2 | “Kupembuzgika ndi Malemba”

BAYIBOLU LIKAMBA KUTI: “Pakuti vinthu vo vikulembeka kali, vikulembeke kuti vitisambizi, ndi chilatu chakuti tije ndi chilindizga chifukwa cha kukunthiyapu ndipuso kupembuzgika ndi Malemba.”—AROMA 15:4.

Kumbi Lemba Ili Ling’anamuwanji?

Bayibolu le ndi fundu zo zingatiwovya asani tiŵanaŵana mu nthowa yambula kwenere. Bayibolu lititilayizga kuti pambula kuswera yapa tazamusuzgika maŵanaŵanu so cha.

Mo Venivi Vingawovye

Tosi tiguŵa nyengu zinyaki, kweni ŵanthu wo atama matenda ngakusuzgika maŵanaŵanu pamwenga kufipa mtima, aguŵa kweniso vitiŵaŵaŵa kwa nyengu yitali. Kumbi Bayibolu lingawovya wuli?

Bayibolu le ndi fundu zakovya zo zingasere mumalu mwa maŵanaŵanu ngaheni. (Afilipi 4:8) Fundu zenizi zingatipembuzga kuti tileki kusuzgika ukongwa maŵanaŵanu.—Salimo 94:18, 19.
Bayibolu lingatiwovya kuti tileki kuja ndi maŵanaŵanu ngakuti te ambula kukhumbika.—Luka 12:6, 7.
Mavesi nganandi nga mu Bayibolu ngatitisimikiziya kuti te tija cha kweniso kuti Chiuta Mlengi widu wavwisa mo tivwiya.—Salimo 34:18; 1 Yohane 3:19, 20.
Bayibolu lilayizga kuti Chiuta wazamuchitiska kuti tizileki kukumbuka vinthu viheni vo vititisuzga maŵanaŵanu. (Yesaya 65:17; Chivumbuzi 21:4) Asani titama matenda ngakusuzgika maŵanaŵanu, layizgu lenili lititipaska nthazi zakuti tilutirizgi kukunthiyapu.

Mo Bayibolu Litovye Jessica

Mo Ndisuzgikiya Chifukwa cha Matenda Ngakusuzgika Maŵanaŵanu

“Pa nyengu yo ndenga ndi vyaka 25, angundisaniya ndi matenda ngakusuzgika maŵanaŵanu. Ndasuzgikanga maŵanaŵanu chifukwa chakukumbuka vinthu viheni vo vingundichitikiya kuvuli. Madokotala ngangundiwovya kuvwisa kuti ndisuzgika ukongwa maŵanaŵanu chifukwa chakukumbuka vinthu vakupweteka vo vingundichitikiya pa umoyu wangu. Kusazgiyapu pa chovyu cha munkhwala chakwenere, ndakhumbikanga so dokotala kuti wandiwovyi kuziŵa vo ndingachita kuti ndilekengi kuja ndi maŵanaŵanu ngaheni.”

Mo Bayibolu Landiwovye

“Asani ndasuzgika ukongwa maŵanaŵanu, ndachitanga mantha, ndafipanga mtima ukongwa kweniso ndasoŵanga tulu. Kanandi ndi usiku ndasuzgikanga maŵanaŵanu mwakuti ndasoŵanga chakuchita. Pa lemba la Salimo 94:19 pe fundu yakuti, Chiuta wangatipembuzga kweniso kutisisipuwa asani tisuzgika maŵanaŵanu. Mwaviyo, pafupi ndi bedi langu pajanga Bayibolu kweniso notibuku yo ndingulembamu malemba ngakuchiska. Asani tulu tamira, ndaŵerenganga mavesi nganyaki nga mu Bayibolu, ndipu venivi vandipembuzganga.

“Bayibolu lititichiska kuti tigadabuwengi maŵanaŵanu ngo ngasuskana ndi fundu za mu Malemba. Kali ndajiwonanga kuti nde wambula kukhumbika kweniso wambula kwanjika. Kweni ndaziŵa kuti maŵanaŵanu ngenanga ngasuskana ndi vo Bayibolu likamba kuti Chiuta Mbada achanju wo aŵanaŵaniya munthu weyosi pakuyija. Kamana ndi kamana ndinguleka kwende vo maŵanaŵanu ngangu nganditumanga. Ndasambira kuti ndijiwonengi nge mo Chiuta wanditiwone. Venivi vandiwovya kuti ndileki kujiwona mwambula kwenere.

“Ndilindizga ndi mtima wosi nyengu yo ndazamukumbukanga cha vinthu viheni pamwenga kuviŵanaŵana. Ndiziŵa kuti kunthazi kwazamuŵavi matenda ngakusuzgika maŵanaŵanu. Venivi vitindiwovya kukunthiyapu sonu kweniso kulindizga ndi mtima wosi nyengu yeniyi po ndazamutama so cha matenda ngakusuzgika maŵanaŵanu.”