Nchitu Yakudaniya Ŵanthu ku Chikumbusku Yazamukwamba pa March 1

1. Kumbi nchitu yakudaniya ŵanthu ku Chikumbusku yazamukwamba zukwanji, nanga nchifukwa wuli nchitu iyi yigwirikengi kwa nyengu yitaliku chaka chinu?

¹ Nchitu yakudaniya ŵanthu ku Chikumbusku yazamukwamba pa Chinkhondi, March 1. Chikumbusku chazamuchitika pa March 26, ndipu tazamuja ndi nyengu yinandi yakudaniya ŵanthu ku Chikumbusku kujumpha vyaka vakuvuli. Ivi vazamuwovya kuti mipingu yo ye ndi vigaŵa vikulu yizigaŵiyi ŵanthu anandi timapepala iti.

2. Kumbi tazamutonga wuli timapepala takudaniya ŵanthu ku Chikumbusku?

² Ndondomeku Yakugaŵiya Timapepala: Ŵara azamukonkhoska mo tazamugwiriya nchitu yakugaŵiya timapepala, kweniso azakutikambiya asani tikhumbika kusiya timapepala pa nyumba zo taleka kusaniyapu ŵanthu. Asani tamaliza kugaŵiya nyumba zosi m’chigaŵa chidu, tikhoza kuzigaŵiya timapepala takujaku kwekosi ko tasaniya ŵanthu. Wakuwonere uteŵeti wazamuwoneseska kuti timapepala tosi takulembeke limu tiziŵikiki pa malu ngakutole magazini kuti mupharazgi weyosi wazitongepu, kweni timapepala tinyaki tazamuperekekanga asani apharazgi atitikhumba. Tizitongi ŵaka timapepala to tazamuwona kuti tingafiska kugaŵiya sabata yimoza pe.

3. Kumbi nchinthu wuli cho titenere kukumbuka pakugaŵiya timapepala?

³ Kumbi Tingazichita Wuli? Tizikambengi mwakudumuwa kuti tizigaŵiyi ŵanthu anandi. Pa peji 4 pe sachizgu la vo mungakamba, kweni mukhoza kulisintha mwakuyanana ndi chigaŵa chinu. Asani mweneku wa nyumba wakhumba kuvwa vinandi pamwenga we ndi mafumbu, tingathaŵiriyanga cha. Asani tigaŵiya timapepala pa Chisulu ndi Sabata, tingazigaŵiya so Magazini. Pa March 2, tazamugaŵiya timapepala takudaniya ŵanthu ku Chikumbusku m’malu mwakwambiska masambiru nga Bayibolo.

4. Nchifukwa wuli titenere kuzigwira nchitu yakudaniya ŵanthu ku Chikumbusku ndi mtima wosi?

⁴ Te ndi chigomezgu kuti ŵanthu anandi azengi ku Chikumbusku. Nkhani ya Chikumbusku yazamukonkhoska kuti Yesu ndiyani. (1 Ŵakor. 11:26) Yazamukonkhoska so mo nyifwa yaki yititiwovye. (Ŵar. 6:23) Kweniso chifukwa cho titenere kumukumbukiya. (Yoh. 17:3) Mwaviyo, tiyeni tiziyesesi kugwira nchitu iyi ndi mtima widu wosi!