Wovyani Ŵanthu kuti Avwiyengi Chiuta
1. Kumbi nthimabuku niti to tingutuzgika pa Unganu Wachigaŵa wa mutu wakuti “Ufumu Waku Chiuta Uzi,” nanga nchifukwa wuli ngakovya ukongwa?
1 Pa Unganu Wachigaŵa wa mutu wakuti “Ufumu Waku Chiuta Uzi,” pangutuzgika timabuku tifya tiŵi. Kabuku kakuti Vwiyani Chiuta Kuti Muje ndi Umoyu Wamuyaya, ndi kakuti Vwiyani Chiuta. Timabuku iti nthakusuzga cha kufwatuliya chifukwa te ndi nkhani zimana. Kabuku ka Vwiyani Chiuta Kuti Muje ndi Umoyu Wamuyaya, kanguzomerezeka kuti kafwatulikiya mu vineneru 431 panyengu yo katuzgikiyanga.
2. Kumbi mbayani wo ayanduwengi ndi timabuku teniti?
2 Kumbi mbayani wo ayanduwengi ndi timabuku teniti? Ŵanaŵaniyani vinthu vo vichitika kanandi kuzunguliya pacharu chapasi:
• Mupharazgi wakambiskana ndi mweneku wa nyumba, kaya mphaulendu wakwamba pamwenga wakuweriyaku ndipu wawona kuti mweneku wa nyumba waziŵa cha kuŵerenga pamwenga waŵerenga mwakusuzgikiya.
• Mupharazgi wapharazga ku ŵanthu wo alongoro chineneru cho tilivi kufwatuliyapu buku lelosi pamwenga tikufwatuliya ŵaka ngamanavi. Pamwenga wapharazga ku chigaŵa cho ŵanthu anandi aziŵa cha kuŵerenga chineneru cho aŵereŵeta.
• Mupharazgi wagwiriskiya nchitu chineneru cha manja pakupharazgiya munthu wambula kuvwa mu chigaŵa chaki.
• Mpapi wakhumbiskiska kusambiza mwana waki uneneska yo wechendasambiri kuŵerenga.
3. Kumbi kabuku kakuti Vwiyani Chiuta, kakulembeka wuli?
3 Mo Tikulembeke: Kabuku kakuti Vwiyani Chiuta, ke ndi mazu ngamana ukongwa, viganizu vambula kusuzga ndipu pasi pa peji lelosi pe Malemba ngo ngakonkhoska fundu zikuluzikulu. Nchifukwa wuli kakulembeka viyo? Yeruzgiyani kuti munthu munyaki wakupaskani kabuku ka chineneru cho muziŵa cha kuŵerenga, pamwenga chachilendu. Kumbi imwi mungayanja kuŵerenga buku laviyo chinanga kuti lingaŵa ndi vithuzi vakutowa? Ŵanthu anandi angayanja cha. Mwakuyana ŵaka, ŵanthu wo aleka kuziŵa kuŵerenga awona nge nkhuŵanyoza kuŵapaska buku lo le ndi nkhani zinandi. Mwaviyo, nchakukondweska ukongwa kuti peji lelosi le ndi vithuzi vakulongo vakuyeruzgiyapu ndipu chithuzi chechosi chilongozge ku chithuzi chinyaki.
4. Kumbi kabuku kakuti Vwiyani Chiuta Kuti Muje ndi Umoyu Wamuyaya, kakulembeka wuli?
4 Kabuku kakuti Vwiyani Chiuta Kuti Muje ndi Umoyu Wamuyaya, ke ndi vakuyeruzgiyapu vakuyanana ndi vo ve mu kabuku kakuti Vwiyani Chiuta. Kakulembeke kuti tisambiriyengi ndi ŵanthu wo asuzgika kuŵerenga pamwenga wo asambira kuŵerenga. Kabuku yaka kangagwiriskikiya so nchitu ndi msambizi yo wasambira ndi munthu mwakugwiriskiya nchitu kabuku kakuti Vwiyani Chiuta. Pachanya pa Peji la kumazge lelosi pe fumbu lo limukika pa mapeji ngaŵi ngakujalizgana. Kusazgiya pa vinthuzi, mwe so fundu ndi malemba. Mumphata mwa mapeji nganyaki mwe kabokosi ko mwe fundu ndi Lemba lakuti mukambiskani malinga ndi mo wavwisiskiya munthu yo tisambira nayu.
5. Mphanyengu niyi po titenere kugaŵiya timabuku iti, nanga tingagaŵiya wuli?
5 Mo Tingatigwiriskiya Nchitu: Mukhoza kugaŵiya kamoza mwa timabuku tiŵi teniti asani mwe mu uteŵeti wa khomu ndi khomu asani muwona kuti mphakwenere kugaŵiya timabuku to chinanga kuti ndi mwezi waki cha wakugaŵiya timabuku iti. (Wonani bokosi lakuti “Mo Tingagaŵiya Timabuku Teniti.”) Mungagaŵiya so pa ulendu wakuweriyaku ndipu mungamukambiya munthu wakunweka kuti mwe ndi kabuku ko mukhumba kumulongo, pavuli paki mupaskeni kabuku.
6. Kumbi tingachitiska wuli sambiru la Bayibolo pakugwiriskiya nchitu timabuku iti?
6 Chifukwa chakuti kabuku kakuti Vwiyani Chiuta kalivi mafumbu, kukambiskana kwaki kuŵengi kwa mafumbu ndi kwamuka cha nge mo vijaliya ndi buku lakuti Bayibolo Lisambizanji. Mu vyaru vakupambanapambana ŵanthu atanja kuvwisiya nkhani. Mugwiriskiyengi nchitu vinthuzi pakukonkhoska nkhani zo ze m’Bayibolo. Konkhoskani vo chithuzi cho ching’anamuwa. Mukonkhoskengi mwalikondwa. Mufumbeni munthu yo musambira nayu kuti wakonkhoski vo wawona ndi vo waŵanaŵana. Ŵerengani malemba ngo nge mumphata ndi kukonkhoska vo ngakamba. Mufumbengi mafumbu kuti nayu walongolongepu ndipu muwoneseskengi kuti wavwisiska. Asani wagwiriskiya nchitu kabuku kakuti Vwiyani Chiuta Kuti Muje ndi Umoyu Wamuyaya, muŵerengiyengi nayu limoza mazu ngo nge pa vithuzi ndi malemba pakukonkhoska chithuzi chechosi.
7. Kumbi mungamuwovya wuli wakusambira Bayibolo kuti waluti panthazi?
7 Wovyani Wakusambira Kuti Waluti Panthazi: Tigomezga kuti kukambiskana kwinu kuwovyengi wakusambira winu kuti waje ndi khumbu la kusambira kuŵerenga ndi chilatu chakuti wasambirengi yija vakukwaskana ndi Yehova. (Mate. 5:3; Yoha. 17:3) Mwaviyo, asani mukambiskana mu kabuku kakuti Vwiyani Chiuta, nyengu zinyaki mungajipereka kumusambiza kuŵerenga ndipuso mungayamba kusambira kabuku kakuti Vwiyani Chiuta Kuti Muje ndi Umoyu Wamuyaya. Kumaliza kusambira timabuku teniti kungachitiska cha kuti munthu yo musambira nayu waje wakunozgeka kubatizika. Mutenere kwamba kusambira buku la Bayibolo Lisambizanji pamwenga buku linyaki lelosi lakwenere lo lingamuwovya kuti wavwisiski vo Bayibolo lisambiza.
8. Nchifukwa wuli te akuwonga ukongwa kugwiriskiya nchitu timabuku iti mu uteŵeti?
8 Ŵanthu atenere kuvwiya Wakuwusa wa chilengedu chosi asani akhumba kuzija ndi umoyu wamuyaya. (Yesa. 55:3) Yehova wakhumba kuti “ŵanthu wosi” asambiri kumuvwiya kusazgapu wo aleka kuziŵa kuŵerenga. (1 Timo. 2:3, 4) Te akuwonga ukongwa chifukwa cha timabuku tifya iti to titigwiriskiyengi nchitu pakusambiza ŵanthu kuti aziŵi vo angachita kuti avwiyi Yehova.
[Bokosi papeji 3]
Mo Tingagaŵiya Timabuku Teniti
Mulongoni mweneku wa nyumba peji 2 ndi 3 ndipu kambani kuti: “Kumbi mungayanja kuja mu charu chakuwoneka nge ichi? [Lindizgani kwamuka] Bayibolo lilayizga kuti pambula kuswera yapa Chiuta wasinthengi charu ichi kuja chakutowa ndipuso cha chimangu mo mwazamuŵavi mukavu ndipuso matenda. Wonani vo tikhumbika kuchita kuti nasi tikajemu. [Ŵerengani lemba la Yesaya 55:3 lo le pachanya pa peji 3.] Lemba ili lititikambiya kuti ‘tizi’ kwaku Chiuta ndi kumuvwiya. Sonu tingachita wuli kuti tivwiyi Chiuta?” Julani pa peji 4 ndi 5 ndipu kambiskanani nayu kwamuka kwa fumbu ili. Asani walivi nyengu musiliyeni kabuku ndipu panganani nayu kuti mukawe so kuzikambiskana kwamuka kwa fumbu lo.