NKHANI YAKUSAMBIRA YA NAMBALA 49
Kumbi Yehova Wamukengi Mapempheru Ngangu?
“Mwazakundidana, mwazamukuza kwaku ini kweniso mwazamupemphera kwaku ini ndipu ndazakukuvwisiyani.”—YERE. 29:12.
SUMU 41 Chondi Vwani Pempheru Langu
VO TISAMBIRENGI MU NKHANI IYIa
1-2. Ntchifukwa wuli tingawona nge kuti Yehova wamuka cha mapempheru ngidu?
BAYIBOLU likamba kuti: “Ukondwi ukongwa mwaku Yehova, ndipu iyu wakupaskengi vosi vo mtima waku ukhumba.” (Salimo 37:4) Lenili ndi layizgu lakukondwesa ukongwa. Kweni kumbi tikhumbika kukhaza kuti Yehova watipaskengi chechosi cho tapempha nyengu yeniyo? Ntchifukwa wuli tikhumbika kujifumba fumbu lenili? Ŵanaŵaniyani vakuchitika ivi: Mzichi wambula kuyirwa wapemphera kuti wakasere Sukulu ya Apharazgi a Ufumu. Kweni vyaka vijumphapu ŵaka kwambula kudanika. Mubali wachinyamata wapempha Yehova kuti wamuchizgi matenda ngakulu ngo watama ndi chilatu chakuti wachitengi vinandi mu mpingu. Kweni wachira cha. Apapi apemphera kwaku Yehova kuti mwana wawu walutirizgi kuja mu uneneska. Kweni mwana yo wasankha kuleka kuteŵete Yehova.
2 Panyaki namwi mukumupempha chinthu chinyaki Yehova, kweni wechendakumukeni. Chifukwa cha venivi panyaki mungaŵanaŵana kuti Yehova wamuka mapempheru nga ŵanthu anyaki pe, nginu cha. Pamwenga mungaŵanaŵana kuti mukunangisa chinthu chinyaki. Mzichi munyaki zina laki Janiceb nayu waŵanaŵananga viyo. Iyu ndi mulumu waki apempheranga kwaku Yehova kuti akateŵete pa Beteli. Iyu wangukamba kuti: “Ndagomezganga kuti tidanikengi mwaliŵi ku Beteli.” Vyaka vinandi vingujumphapu kweni anguŵadana mbwenu cha. Janice wangukamba kuti: “Ndinguguŵa kweniso ndingutimbanyizgika maŵanaŵanu. Ndajifumbanga kuti ndikuchitanji cho chikuguŵisa Yehova. Ndapempheranga ukongwa mwakuchita kuzumbuwa kuti ndikhumba kuchiteŵete pa Beteli. Ntchifukwa wuli watindimuka cha pempheru langu?”
3. Kumbi tikambiskanengenji mu nkhani iyi?
3 Nyengu zinyaki tingakayikiya asani Yehova wavwisiya mapempheru ngidu. Ateŵeti anyaki akugomezgeka a mu nyengu yakali nawu akayikiyanga. (Yobu 30:20; Salimo 22:2; Haba. 1:2) Kumbi ntchinthu wuli cho chingakusimikiziyani kuti Yehova wavwisiya mapempheru nginu? (Salimo 65:2) Kuti timuki fumbu lenili tiyeni timuki dankha mafumbu ngatatu yanga: (1) Kumbi Yehova watichitiyengenji? (2) Kumbi Yehova wakhumba kuti isi tichitengenji? (3) Ntchifukwa wuli tikhumbika kusintha vinthu vinyaki vo tapempha?
KUMBI YEHOVA WATICHITIYENGENJI?
4. Mwakukoliyana ndi Yeremiya 29:12, kumbi Yehova watitilayizganji?
4 Yehova walayizga kuti wavwisiyengi mapempheru ngidu. (Ŵerengani Yeremiya 29:12.) Chiuta widu watanja ateŵeti ŵaki akugomezgeka, mwaviyo nyengu zosi wavwisiya mapempheru ngawu. (Salimo 10:17; 37:28) Kweni venivi ving’anamuwapu cha kuti iyu watipaskengi chechosi cho tapempha. Tikhumbika kulindizga charu chifya kuti tizilonde vinthu vinyaki vo tipempha pasonu panu.
5. Kumbi Yehova waŵanaŵaniyanji asani wavwisiya mapempheru ngidu? Konkhoskani.
5 Yehova waŵanaŵaniya khumbu laki wachivwisiya mapempheru ngidu. (Yesa. 55:8, 9) Chinthu chimoza cho iyu wakhumba ntchakuti charu chapasi chizizazi ndi ŵanthu akuvwiya ulamuliru waki. Kweni Satana wakamba kuti ŵanthu vinthu vingaŵayende umampha asani atijilamuliya ŵija. (Gene. 3:1-5) Kuti Yehova walongo kuti Satana ngwaboza, wazomereza kuti ŵanthu ajilamuliyengi ŵija. Kweni ulamuliru wa ŵanthu ndiwu uchitiska kuti tikumanengi ndi masuzgu nganandi mazuŵa nganu. (Waku. 8:9) Tiziŵa kuti pasonu panu Yehova watuzgengepu masuzgu ngosi cha. Chifukwa asani wangachita venivi, ŵanthu anyaki angaŵanaŵana kuti ŵanthu angafiska kujilamuliya ŵija, chifukwa afiska kumalisa masuzgu ngosi.
6. Ntchifukwa wuli tikhumbika kusimikiza kuti nyengu zosi Yehova wachita vinthu mwachanju kweniso mwaurunji?
6 Yehova wangamuka mapempheru ngakuyanana mu nthowa zakupambana. Mwakuyeruzgiyapu, Fumu Hezekiya yati yatama ukongwa yinguŵeyere Yehova kuti wayichizgi. Yehova wangumuka pempheru laki ndipu wangumuchizga. (2 Mafu. 20:1-6) Kweni wakutumika Paulo, wati wapempha Yehova kuti watuzgi “munga muliŵavu” laki, Yehova wangumalisa cha suzgu laki. Munga wenuwu utenere kuti wenga nthenda yinyaki yo watamanga. (2 Akori. 12:7-9) Tiyeni tiwoni so vo vinguchitikiya Yakobe ndi Peturo. Fumu Herodi yakhumbanga kuŵabaya ŵosi ŵaŵi. Mpingu ungumupemphere Peturo ndipu utenere kuti wapempheriyanga so Yakobe. Peturo wangutaskika mwakuziziswa ndi mungelu, penipo Yakobe wangubayika. (Machi. 12:1-11) Tingajifumba kuti, ‘Ntchifukwa wuli Yehova wangutaska Peturo, Yakobe cha?’ Bayibolu likamba chechosi cha.c Kweni tisimikiza kuti nthowa zaku Yehova ‘zambula urunji’ cha. (Doto. 32:4) Ndipuso tiziŵa kuti Yehova waŵayanjanga wosi, Peturo ndi Yakobe. (Chivu. 21:14) Nyengu zinyaki Yehova wangamuka mapempheru ngidu, mu nthowa yo isi taŵanaŵananga cha. Kweni chifukwa chakuti tigomezga kuti Yehova wamuka mapempheru ngidu mwachanju kweniso mwaurunji, tidandawula cha ndi mo iyu wamukiya.—Yobu 33:13.
7. Kumbi tikhumbika cha kuchitanji, nanga ntchifukwa wuli?
7 Tiyesesa kuleka kuyeruzgiya mo vinthu viliri pa umoyu widu ndi wa anyidu. Mwakuyeruzgiyapu, tingapempha Yehova mwakuchita kuzumbuwa chinthu chayichu cho tikhumba, kweni wangatipaska cha chinthu cho tapempha. Pavuli paki, tingavwa kuti munthu munyaki wangupempha so chinthu chenicho kwaku Yehova, ndipu viwoneka kuti Yehova wamumuka. Venivi ndivu vinguchitikiya Anna. Iyu wapempheranga kuti mulumu waki, Matthew wachiri kansa. Ndipu pa nyengu yeniyi azichi ŵaŵi akukota nawu atamanga kansa. Anna wapempheranga ndi mtima wosi kuti mulumu waki kweniso azichi ŵenaŵa achiri. Azichi yawa anguchira kweni Matthew wakutayika. Pakwamba, Anna wajifumbanga asani Yehova ndiyu wangusereliyapu kuti azichi ŵenaŵa achiri. Asani ndi viyo, ntchifukwa wuli wangumuka cha pempheru laki lakuti mulumu waki nayu wachiri? Mbuneneska kuti tiziŵa cha mo azichi ŵenaŵa anguchiriya. Kweni vo tiziŵa vakuti Yehova wazamumalisa masuzgu ngosi ndipu wakhumbisiska kuziyuska mabwezi ngaki ngosi ngo ngakufwa.—Yobu 14:15.
8. (a) Mwakukoliyana ndi Yesaya 43:2, kumbi Yehova watitiwovya wuli? (b) Kumbi pempheru lingatiwovya wuli asani takumana ndi mayeseru ngakusuzga? (Woneriyani vidiyo yakuti Pempheru Lititiwovya Kuti Tikunthiyengepu.)
8 Yehova watitiwovya nyengu zosi. Nge Ada achanju, Yehova wakondwa cha asani watitiwona kuti tisuzgika. (Yesa. 63:9) Chinanga kuti ve viyo, iyu watingatondekesa cha mayeseru ngidu ngosi ngo tingangayeruzgiya ndi misinji pamwenga motu. (Ŵerengani Yesaya 43:2.) Kweni walayizga kuti watiwovyengi ‘kujumpha’ mumayeseru ngenanga. Ndipu kwali tikumana ndi mayeseru wuli sonu, iyu wawonesesengi kuti tilutirizga kuja nayu pa ubwezi wakukho. Yehova watitipaska so mzimu waki wakupaturika kuti utiwovyi kukunthiyapu. (Luka 11:13; Afi. 4:13) Chifukwa cha venivi, tigomezga kuti nyengu zosi iyu watipaskengi vinthu chayivu vo tikhumbika kuti tikunthiyepu kweniso kuti tilutirizgi kuja akugomezgeka kwaku iyu.d
KUMBI YEHOVA WAKHUMBA KUTI ISI TICHITENGENJI?
9. Mwakukoliyana ndi Yakobe 1:6, 7, ntchifukwa wuli tikhumbika kugomezga kuti Yehova watiwovyengi?
9 Yehova wakhumba kuti timugomezgengi. (Ahe. 11:6) Nyengu zinyaki mayeseru ngidu ngangawoneka kuti ngakusuzga kumalana nangu. Mwakuti tingayamba kukayikiya kuti Yehova watiwovyengi. Kweni Bayibolu lititisimikiziya kuti ndi nthazi zaku Chiuta, ‘tingakwera mpanda.’ (Salimo 18:29) Mwaviyo, mumalu mwakukayikiya titenere kupemphera ndi chivwanu kweniso kumugomezga Yehova kuti wamukengi mapempheru ngidu.—Ŵerengani Yakobe 1:6, 7.
10. Kambani chakuyeruzgiyapu cha mo tingachitiya vinthu mwakukoliyana ndi mapempheru ngidu.
10 Yehova wakhumba kuti tichitengi vinthu mwakukoliyana ndi mapempheru ngidu. Mwakuyeruzgiyapu, mubali wangapempha Yehova kuti wamuwovyi kuti wakapemphi abwana ŵaki kuto ofu ku ntchitu ndi chilatu chakuti amuzomerezi kuluta ku unganu wachigaŵa. Kumbi Yehova wangamuka wuli pempheru laki? Yehova wangamupaska chiganga mubali yo, kuti wakakambiskani ndi bwana waki. Kweni mubali yo wakhumbika mbwenu kuchipempha kwa abwana ŵaki. Iyu wangakhumbika kuchita venivi mwakuwerezawereza. Panyaki iyu wangakhumbika kusinthana ndi munyaki mazuŵa ngakugwiriya ntchitu. Ndipu nyengu zinyaki wangakhumbika kuto ofu yambula kulipirika asani mphakwenere.
11. Ntchifukwa wuli tikhumbika kupempha mwakuwerezawereza?
11 Yehova wakhumba kuti timupemphengi mwakuwerezawereza. (1 Ate. 5:17) Yesu wangukamba kuti vinthu vinyaki vo tingapempha, tingapaskika nyengu yeniyo cha. (Luka 11:9) Mwaviyo, kuleka cha kupempha! Mupempherengi kutuliya pasi pa mtima kweniso mwakuwerezawereza. (Luka 18:1-7) Asani tilutirizga kupempha chinthu chinyaki tilongo Yehova kuti vinthu vo tipempha titivikhumba nadi. Kweniso tilongo kuti tigomezga kuti iyu wangatiwovya nadi.
NTCHIFUKWA WULI TIKHUMBIKA KUSINTHA VINTHU VINYAKI VO TAPEMPHA?
12. (a) Kumbi tikhumbika kujifumba fumbu nili pa vo tipempha, nanga ntchifukwa wuli? (b) Kumbi tingachita wuli kuti mapempheru ngidu ngatumbikengi Yehova? (Wonani bokosi lakuti “Kumbi Mapempheru Ngangu Ngatumbika Yehova?”)
12 Asani timukika cha mapempheru ngidu, tingajifumba mafumbu ngatatu. Lakwamba, ‘Kumbi ndipempha chinthu chakwenere?’ Kanandi tiŵanaŵana kuti tiziŵa vo vingatiwovya ukongwa. Kweni vinthu vo tipempha vingatiwovya viŵi cha. Asani tipemphera kwaku Yehova kuti watiwovyi pa suzgu linyaki, pangaŵa nthowa yinyaki yamampha ukongwa yo iyu wangatiwovye kuluska yo isi titimupempha. Ndipu vinyaki vo titimupempha vingaŵa kuti vikoliyana cha ndi khumbu Laki. (1 Yoha. 5:14) Mwakuyeruzgiyapu, tiyeni tikambiskani chakuyeruzgiyapu cha apapi, chiya tachikambapu kali. Yiwu angupempha Yehova kuti wawovyi mwana wawu kulutirizga kuja mu uneneska. Yiwu angunangisa cha kupempha venivi. Kweni Yehova wachichizga munthu weyosi cha kuti wamuteŵetiyengi. Iyu wakhumba kuti tosi kusazgapu ŵana ŵidu, tisankhengi tija kumuteŵete. (Doto. 10:12, 13; 30:19, 20) Mwaviyo, apapi angapempha Yehova kuti waŵawovyi kuti amufikengi pa mtima mwana wawu asani atimusambiza kuti wayambi kumuyanja Yehova ndi kuja mubwezi Waki.—Nthanthi 22:6; Aefe. 6:4.
13. Mwakukoliyana ndi Aheberi 4:16, kumbi Yehova watiwovyengi zuŵanji? Konkhoskani.
13 Fumbu lachiŵi ndakuti, ‘Kumbi ndi nyengu yaku Yehova yakuti wandipaski vo ndikhumba?’ Tingakhumba kuti Yehova watimuki mapempheru ngidu nyengu yeniyo. Kweni uneneska ngwakuti Yehova waziŵa nyengu yakwenere yakutiwovye. (Ŵerengani Aheberi 4:16.) Asani tipaskika nyengu yeniyo ndi yeniyo cha vo tapempha, tingaŵanaŵana kuti Yehova watitimuka kuti, ‘Awa.’ Kweni vingaŵa kuti iyu watitimuka kuti, ‘Sonu dankha cha.’ Mwakuyeruzgiyapu, tiyeni tikambiskani chakuyeruzgipu cha mnyamata yuwa wangupempha kuti wachizgiki ku matenda ngaki. Asani Yehova wangamuchizga mwakuziziswa, Satana wangakamba kuti mubali uyu walutirizga kuteŵete Yehova ŵaka pakuti wachizgika. (Yobu 1:9-11; 2:4) Kusazgiyapu yapa, Yehova wakuŵika nyengu yo wazamuchizgiya matenda ngosi. (Yesa. 33:24; Chivu. 21:3, 4) Pasonu panu tikhaza cha kuti Yehova watichizgengi mwakuziziswa. Mwaviyo, mubali uyu wangapempha Yehova kuti wamupaski nthazi kweniso chimangu cha mu mtima kuti walutirizgi kukunthiyapu ndipuso kumuteŵete mwakugomezgeka.—Salimo 29:11.
14. Kumbi tisambiranji pa vo vinguchitikiya Janice?
14 Tiyeni tikambiskani vo vinguchitikiya Janice, yo wapempheranga kwaku Yehova kuti wakateŵete pa Beteli. Pangujumpha vyaka vinkhondi kuti wavwisi mo Yehova wangumukiya pempheru laki. Iyu wangukamba kuti: “Yehova wangugwiriskiya ntchitu nyengu yeniyi kuti wandisambizi ndipuso wandiyengetuwi. Ndakhumbikanga kuti ndimuthembengi ukongwa Yehova. Ndakhumbikanga kusazgiyaku lusu langu pa nkhani yakusambira Bayibolu pakundija. Ndakhumbikanga so kusaniya likondwa chayilu lo munthu waja nalu chifukwa chakuteŵete Yehova.” Pati pajumpha nyengu Janice ndi mulumu waki angwamba kuchita uteŵeti wakuwonere dera. Asani wakumbuka vo vinguchitika, Janice wakamba kuti: “Yehova wangumuka mapempheru ngangu chinanga kuti wangumuka mu nthowa yo ini ndaŵanaŵananga cha. Panguto nyengu kuti ndiwemu kuti iyu wandimuka mu nthowa yamampha ukongwa. Kweni ndiwonga ukongwa chifukwa chakuti watindiyanja ndipuso watindilongo lisungu.”
Asani muwona kuti Yehova wakumukani cha vo mwapempha, yesani kupempha vinthu vinyaki (Wonani ndimi 15)f
15. Ntchifukwa wuli tikhumbika kupempha vinthu vakupambanapambana? (Wonani so vithuzi.)
15 Fumbu lachitatu lingaŵa lakuti, ‘Kumbi nditenere kupempha chinthu chinyaki?’ Chinanga kuti mbumampha kupempha vinthu chayivu vo tikhumba, kweni nyengu zinyaki tingapempha vinthu vakupambanapambana kuti tiziŵi vo Yehova wakhumba kuti tichiti. Tiyeni tikambiskani chakuyeruzgiyapu cha mzichi wambula kuyirwa yo wapempheranga kuti wakasere Sukulu ya Apharazgi a Ufumu. Iyu wakhumba kuti wakasere sukulu yeniyi ndi chilatu chakuti wakateŵetiyengi ko kukhumbika apharazgi anandi. Mwaviyo, iyu wachipemphera kuti wakasere sukulu yeniyi, wangapempha so Yehova kuti wamuwovyi kusazgiyaku uteŵeti waki. (Machi. 16:9, 10) Pavuli paki, iyu wangachita vinthu mwakukoliyana ndi pempheru laki ndipu wangachifumba kwa wakuwonere dera asani mpingu wapafupi ukhumbika apayiniya anyaki. Pamwenga wangapempha ku ofesi ya nthambi kuti yimukambiyi dera lo kukhumbika apharazgi anandi a Ufumu.e
16. Kumbi titenere kusimikizanji?
16 Nge mo tawone, tisimikiza kuti Yehova wamuka mapempheru ngidu mwachanju kweniso mwaurunji. (Salimo 4:3; Yesa. 30:18) Nyengu zinyaki Yehova wangatimuka mo isi taŵanaŵaniyanga cha. Kweni waleka cha kuvwisiya mapempheru ngidu. Iyu watitiyanja ukongwa. Ndipu watijowongepu cha. (Salimo 9:10) Mwaviyo, lutirizgani ‘kumuthemba nyengu zosi,’ ndipu mumukambiyengi vo ve mu mtima mwinu kuziya mu pempheru.—Salimo 62:8.
SUMU 43 Pempheru Lakulongo Kuwonga
a Nkhani iyi yikonkhoskengi chifukwa cho tisimikiziya kuti nyengu zosi Yehova wamuka mapempheru ngidu mwachanju ndipuso mwaurunji.
b Mazina nganyaki ngasinthika.
c Wonani nkhani yakuti “Kumbi Mugomezga Kuti Nyengu Zosi Yehova Wachita Vinthu mu Nthowa Yamampha?” mu Chigongwi cha Mlinda cha February 2022 ndimi 3-6.
d Kuti muziŵi mo Yehova watitiwovye kukunthiyapu mayeseru woneriyani vidiyo ya mutu wakuti: Pempheru Lititiwovya Kuti Tikunthiyengepu, pa jw.org.
e Asani mukhumba kuziŵa vo mungachita kuti mukateŵete muchigaŵa cha nthambi yinyaki, ŵerengani buku lakuti Gulu lo Lichita Khumbu Laku Yehova, mutu 10, ndimi 6-9.
f VITHUZI: Azichi ŵaŵi apemphera ŵechendafili fomu yakupempha kuti akasere Sukulu ya Apharazgi a Ufumu. Pati pajumpha nyengu, mzichi munyaki wadanika penipo munyaki wadanika cha. Mumalu mwakuti waguŵi ukongwa, mzichi yo wadanika cha wapemphera kwaku Yehova kuti wamuwovyi kuwona nthowa zinyaki zo wangasazgiyaku uteŵeti waki. Pavuli paki, walemba kalata ku ofesi ya nthambi yakupempha kuti wakateŵetiyengi kuchigaŵa ko kukhumbika apharazgi anandi.