolu Litovye Julian

Mo Ndisuzgikiya Chifukwa cha Kufipa Mtima

“Ndifipa mtima kweniso nde ndi matenda nga muwongu nga obsessive-compulsive disorder (OCD) ngo ngachitiska kuti ndiwerezengiwerezengi ŵaka kuchita vinthu. Nyengu zinyaki vichitika ŵaka kuti ndayamba kufipa mtima. Vichitika kuti ndenga umampha ŵaka mbwenu kwambula kuziŵika umampha ndayamba kufipa mtima ukongwa. Ndipu ndifipa mtima, ukongwa asani nde pagulu la ŵanthu. Ndisuzgika ukongwa maŵanaŵanu kuti atindiwona wuli.

“Anyangu wo aziŵa kuti nde ndi suzgu ya kufipa mtima atindiwovya ukongwa. Nyengu zinyaki akamba vinthu vakuti vingandiwovya cha. Kweni ndiwonga ukongwa kuti atesesa kundiwovya.

“Nyengu zinyaki nditondeka kupemphera chifukwa cha kufipa mtima kweniso matenda ngo ngachitiska kuti ndiwerezengiwerezengi ŵaka kuchita vinthu (OCD). Ndikhumbika kuyesesa kunozgekeresa maŵanaŵanu ngangu kuti ndipempheri kwaku Yehova. Ndiŵanaŵana vinthu vinandi pa nyengu yimoza mwakuti kanandi nditimbanyizgika ukongwa. Asani mutu wangu wama, vitindisuzga kumukambiya Yehova vo ndiŵanaŵana kweniso mo ndivwiya mumtima.”

Mo Bayibolu Landiwovye

“Mu Bayibolu ndasambira kuti mapempheru ngidu ngatenere cha kuja ngatali pe pamwenga kuperekeka mwalusu kuti ngaje ngakuzomerezeka kwaku Chiuta. Nyengu zinyaki asani nditondeka kukonkhoska mo ndiviwiya mumtima ndipemphera ŵaka kuti: ‘Yehova chondi ndiwovyeni.’ Chinanga mpha nyengu yo ndapemphera viyo, ndiziŵa kuti Yehova watinBodivwisa kweniso watindipaska vo ndikhumbika pa nyengu yo. Kusazgiyapu pa pempheru, ndilonde chovyu cha kuchipatala. Chifukwa cha vinthu viŵi venivi, suzgu langu lamalaku. Chinanga kuti ndikhumbika kuchita phamphu kuti ndipempheri kwa Ada akuchanya, ndipemphera mbwenu chifukwa ndikayika cha kuti atindiyanja ndipu akhumbisiska kundiwovya.”