Nchitu Yakudaniya Ŵanthu ku Chikumbusku Yazamukwamba pa March 17
1. Kumbi ndi nchitu niyi yo yazamukwamba pa March 17?
1 Chaka chechosi, nyengu ya Chikumbusku yititipaska mwaŵi wakupharazga nyifwa yaku Yesu. (1 Ŵako. 11:26) Mwaviyo, tikhumba kuti ŵanthu anyaki azisanirikepu kuti nawu azivwi vakukwaskana ndi chanju cho Yehova wakutilongo pakutipaska sembi ya uwombozi. (Yoha. 3:16) Chaka chinu nchitu yidu yakudaniya ŵanthu ku Chikumbusku yazamukwamba pa Chisulu, March 17. Kumbi mwanozgeka kuzigwira nchitu iyi mwakukwana?
2. Kumbi tingakambanji pakugaŵiya kapepala kakudaniya ŵanthu ku Chikumbusku?
2 Vo Tingakamba: Tingazichita umampha ukongwa kuzikamba mwakudumuwa. Tikhoza kuzikamba kuti: “Mweuli? Taza kuti tizipaski banja linu kapepala yaka kakukudaniyani ku mwambu wo uchitikengi pa charu chosi chapasi pa 5 April. Kwamukambika nkhani ya m’Bayibolo yakukonkhoska vo vachitika chifukwa cha nyifwa yaku Yesu ndipuso vo iyu wachita sonu. Kapepala yaka kalongo malu kweniso nyengu yo unganu uwu wamuchitikiya mu chigaŵa chidu chinu.” Asani tigaŵiya kapepala yaka pa Chisulu ndi pa Sabata, tikhoza so kuzigaŵiya magazini.
3. Kumbi tingachita wuli kuti tizidani ŵanthu anandi?
3 Muziyesesi Kudana Ŵanthu Anandi: Chilatu chidu nchakuti tiziyesesi kudana ŵanthu anandi. Mwaviyo, muziyesesi kudana wo musambira nawu Bayibolo, wo munguŵayende kachiŵi, abali ŵinu, wo mugwira nawu nchitu, wo musambira nawu sukulu, azengezgani ŵinu ndi anyaki wosi wo muziŵana nawu. Ŵara a mpingu azamukonkhoska mo mwazamuchitiya kuti muzipharazgi mu chigaŵa chinu chosi. Nchitu yidu yakudaniya ŵanthu ku Chikumbusku yo tigwira chaka chechosi yija ndi vakutuwapu vamampha. Chaka chamala, munthukazi munyaki wati waza ku Chikumbusku, akalindi akhumbanga kuti amuwovyi kusaniya mpharazgi yo wangumudana. Kweni iyu wangumuka kuti palivi yo waziŵananga nayu kweni ndi mlenji wangulonde waka kapepala ku ŵanthu wo ayendanga nyumba ndi nyumba pa zuŵa lo.
4. Nchifukwa wuli titenere kuzigwira mwaphamphu nchitu yakudaniya ŵanthu ku Chikumbusku?
4 Akhumba ŵanthu anyaki azamukuza ku Chikumbusku chifukwa cha kapepala ko mwakuŵasiriya. Kwali ŵanthu wo mwazamudana azamukuza pamwenga cha, kweni phamphu linu lazamulongo kuti mwachitiya ukaboni. Timapepala to mwazamugaŵiya tazamulongo kuti sonu Yesu ndi Fumu yanthazi. Phamphu linu pakugwira nchitu iyi lazamuchitiska kuti wosi wo atikuwonani, kusazgapu ŵanthu a m’chigaŵa chinu, apharazgi anyinu ndipuso Yehova, aziziŵi kuti muwonga ukongwa chawanangwa cha sembi ya uwombozi.—Ŵako. 3:15.