Yeremiya 33:3—“Ndidani Ndipu Ndikumukengi”

“Ndidani ndipu ndikumukengi kweniso ndijengi wakunozgeka kukukambiya vinthu vikulu ndipuso vakusuzga kuvivwisa vo ukuviziŵapu cha.”—Yeremiya 33:3, Bayibolu la Charu Chifya.

“Danani kwaku ine ndipo ndikwamukeninga, ndikuneniyeninga vinthu vikulu ndi vyakubisika vyo mulivi kuziŵapo.”—Yeremiya 33:3, Mazu Ghaku Chiuta.

Vo Lemba la Yeremiya 33:3 Ling’anamuwa

Mwakugwiriskiya ntchitu mazu ngo nge pa lemba ili, Chiuta wakhumba kuti ŵanthu apempherengi kwaku iyu. Asani ŵanthu avwa mudanu ndi kuuzomera kweniso kupemphera kwaku Chiuta, Iyu wazakuŵavumbuliya vinthu vo vazamuchitika kunthazi.

“Ndidani ndipu ndikumukengi.” Mazu ngakuti “Ndidani” ngang’anamuwa kudana waka zina laku Chiuta cha. Mumalu mwaki, mazu yanga ngasazgapu kuti tikhumbika kupemphera kwaku Chiuta kuti watiwovyi kweniso kuti watilongozgengi nyengu zosi.—Salimo 4:1; Yeremiya 29:12.

Mudanu uwu walutanga ukongwa ku mtundu wakali wa Ayisirayeli. Mtundu uwu unguleka kuja wakugomezgeka kwaku Chiuta ndipu venivi vinguchitiska kuti asilikali a ku Babiloni aŵawofyezi. (Yeremiya 32:1, 2) Yehovaa wangukambiya Ayisirayeli kuti awere so kwaku iyu kuziya mupempheru.

“ . . ndijengi wakunozgeka kukukambiya vinthu vikulu ndipuso vakusuzga kuvivwisa vo ukuviziŵapu cha.” Vinthu vo Chiuta wanguŵalayizga kuti waŵavumbuliyengi “vakusuzga kuvivwisa” munthowa yakuti ŵanthu paku yiiwu ŵija atingi afiskengi cha kuviziŵa. Mazu ngakuti “vinthu vikulu ndipuso vakusuzga kuvivwisa” ngangang’anamuwa so kuti “vinthu vakubisika.”

Kumbi ndi “vinthu vakubisika” nivi vo Chiuta wakhumbanga kuŵavumbuliya? Ndi vinthu venga pafupi kuchitika mwakuyeruzgiyapu Chiuta wanguvumbuwa kuti tawuni ya Yerusalemu yazamubwangandulika ndi kuja yambula kanthu, kweniso kuti asani pajumpha nyengu yazamuzengeka so. (Yeremiya 30:1-3; 33:4, 7, 8) Chinanga kuti venga viyo, Chiuta wangulayizga kuti ŵanthu ŵaki akugomezgeka azamunangika cha.—Yeremiya 32:36-38.

Nkhani ya pa Yeremiya 33:3

Mchimi Yeremiya wangulonde uthenga wakutuwa kwaku Yehova mu chaka cha 608 B.C.E., cho chenga chaka chanambala 10 cha ulamuliru wa Fumu Zedekiya. Yeremiya wangukambiya limu kuti Yerusalemu wazamubwangandulika ndipuso kuti Zedekiya wazamutoleke ku ukapolu. Chifukwa chakuti fumu yingukondwa cha ndi uthenga wenuwu, yingulamura kuti Yeremiya waŵikiki mujeri.—Yeremiya 32:1-5; 33:1; 37:21.

Mwaviyo mphanyengu yeniyi po Chiuta wangukambiya mazu ngo nge pa lemba la Yeremiya 33:3. Kweni chakupaska chitima ntchakuti Fumu Zedekiya limoza ndi ŵanthu ŵaki angulutirizga kukana mudanu waku Yehova. (Yeremiya 7:26; 25:4) Yiwu apempheranga cha kwaku Chiuta kuti wawalongozgi. Ndipu pati pajumpha chaka chimoza, Zedekiya wangutuwapu pa ufumu, Yerusalemu wangubwangandulika, ndipu pafufupi ŵanthu anandi wo angujaku angutoleke ku ukapolu ku Babiloni.—Yeremiya 39:1-7.

Mazu ngo ngakulembeka pa Yeremiya 33:3 ngatitikumbusa kuti Chiuta wangawovya ŵanthu kuti ‘aziŵi mwauneneska vinthu vakukwaskana ndi khumbu laki’ ndipuso wavumbuwa “vinthu vandimba” ku ŵanthu wo apemphera kwaku iyu kweniso kusambira Mazu ngaki Bayibolu. (Akolose 1:9; 1 Akorinto 2:10) Vinthu vandimba venivi visazgapu vinthu vo Chiuta wakulayizga kuti wazamuchita kunthazi.—Chivumbuzi 21:3, 4.

Woneriyani kavidiyo kafupi yaka kuti muwoni vo ve mubuku la Yeremiya.