Yesu ‘Wajalikiska Urunji Mucharu’

1, 2. Kumbi penga pa chakuchitika wuli po Yesu wangukwiya, nanga ntchifukwa wuli?

YESU wati wafika panyumba yakusopiyamu wangukwiya ukongwa ndi vo wanguwona. Panyaki vingakusuzgani kuvwisa kuti ntchifukwa wuli munthu wakufwasa kweniso wakwanja chimangu wangukwiya viyo. (Mateyu 21:5) Iyu wenga munthu wambula kukwiya liŵi, ndipu asani wakwiya ndikuti pachitika nadi vinthu vambula urunji.a Kumbi ndi vinthu wuli vo vinguchitiska kuti munthu wakwanja chimangu mwenuyu wakwiyi viyo? Penga vinthu vinyaki vambula urunji vo ŵanthu achitanga.

² Yesu wayiyanjanga ukongwa nyumba yakusopiyamu yo yenga ku Yerusalemu. Venga viyo chifukwa pacharu chosi, nyumba yakusopiyamu yeniyi ndiyu yija yenga malu ngakupaturika ngakusopiyamu Awisi akuchanya. Ndipu Ayuda akutuliya muvigaŵa vinandi, ayendanga mtunda utali kuti azisopi pa malu ngenanga. Chinanga mbanthu wo ŵenga Ayuda cha wo awopanga Chiuta, nawu azanga kuzisopa Yehova kuchigaŵa chinyaki cha nyumba yeniyi cho yiwu azomerezekanga kusere. Kweni kukwambiriya kwa uteŵeti waki, Yesu wati wasere munyumba yakusopiyamu, wangusaniya kuti muchitika vinthu vinandi vaukazuzi. Pa malu ngenanga paziŵikanga cha kuti mpha nyumba yakusopiyamu, pawonekanga ŵaka nge mpha msika! Pajanga ŵanthu anandi akuchita malonda kweniso akusintha ndalama. Ntchifukwa wuli kuchita venivi kwenga kuheni? Ntchifukwa chakuti ŵanthu ŵenaŵa, agwiriskiyanga ntchitu nyumba yakusopiyamu yaku Chiuta nge malu ngakuryiya ŵanthu masuku pamutu kweniso kuŵabiya. Kumbi yiwu achitanga wuli venivi?—Yohane 2:14.

3, 4. Kumbi ndi vinthu nivi viheni vo vachitikanga pa nyumba yaku Yehova, nanga Yesu wanguchitanji kuti wanozgi vinthu?

³ Alongozgi achisopa angulamula kuti mtundu umoza pe wa ndalama ndiwu wakhumbikanga kugwiriskikiya ntchitu pakupereka msonkhu wa pa nyumba yakusopiyamu. Ŵanthu wo aza kutuliya kuvigaŵa vakutali akhumbikanga kusintha ndalama zawu kuti aje ndi ndalama zo zazomerezgekanga. Ndichu chifukwa chaki ŵanthu akusintha ndalama anguŵika mathebulu ngawu mukati mwa nyumba yakusopiyamu, ndipu kuti munthu amusinthi ndalama yaki wakhumbikanga kulipira pamwenga kuti kusazgiyapu yinyaki yapachanya. Ŵanthu wo agulisanga viŵetu vawu nawu asaniyanga ndalama zinandi ukongwa. Alendu wo akhumba kupereka sembi, ŵenga ndi wanangwa wakugula nyama yakuti apereki sembi ku munthu weyosi yo wagulisanga nyama mutawuni, kweni ŵaraŵara a pa nyumba yakusopiyamu, akananga kuti nyama zenizi ziperekeki sembi. Nyama zija zo zagulika pa nyumba yakusopiyamu penipo ndizu azizomerezanga. Mwaviyo, ŵanthu wo achichizgikanga kugula nyama zo chinanga kuti zagulisikanga pa mtengu wakukwera ukongwa.b Kukamba uneneska, kwenuku kwenga ŵaka kudulisa cha, kweni kwenga kubiya ŵanthu!

⁴ Yesu wangulekere cha vinthu vambula urunji venivi. Nyumba yakusopiyamu yeniyi yenga nyumba ya Awisi! Mwaviyo wangupanga likhwechu la vingwi, pavuli paki wangudikisa ŵanthu wosi wo ŵenga ndi mbereri kweniso ng’ombi munyumba yakusopiyamu. Ndipu wangudira so ndalama za ŵanthu akusintha ndalama ndi kugudubuwa mathebulu ngawu. Aŵanaŵaniyani ŵaka unandi wa ndalama zo zingudika pasi! Pavuli paki, mwaukali wangukambiya ŵanthu wo agulisanga nkhunda kuti: “Tuzganimu ivi munu!” (Yohane 2:15, 16) Pengavi chinanga njumoza yo wangumususka munthu wachiganga mwenuyu.

Yesu Wayezganga Awisi Mwakufikapu

5-7. (a) Kumbi Yesu wangusambira wuli urunji waku Yehova, nanga tingasambiranji kwaku iyu? (b) Kumbi Yesu wanguchita wuli kuti wamalisi nkhani yakukwaskana ndi urunji waku Yehova yo Satana wangwambisa, nanga kunthazi wazamumalisa wuli nkhani yeniyi?

⁵ Pati pajumpha nyengu amalonda anguza so mumalu ngo Yesu wanguŵadikisa. Mwakuti pati pajumpha vyaka vitatu, iyu wanguŵadikisa so ŵanthu ŵenaŵa ndipu panyengu iyi wanguko mazu ngo Yehova wangukamba ngakuti nyumba yaki ayisambusa “mphanji ya ankhungu.” (Yeremiya 7:11; Mateyu 21:13) Yesu wati wawona kuti amalonda abiya ŵanthu kweniso kuti nyumba yakusopiyamu yafipiskika, iyu wanguvwa nge mo awisi anguvwiya. Venivi vakuziziswa cha! Tikamba viyo chifukwa, Yesu wangusambizika ndi Awisi kuchanya kwa vyaka mamiliyoni nganandi. Ndipu chifukwa cha venivi, iyu wangusambira mo Yehova wawone urunji. Iyu wayezganga awisi mwakufikapu. Mwaviyo, nthowa yamampha yo tingaziŵiya vo urunji waku Yehova ung’anamuwa nkhusambira chakuwoniyapu chaku Yesu Khristu.—Yohane 14:9, 10.

⁶ Mwana wapade waku Yehova wengapu panyengu yo Satana wanyozanga Yehova Chiuta kuti ngwakulamuliya wamampha cha kweniso kuti ngwaboza. Kwenuku kwenga kunyoza kukulu ukongwa! Pa nyengu yeniyi iyu wangumuvwa so Satana wachikamba kuti ŵanthu ateŵete Yehova chifukwa cha mbunu. Venivi vingumupweteka ukongwa Yesu. Mwaviyo, Yesu watenere kuti wangukondwa ukongwa wati waziŵa kuti wawovyengeku munthowa yapade pakusimikiziya kuti Satana ngwaboza! (2 Akorinto 1:20) Kumbi watingi wachitengi wuli venivi?

⁷ Nge mo tingusambiriya mu Mutu 14, Yesu wangumuka umampha ukongwa maboza ngo Satana wangukamba ngakukwaskana ndi kugomezgeka kwa ateŵeti aku Yehova. Vo Yesu wanguchita vinguwovya kuti zina laku Yehova litoweskeki kweniso kuti weyosi waziŵi kuti ulamuliru waku Yehova ngwaurunji. Yesu nge Mulongozgi Mura, wazamujalikiska urunji chayiwu muchilengedu chosi. (Machitidu 5:31) Yesu we pacharu chapasi, wanguyezga urunji waku Chiuta pa chechosi cho wakambanga kweniso kuchita. Pakukamba vaku Yesu, Yehova wangukamba kuti: “Ndiŵikengi mzimu wangu paku iyu ndipu wazamuchitiska kuti mitundu ya ŵanthu yiziŵi urunji chayiwu.” (Mateyu 12:18) Kumbi Yesu wangufiska wuli mazu ngenanga?

Yesu Wanguwovya Ŵanthu Kuziŵa vo “Urunji Ung’anamuwa”

8-10. (a) Kumbi marangu ngo alongozgi achisopa angupanga ngachitiskanga wuli ŵanthu kuti atinkhengi ŵanthu wo ŵenga Ayuda cha kweniso kunyoza anthukazi? (b) Kumbi marangu ngenanga nganguchitiska wuli kuti vije vakusuzga kuti ŵanthu alondongi dangu laku Yehova lakukwaskana ndi Sabata?

⁸ Yesu wayanjanga Dangu laku Yehova ndipu nyengu zosi walivwiyanga. Kweni alongozgi avisopa a mu nyengu yaki asinthanga fundu za mu Dangu ndipu aligwiriskiyanga ntchitu mwambula kwenere. Yesu wanguŵakambiya kuti: “Soka alembi ndi Afarisi, akunyenga yimwi! . . . muleke dala vinthu vakukhumbika ukongwa va mu Dangu nge urunji, lisungu ndi kugomezgeka.” (Mateyu 23:23) Kusazgiyapu yapa, ŵanthu wo asambizanga Dangu aŵawovyanga cha ŵanthu kuvwisa “vo urunji ung’anamuwa.” Mumalu mwaki, ajalizanga ŵanthu kuti aleki kuziŵa vo Yehova wakamba vakukwaskana ndi urunji. Kumbi achitanga wuli venivi? Wonani vakuyeruzgiyapu ivi.

⁹ Yehova wangukambiya ŵanthu ŵaki kuti ajipatuwi ku ŵanthu amitundu yinyaki wo asopanga angoza. (1 Mafumu 11:1, 2) Kweni alongozgi anyaki achisopa achiskanga ŵanthu kuti atinkhengi ŵanthu wo ŵenga Ayuda cha. Mu buku la marangu nga Ayuda lo lidanika kuti Mishnah mwenga dangu ili lakuti: “Mungasiyanga cha ng’ombi zinu kunyumba ya munthu yo ndi Myuda cha, chifukwa wakhoza kugonana nazu. Maŵanaŵanu ngenanga ngenga ngaheni ukongwa kweniso ngapambananga ndi fundu zo zenga mu Dangu laku Mozesi. (Levitiko 19:34) Penga so marangu nganyaki ngo alongozgi achisopa angupanga ngo ngachiskanga ŵanthu kuti awonengi kuti anthukazi mbakusika. Mwakuyeruzgiyapu, dangu linyaki lenga lakuti asani munthulumi watenda limoza ndi muwolu waki mumsewu, munthukazi wangajanga panthazi cha pamwenga kwenda mumphepeti, kweni wajengi kuvuli kwa mlumu waki. Ndipu munthulumi wazomerezekanga cha kucheza pamwenga kukambiskana ndi munthukazi pagulu la ŵanthu, chinanga wangaŵa muwolu waki. Nge mo venge ndi akapolu, anthukazi nawu azomerezekanga cha kupereka ukaboni mu khoti. Pajanga so pempheru linyaki lo anthulumi aperekanga lakuwonga Chiuta chifukwa chakuti wakuŵalenga kuja anthukazi cha.

¹⁰ Alongozgi avisopa ŵenaŵa angupanga marangu nganandi ukongwa, ndipu ngachitiskanga kuti vije vakusuzga kuti ŵanthu aziŵi vinthu chayivu vo Chiuta wangukamba kuziya mu Dangu laki. Mwakuyeruzgiyapu, dangu lakukwaskana ndi Sabata lakanizanga ŵanthu kugwira ntchitu pa zuŵa lenili ndi chilatu chakuti achitengi vinthu vakukwaskana ndi kusopa, kukholesa ubwezi wawu ndi Chiuta kweniso kuti apumuwengi. Kweni Afarisi anguchitiska kuti dangu lenili lije lakusuzga ukongwa kulisunga. Mwakuti pa mazu ngakuti “ntchitu,” alongozgi ŵenaŵa angujisankhiya ŵija vo mazu ngenanga ngang’anamuwa. Yiwu anguzumbuwa vinthu vakukwana 39, vo asani munthu wangachita ndikuti wagwira ntchitu, vinthu nge kuvuna pamwenga kuŵinga nyama. Marangu ngenanga ngo yiwu angusazgiyapu, nganguchitiska kuti ŵanthu atondekengi kuziŵa ntchitu zo angagwira pa Sabata ndi zo angatondeka kugwira. Wuli asani munthu wabaya chidononu pa zuŵa la Sabata, kumbi kwenga kuŵinga? Asani munthu wajumpha mumunda wa tirigu ndi kupuluwaku tirigu wakukwana kujanja laki, kumbi ndikuti wagwira ntchitu yakuvuna? Nanga asani wachizga munthu wakutama, kumbi ndikuti wagwira ntchitu? Pakukhumba kumuka mafumbu ngenanga, alongozgi achisopa angupanga marangu ngakusuzga kungavwisa kweniso kungalondo.

11, 12. Kumbi Yesu wangusambiza wuli ŵanthu kuti aziŵi kuti marangu nga Afarisi ngenga ngaboza?

¹¹ Mwakukoliyana ndi mo vinthu venge pa nyengu iyi, kumbi Yesu watingi waŵawovyengi wuli ŵanthu kuvwisa urunji chayiwu? Vo Yesu wasambizanga kweniso kuchita pa umoyu waki, valongonga kuti wasuskanga mwachiganga vo alongozgi achisopa asambizanga. Mwakuyeruzgiyapu, aŵanaŵaniyani vinyaki mwa vinthu vo iyu wasambizanga. Iyu wangususka mwambula kubisa marangu nganandi ukongwa ngo alongozgi achisopa angupanga ndipu wanguŵakambiya kuti: “Mupepuwa mazu ngaku Chiuta chifukwa cha midawuku yinu yo mupaska ŵanthu.”—Mariko 7:13.

¹² Mwachiganga, Yesu wangusambiza kuti vo Afarisi asambizanga vakukwaskana ndi dangu la Sabata venga vaboza ndipu yiwu anguvwisa cha chilatu cho dangu linguperekeke. Iyu wangukamba kuti Mesiya ndi “Mbuya wa Sabata” mwaviyo wenga ndi wanangwa wakuchizga ŵanthu pa zuŵa la Sabata. (Mateyu 12:8) Kuti waŵawovyi kuvwisa fundu yeniyi, iyu wachizganga ŵanthu pa zuŵa la Sabata, ŵanthu wosi achiwona. (Luka 6:7-10) Venivi valongonga kuti mu Ulamuliru waki wa vyaka 1,000, wazamuchizga ŵanthu pacharu chosi. Vyaka 1,000 venivi vazamuja nadi Sabata likulu, chifukwa yeniyi yazamuja nyengu yo ŵanthu wosi akugomezgeka azamupumuwa ku masuzgu ngo ngatuza chifukwa cha ubudi ndi nyifwa.

13. Kumbi ndi dangu wuli lo Yesu wangupereka kwa akusambira ŵaki, nanga lipambana wuli ndi Dangu laku Mozesi?

¹³ Yesu wanguwovya so ŵanthu kuvwisa vo urunji chayiwu ung’anamuwa mwakupaska akusambira ŵaki dangu lasonu lenilo lidanika kuti, “dangu laku Khristu,” ndipu dangu lenili lingwamba kugwira ntchitu iyu wati wamaliza uteŵeti ŵaki pacharu chapasi. (Agalatiya 6:2) Dangu laku Khristu lenili ndakupambana ukongwa ndi Dangu laku Mozesi, chifukwa le ndi fundu ŵaka zauneneska, mumalu mwa marangu nganandi ngakuchita kulembeka. Chinanga kuti ve viyo, dangu lenili le ndi marangu ngambula kujumpha mumphepeti. Limoza mwa marangu ngenanga, Yesu wangulidana kuti “dangu lasonu.” Iyu wangusambiza akusambira ŵaki wosi kuti ayanjanengi nge mo iyu wakuŵayanjiya. (Yohane 13:34, 35) Mwaviyo, ŵanthu wosi wo avwiya “dangu laku Khristu” aziŵika chifukwa cha chanju chakufwiya anyawu cho ŵenachu.

Yesu Ntchakuwoniyapu Chamampha pa Nkhani Yakulongo Urunji

14, 15. Kumbi Yesu wangulongo wuli kuti waziŵa mphaka ya mazaza ngaki, nanga ntchifukwa wuli venivi vakuchiska?

¹⁴ Yesu wasambizanga ŵaka fundu zakukwaskana ndi chanju cha. Kweni nyengu zosi, iyu wachitanga vinthu mwakukoliyana ndi “dangu laku Khristu.” Tiyeni tikambiskani nthowa zitatu zo Yesu wangulongore kuti wachitanga vinthu mwakukoliyana ndi vo wasambizanga.

¹⁵ Yakwamba, Yesu waphweriyanga ukongwa kuti waleki kuchita chinthu chechosi chambula urunji. Panyaki mukuwonapu kuti ŵanthu asani ayamba kujikuzga, achita vinthu vinandi vambula urunji ndipu atamba kuchita vinthu vo mbudindu wawu cha kuchita. Kweni Yesu wakuchitapu cha venivi. Mwakuyeruzgiyapu, zuŵa linyaki munthu munyaki wanguza kwaku Yesu ndi kumukambiya kuti: “Msambizi, mukambiyeni mubali wangu kuti tigaŵani chihara.” Kumbi Yesu wangumumuka kuti wuli? Iyu wangumumuka kuti: “Wamunthu yiwi, ndiyani yo wakundisankha kuti ndije wakweruzga pamwenga wakugaŵa chihara chinu?” (Luka 12:13, 14) Kumbi venivi vitisambizanji vakukwaskana ndi iyu? Chinanga kuti Yesu wenga ndi zeru ukongwa, waziŵanga vinthu kweniso Chiuta wangumupasa udindu ukulu kuphara munthu weyosi pacharu chapasi, iyu wangukana kuchita vo munthu yuwa wangumupempha. Iyu wanguchita venivi chifukwa Chiuta wangumupaska mazaza ngakuchitiya venivi cha. Nyengu zosi, Yesu waziŵanga kuti we ndi pakulekeze, ndipu venivi ndivu so wachitanga wechendazi pacharu chapasi, iyu wajumphanga cha mphaka yaki. (Yuda 9) Venivi vilongore limu kuti Yesu ngwakujiyuyuwa ndipu nyengu zosi wathemba Yehova kuti ndiyu wamukambiyi cho ntchakwenere.

16, 17. (a) Kumbi Yesu wangulongo wuli urunji pa nyengu yo wapharazganga uthenga wamampha wa Ufumu waku Chiuta? (b) Kumbi kanandi Yesu walongonga wuli urunji?

¹⁶ Yachiŵi, Yesu wangulongo urunji pa nyengu yo wapharazganga uthenga wamampha wa Ufumu waku Chiuta. Iyu wayanjiyanga cha. Mumalu mwaki wapharazgiyanga munthu weyosi, kwali ngwakukhupuka pamwenga mukavu. Kweni Afarisi aŵanyozanga ukongwa akavu ndipu aŵadananga kuti ʽam-ha·ʼaʹrets, pamwenga kuti “ŵeneku charu.” Mwachiganga, Yesu wangulongo kuti kuchita venivi kwenga kuŵavi urunji. Iyu wasambizanga ŵanthu uthenga wamampha, kurya nawu chakurya, kuŵaryiska, kuŵachizga, kweniso kuyuska akufwa. Venivi valongonga kuti wayezga urunji waku Chiuta mweniyo wakhumba kuti “ŵanthu amitundu yosi”c ataskiki.—1 Timote 2:4

¹⁷ Yachitatu, kanandi Yesu walongonga urunji waki mwakuchitiya ŵanthu lisungu. Iyu wachitangapu kanthu kuti wawovyi ŵanthu akubuda. (Mateyu 9:11-13) Kweniso mwakukhumbisiska, iyu wawovyanga ŵanthu ŵeniwo ŵengavi akuŵawovya. Mwakuyeruzgiyapu, wangukoliyana cha ndi vo alongozgi achisopa asambizganga, yiwu asambizganga ŵanthu kuti angaŵagomezganga cha ŵanthu wo ŵenga Ayuda cha. Mumalu mwaki, mwalisungu, iyu wawovyanga kweniso kusambizga ŵanthu ŵenaŵa chinanga kuti wangutumika kwa Ayuda. Ndipu wanguzomera kuchizga mteŵeti wa mura wa gulu la asilikali la Aroma mwakuziziswa, ndipu wangukamba kuti: “Palivi munthu yo ndikumusaniyapu mu Isirayeli wachivwanu chikulu viyo.”—Mateyu 8:5-13.

18, 19. (a) Kumbi Yesu wangulongo wuli kuti watumbikanga anthukazi? (b) Kumbi vo Yesu wanguchita vititiwovya wuli kuziŵa kukoliyana pakati pa chiganga ndi urunji?

¹⁸ Kusazgiyapu yapa, Yesu wangukoliyana nangu cha maŵanaŵanu nga mo ŵanthu awoniyanga anthukazi. Mumalu mwaki, mwachiganga iyu wachitanga vinthu mwaurunji pa nkhani yeniyi. Ayuda awonanga kuti anthukazi a ku Samariya ŵenga akufipiskika nge mo ŵenge ŵanthu wo ŵenga Ayuda cha. Kweni ndimu Yesu waŵawoniyanga cha, mwakuti iyu wangupharazgiya munthukazi wa ku Samariya pa chisimi cha ku Sukari. Ndipu wenga munthukazi mwenuyu, yo Yesu wangumukambiyapu kakwamba kuti iyu ndi Mesiya wakulayizgika. (Yohane 4:6, 25, 26) Afarisi akambanga kuti anthukazi mbakwenere cha kusambizgika Dangu laku Chiuta, kweni Yesu wagwiriskiyanga ntchitu nyengu yaki kweniso nthazi zaki kusambizga anthukazi. (Luka 10:38-42) Mwakukoliyana ndi mdawuku wawu, Ayuda awonanga kuti anthukazi angapereka cha ukaboni wakuvwika umampha wo ŵanthu angawugomezga. Kweni Yesu wangulongo kuti watiŵatumbika anthukazi mwakuti wati wayuskika, wangwamba kuwoneke kwa anthukazi ndipu ndiwu anguja akwamba kuchitiya ukaboni kuti iyu wayuskika. Iyu wanguŵakambiya so kuti aluti kwa akusambira ŵaki anthulumi kuti akaŵakambiyi nkhani yakukhumbika yeniyi!—Mateyu 28:1-10.

¹⁹ Kukamba uneneska, Yesu wanguwovya ŵanthu anandi kuziŵa vo urunji chayiwu ung’anamuwa. Kanandi, waŵikanga umoyu waki pangozi kuti wachiti venivi. Vo Yesu wanguchita vititiwovya kuziŵa kuti munthu wakhumbika chiganga kuti wachiti vinthu mwaurunji. Ndichu chifukwa chaki Bayibolu litimukamba kuti, “Nkharamu ya fuku laku Yuda.” (Chivumbuzi 5:5) Kumbukani kuti nkharamu yimiya kuchita chiganga pakulongo urunji. Pambula kuswera yapa, Yesu wachitengi vinandi kuphara vo wanguchita pa nyengu yo wenga pacharu chapasi. Ndipu wazamuwonesesa kuti ‘urunji wajalikiskika mucharu.’—Yesaya 42:4.

Fumu Mesiya ‘Wajalikiska Urunji Mucharu’

20, 21. Kumbi Fumu Mesiya yitovya wuli mazuŵa nganu kuti pacharu chosi kweniso mu mpingu Wachikhristu muchitikengi vinthu mwaurunji?

²⁰ Kwambiya ŵaka po wakujaliya Fumu Mesiya mu 1914, Yesu wagwira ntchitu yakovya ŵanthu kuti achitengi vinthu mwaurunji pacharu chapasi. Kumbi wachita wuli venivi? Iyu wawonesesa kuti uchimi wo wangukambiya limu wo usanirika pa Mateyu 24:14, ufiskika. Akusambira aku Yesu asambiza ŵanthu pacharu chosi vakukwaskana ndi Ufumu waku Yehova. Ndipu nge mo Yesu wachitiyanga, yiwu apharazgiya ŵanthu wosi mwambula kwanjiya kweniso mwaurunji, kwali ndi mwana, mura, wakukhupuka, mukavu, munthukazi pamwenga munthurumi kuti wosi amuziŵi umampha Yehova Chiuta waurunji.

²¹ Yesu wachiska so kuti mumpingu Wachikhristu weniwo iyu ndiyu Mutu, muchitikengi vinthu mwaurunji. Nge mo uchimi ungukambiya limu, iyu wapereka “anthulumi kuja nge mphasu.” Anthulumi ŵenaŵa mbara akugomezgeka wo alongozga mu mpingu. (Aefeso 4:8-12) Po aryiska mbereri zakuzirwa zaku Chiuta, ŵara ŵenaŵa alondo chakuwoniyapu chaku Yesu Khristu pakuchiska urunji. Nyengu zosi, yiwu akumbuka kuti Yesu wakhumba kuti mbereri zaki zosi achitengi nazu vinthu mwaurunji, mwambula kutole kanthu kuti ŵanthu wo ŵe ndi udindu wuli, mbakutchuka pamwenga vinthu vo ŵenavu.

22. Kumbi Yehova watuvwa wuli mumtima asani wawona vinthu vambula urunji vo vichitika mucharu mazuŵa nganu, nanga wakusankha Mwana waki kuti wazichitenji?

²² Pambula kuswera yapa, Yesu wajalikiskengi urunji pacharu chosi munthowa yamampha ukongwa. Mu charu chiheni ichi, vinthu vambula urunji ve peposi mazuŵa nganu. Mwakuyeruzgiyapu, nkhuŵavi urunji ukongwa kuti ŵana afwengi ndi nja, penipo vyaru vigwiriskiya ntchitu ndalama zinandi ukongwa kuguliya vidya va nkhondu. Kweniso ŵanthu anyaki ananga ndalama zinandi ukongwa kuti ajikondwesi ŵija. Ŵanthu mamiliyoni nganandi atufwa chaka chechosi chifukwa cha masuzgu ngo atingi akumanengi nangu cha. Kukamba uneneska, vinthu vambula urunji venivi vitimukwiyiska ukongwa Yehova yo ndi Chiuta waurunji. Mwaviyo, iyu wakusankha Mwana waki kuti wazichiti nkhondu ya urunji, ndi chilatu chakuti wazituzgepu charu chiheni ichi kweniso vinthu vosi vambula urunji.—Chivumbuzi 16:14, 16; 19:11-15.

23. Pavuli pa nkhondu ya Aramagedoni, kumbi Khristu wazamuwovya wuli kuti pacharu chosi pazije urunji kwamuyaya?

²³ Kweni urunji waku Yehova ung’anamuwa vinandi kuphara ŵaka kunanga ŵanthu aheni. Iyu wakusankha so mwana waki kuti walamuliyi nge “Mulongozgi Wachimangu.” Pavuli pa nkhondu ya Aramagedoni, ulamuliru waku Yesu wazamujalikiska chimangu pacharu chosi ndipu wazamulamuliya ‘mwaurunji.’ (Yesaya 9:6, 7) Asani venivi vazichitika, Yesu wazamukondwa kugwira ntchitu yakutuzgapu vinthu vosi vambula urunji vo vichitiska kuti ŵanthu anandi asuzgikengi. Ndipu mwakugomezgeka kweniso mpaka muyaya, iyu wazamuwonesesa kuti vinthu vosi vichitika mwakukoliyana ndi urunji waku Yehova. Mwaviyo, pasonu panu tikhumbika kuyesesa kuyezga Yehova pa nkhani yakuchita vinthu mwaurunji. Mu mutu wakulondopu tiwonengi mo tingachitiya venivi.