“Gaŵiyani Magazini Yakali Pamwenga Kabuku Kekosi ko Kangakopa Munthu”

M’myezi yo tigaŵiya buku la, Bayibolo Lisambizanji ndi kwambisa sambiru pa ulendu wakwamba, ndipu mweneku wa nyumba wenalu kali buku ili kweni wakhumba cha kuchita nayu sambiru, tichiskika kuti “timugaŵiyi magazini yakali pamwenga kabuku kekosi ko kangamukopa.” Chifukwa wuli?

Timabuku ndi magazini ngakali nge ndi nkhani zakupambanapambana za pa nyengu yaki. Vingachitika kuti fundu yinyaki ya m’mabuku yanga yingafika pamtima mweneku wa nyumba. Mwaviyo, asani mupanganya mabuku nginu mu chikwama cha mu uteŵeti, mungaluwanga cha kuŵikamu so timabuku ndi magazini ngakali ngakupambanapambana. Asani mulivi magazini ngakali, mungachitoku ku mpingu. Asani mweneku wa nyumba wenalu kali buku la Bayibolo Lisambizanji ndipu wakhumba cha kuchita nayu sambiru la Bayibolo, mungamulongo waka magazini pamwenga timabuku to mwenatu ndi kumukambiya kuti wasankhepu ko kangamukondweska. Pavuli paki, panganani nayu kuti muziweriyeku so kuti mukakuzgi linweka laki. Panyaki ivi vingachitiska kuti sambiru la Bayibolo liziyambiki.