Kovya Ŵanthu wo Kungaja Kwakusuzga Kusambira Nawu Buku la Bayibolo Lisambizanji
1. Kumbi mbanthu wosi wo angazomera kwamba kusambira nawu buku la Bayibolo Lisambizanji pa ulendu wakwamba? Konkhoskani.
1 Kuti munthu wayambi kusopa Yehova, wakhumbika kuziŵa vo Bayibolo lisambiza. Kweni ŵanthu anyaki ŵe m’visopa vachikhristu cha ndipu agomezga cha kuti Bayibolo ndi mazu ngaku Chiuta. Anyaki agomezga cha kuti kwe Chiuta ndipu Bayibolo nalu alivi nalu nchitu. Kumbi ndi nthowa nizi zo zingawovya kuti munthu wasinthi maŵanaŵanu ngaki ndi kwamba kusambira buku la Bayibolo Lisambizanji? Masachizgu ngo nge m’nkhani iyi ngalembeka kutuliya pa vo apharazgi akutuliya mu vyaru 20 angukamba.
2. Kumbi tingamufumbanji munthu yo watikambiya kuti wagomezga Chiuta cha, nanga nchifukwa wuli?
2 Ŵanthu wo Aleka Kugomezga Kuti kwe Chiuta: Asani munthu wakamba kuti wagomezga cha kuti kwe Chiuta, mungachita umampha kumufumba chifukwa cho wakambiya viyo. Kumbi nchifukwa chakuti wagomezga kuti vinthu vikuchita kusambuka? Kumbi wakuleka kugomezga kuti kwe Chiuta chifukwa cha vinthu vambula urunji vo vichitika m’charu kweniso mumatchalitchi? Kumbi watuliya ku charu cho ŵanthu akanizgika kugomezga Chiuta? Panyaki wakana cha kuti Chiuta waliku kweni wakhumba ŵaka cha kumugomezga. Apharazgi anandi asaniya kuti kumufumba fumbu lakuti, “Kumbi mukwamba zuŵanji kuŵanaŵana viyo?” kutimuchitiska kuti wakonkhoski. Mumuvwisiyengi asani wakonkhoska ndipu mungamudumulizganga cha. Asani taziŵa chifukwa cho waleke kugomezga kuti kwe Chiuta, tiziŵengi mo tingamukiya kweniso buku lakwenere kumupaska.—Nthanthi 18:13.
3. Kumbi tingalongo wuli kuti titumbika munthu kweniso vo wagomezga?
3 Mutenere kumuka mwakuphwere kuti munthu waleki kuŵanaŵana kuti mususka vo iyu wagomezga. Ku United States kukutuliya sachizgu lakuti: “Kutumbika wanangwa wa munthu pa vo wagomezga nkhwakukhumbika ukongwa. M’malu mwakulongo kuti imwi ndimwi muneneska, nkhwamampha kumufumba mafumbu ngo ngangamuwovya kuŵanaŵana kweniso kusankha vakwenere kugomezga.” Wakuwonere dera munyaki asani wavwa vo mweneku wa nyumba wakamba, watanja kumufumba kuti, “Kumbi mukuŵanaŵanapu kuti venivi vingachitika?”
4. Kumbi tingaŵawovya wuli ŵanthu a chisopa cha Chibuda?
4 Ŵanthu anandi a chisopa cha Chibuda, atimuziŵa cha Chiuta. Pakupharazgiya ŵanthu ŵenaŵa, apharazgi anyaki a ku Britain atanja kugwiriskiya nchitu kabuku ka Chingelezi kakuti Lasting Peace and Happiness—How to Find Them. Pavuli pakukambiskana mazu ngakwamba nga m’kabuku yaka, aluta pamutu wo ukonkhoska kuti Chiuta waliku nadi ndipu pavuli paki akambiskana so mutu wo ukonkhoska kuti Bayibolo ndi buku lo lingawovya ŵanthu kuti azilonde vitumbiku. Asani amaliza, atamba kukambiskana nawu fundu za m’buku la Bayibolo Lisambizanji ndipu atimukambiya mweneku wa nyumba kuti, “Chinanga kuti mugomezga kuti kulivi Chiuta, kweni kusambira Bayibolo nkhwakukhumbika ukongwa chifukwa le ndi ulongozgi wakovya.” Mpayiniya munyaki ku United States yo wapharazgiya ŵanthu anandi akutuliya ku China, wangukamba kuti: “Ŵanthu anandi m’chigaŵa chidu atanja kuŵerenga. Mwaviyo, kanandi asani tiweriyaku, titachisaniya kuti akumalizga kuŵerenga buku lo tinguŵagaŵiya. Kweni yiwu avwisa cha chilatu chakusambiriya Bayibolo. Nditanja kuŵagaŵiya kabuku ka Uthenga Wamampha pa ulendu wakwamba chifukwa kachitiska ŵanthu kukhumba kuziŵa vinandi.” Wakuwonere dera munyaki yo wateŵete ku United States m’dera la chineneru cha ku China wangukamba kuti palivi suzgu kwamba kusambira ndi ŵanthu buku la Bayibolo Lisambizanji pa ulendu wakwamba. Kweni vingaja umampha ukongwa kwamba kusambira nawu mutu 2 wo ukonkhoska Bayibolo m’malu mwakwamba kusambira nawu mutu 1 wo ukonkhoska vakukwaskana ndi Chiuta.
5. Nchifukwa wuli tikhumbika kufwa daka cha?
5 Tingafwanga daka cha chifukwa pato nyengu kuti munthu wayambi kugomezga Chiuta. Kukambiskana nayu kamoza pe kungamuwovya cha kuti wazomerezgi kuti Mulengi waliku nadi. Kweni mukuluta kwa nyengu wangazomerezga kuti vingachitika kuti Chiuta waliku nadi pamwenga wangakamba kuti wavwisa chifukwa cho ŵanthu anyaki aŵanaŵaniya viyo.
6. Nchifukwa wuli ŵanthu anyaki akhumba cha kusambira Bayibolo?
6 Ŵanthu Ambula Linweka Pamwenga wo Aleka Kugomezga Bayibolo: Kanandi ŵanthu wo azomerezga kuti Chiuta waliku akhumba cha kuziŵa vo Bayibolo lisambiza chifukwa agomezga cha kuti ndi Mazu ngaku Chiuta. Nyengu zinyaki ŵanthu angaŵanaŵana viyo chifukwa chakuti atuliya m’charu cho ŵanthu anandi mbakhristu cha ndipu awona kuti Bayibolo ndi buku lachikhristu. Kumbi tingaŵawovya wuli ŵanthu aviyo kuti awonengi Bayibolo mwakwenere ndipuso kuti azomeri kusambira Bayibolo mwakugwiriskiya nchitu buku la Bayibolo Lisambizanji?
7. Kumbi ndi nthowa yamampha niyi yo tingawovye ŵanthu wo akana kuziŵa vo Bayibolo likamba?
7 Ofesi ya nthambi ya ku Greece yingulemba kuti: “Kuŵajuliya kuti awoni vo ve mukati ndiyu nthowa yamampha ukongwa yakovye ŵanthu wo akana kuziŵa vo Bayibolo likamba. Apharazgi anandi asaniya kuti uthenga wa m’Bayibolo ukwaska ukongwa mtima wa munthu kuluska mazu nganyaki ngengosi ngo munthu wangakamba. (Ŵah. 4:12) Kuwona kuti m’Bayibolo musanirika zina laku Chiuta kwachitiska kuti ŵanthu anandi ayambi kuliŵerenga.” Ofesi ya nthambi ya ku India yingukamba kuti: “Ahindu anandi akondwa kuziŵa uneneska wakukwaskana ndi umoyu kweniso nyifwa. Atanja so kuvwa layizgu la m’Bayibolo la charu chambula masuzgu.” Kukambiskana vakukwaskana ndi masuzgu ngo ngachitika m’chigaŵa chawu, kutovya apharazgi kuti alongo ŵanthu vo Bayibolo likamba kuti Ufumu waku Chiuta wazamuchita.
8. Kumbi tingaŵakambiyanji ŵanthu wo aleka kwanja Bayibolo chifukwa cha vakuchita va visopa vachikhristu?
8 Asani munthu munyaki watiligomezga cha Bayibolo chifukwa cha vakuchita va visopa vachikhristu, mukambiyeni kuti visopa vachikhristu vatimbanyizga ukongwa vo Bayibolo lisambiza. Ofesi ya nthambi ya ku India yingulemba kuti: “Nyengu zinyaki tikhumbika kuŵawovya ŵanthu kuti aziŵi kuti matchalitchi ndingu ngeneku nga Bayibolo cha.” Yingulemba so kuti, kanandi Ahindu akondwa kusambira mutu 4 wa kabuku kakuti What Is the Purpose of Life? How Can You Find It?, wo ukonkhoska mo matchalichi ngayuyuliya kweniso kutimbanyizga Mazu ngaku Chiuta. Mpayiniya wa ku Brazil wakambiya ŵanthu kuti: “Mwalekiyanji kufufuza kuti muziŵi vinandi vo Bayibolo likamba? Ŵanthu anandi aŵerenga Bayibolo chifukwa chakuti ndi buku la chisopa ŵaka cha kweni aja ndi chilatu chakuti aziŵi vo likamba. Mungazizwa ndi vo mungasaniya m’Bayibolo.”
9. Nchifukwa wuli tikhumbika kufwa daka cha asani munthu munyaki wakhumba cha kuziŵa vo Bayibolo lisambiza?
9 Yehova walereska mumtima wa munthu weyosi. (1 Sam. 16:7; Nthanthi 21:2) Iyu wadana ŵanthu a mtima wamampha kuti amusopengi mwauneneska. (Yoh. 6:44) Ŵanthu anandi aviyo aja kuti ŵechendasambirepu vakukwaskana ndi Chiuta pamwenga aliziŵanga umampha cha Bayibolo. Uteŵeti widu utiŵapaska mwaŵi wa “kutaskika ndi kufikapu pa mziŵiru wa uneneska.” (1 Tim. 2:4) Mwaviyo, mungafwanga daka cha asani munthu munyaki wakhumba cha kuziŵa vo Bayibolo lisambiza. Mungagwiriskiya nchitu vipangizu vo mwenavu mchineneru chinu kuti muŵawovyi kuti ayambi kwanja Bayibolo. Mukuluta kwa nyengu mungaziyamba kusambira nawu buku la Kumbi Bayibolo Lisambizanji Weniukongwa? lo tigwiriskiya nchitu pa kusambira Bayibolo ndi ŵanthu.
[Bokosi papeji 4]
Asani mweneku wa nyumba wakamba kuti Chiuta kulivi, yesani nthowa izi:
• Kuti muziŵi cho chikumuchitiska kuja ndi maŵanaŵanu ngenanga mufumbeni kuti, “Mukwamba zukwanji kugomezga venivi?”
• Asani ngwa chisopa cha Chibuda, mungagwiriskiya nchitu kabuku ka Lasting Peace and Happiness—How to Find Them, peji 9-12.
• Asani wagomezga kuti vamoyu vikuchita kusambuka, mungagwiriskiya nchitu:
Nkhani za mu Galamukani! za mutu wakuti “Kodi Zinangochitika Zokha?”
Vidiyo ya mutu wakuti The Wonders of Creation Reveal God’s Glory
Timabuku ta, Moyo Wokhutiritsa Mmene Mungaupezere, mutu 4; Was Life Created? ndi The Origin of Life—Five Questions Worth Asking
• Asani wakuleka kugomezga Chiuta chifukwa cha masuzgu ndi vinthu vambula urunji vo vichitika mungagwiriskiya nchitu:
Buku la Is There a Creator Who Cares About You?, mutu 10
Timabuku ta, Kodi Mulungu Amatisamaliradi?, mutu 6 ndi What Is the Purpose of Life?, mutu 6
• Yambani kusambira nayu buku la Bayibolo Lisambizanji asani wayamba kuzomerezga kuti Chiuta waliku. Vingaja umampha kwamba kusambira nayu mutu 2 pamwenga mutu unyaki wo wangakondwa nawu.
[Bokosi papeji 5]
Mungayesa nthowa izi asani mweneku wa nyumba watiligomezga cha Bayibolo:
• Mungasambira nayu mutu 17 ndi 18 wa buku la Life—How Did It Get Here? By Evolution or by Creation?
• Asani ndi Muhindu, mungagwiriskiya nchitu kabuku ka Why Should We Worship God in Love and Truth?
• Asani ndi Muyuda, mungagwiriskiya nchitu kabuku ka Will There Ever Be a World Without War?, peji 3-11.
• Kambiskanani nawu vitumbiku vo angasaniya chifukwa chakulondo fundu za m’Bayibolo. Vipangizu vo mungagwiriskiya nchitu kuti mulongo munthu fundu zakovya za m’Bayibolo:
Nkhani za mu Galamukani! za mutu wakuti “Mfundo Zothandiza Mabanja”
Vidiyo ya The Bible—Its Power in Your Life
Timabuku ta, Uthenga Wamampha Wakutuliya Kwaku Chiuta, sambiru 9 ndi 11; Buku la Anthu Onse, peji 22-26; ndi Moyo Wokhutiritsa Mmene Mungaupezere, chigaŵa 2
Asani ngwa chisopa cha Chibuda, mungagwiriskiya nchitu kabuku ka The Pathway to Peace and Happiness, peji 3-7.
Asani ndi Musilamu, mungagwiriskiya nchitu kabuku ka Real Faith—Your Key to a Happy Life, chigaŵa 3.
Asani mupharazga muchigaŵa cho ŵanthu atinkha Bayibolo, vingaŵa umampha kukambiskana nawu kwambula kujula Bayibolo mpaka po mwaweriyaku maulendu nganandiku.
• Konkhoskani mo malayizgu nga m’Bayibolo ngafiskikiya. Mungagwiriskiya nchitu:
Vidiyo ya The Bible—Accurate History, Reliable Prophecy
Buku la Anthu Onse peji 27-29
• Yambani kusambira nayu buku la Bayibolo Lisambizanji mwaliŵi asani wafumba kuti waziŵi vo Bayibolo lisambiza pa nkhani zakupambanapambana.
[Bokosi papeji 6]
Asani mweneku wa nyumba wakamba kuti: “Ndigomezga kuti Chiuta kulivi,” mungakamba kuti:
• “Kumbi mungayanja kuti ndikukonkhoskiyeni mwakudumuwa vo vikundichitiska kuti ndiyambi kugomezga kuti kwe Mulengi?” Pavuli paki kambiskanani nayu fundu za m’buku la Kukambitsirana, peji 74-76, pamwenga mungamupempha kuti muzimupaski buku lo imwi mutanja kuŵerenga.
• “Sonu asani Chiuta wengaku mwatingi muyanjengi kuti waje ndi mijalidu wuli?” Ŵanthu anandi atanja kumuka kuti angayanja Chiuta wachanju, walisungu, wambula kwanjiya ndipuso wakuchita vinthu mwaurunji. Pavuli paki, mulongoni mijalidu yeniyi yaku Chiuta kutuliya m’Bayibolo. (Mukhoza kugwiriskiya nchitu mutu 1 wa buku la Bayibolo Lisambizanji kwambiya pandimi 6.)
Asani Mweneku wa nyumba wakamba kuti: “Nditiligomezga cha Bayibolo,” mungakamba kuti:
• “Mbanthu anandi wo aŵanaŵana viyo. Anyaki aŵanaŵana kuti Bayibolo lineneska cha pa nkhani za sayansi pamwenga ulongozgi waki ngwambula kovya. Kumbi imwi mukuŵerengapu Bayibolo? [Lindizgani kwamuka. Pavuli paki mulongoni mazu ngakwamba ngo nge papeji 3 mu kabuku ka Buku la Anthu Onse, ndipu mugaŵiyeni kabuku ko.] Ŵanthu anandi akuleka kuligomezga Bayibolo chifukwa visopa vatimbanyizga ukongwa vo Bayibolo lisambiza. Ndikhumba kuti ulendu unyaki tizikambiskani chakuyeruzgiyapu cha papeji 4 ndi 5.”
• “Ndimwi pe cha muŵanaŵana viyo. Kumbi mungayanja kuti ndikulongoni fundu yinyaki ya m’Bayibolo yo yitindikondweska ukongwa? [Ŵerengani Jobu 26:7 pamwenga Yesaya. 40:22. Malemba yanga ngalongo kuti Bayibolo lineneska pa nkhani za sayansi.] M’Bayibolo mwe so fundu zo zingawovya mabanja. Pa ulendu wasonu ndazakukulongoni zinyaki mwa fundu zenizi.”
• “Ndawonga ukongwa kuti mwandikambiya maŵanaŵanu nginu. Kumbi muŵanaŵana kuti asani Chiuta wanguŵalembe buku ŵanthu, buku lo latingi liŵengi ndi nkhani wuli?” Pavuli paki, mulongoni nkhani yeyosi ya m’Bayibolo yo yikoliyana ndi vo wakamba.