Nchitu Yakugaŵiya Timapepala Takudaniya Ŵanthu ku Chikumbusku Iyambengi pa 2 April
1. Kumbi tazamukwamba zukwanji kugaŵa timapepala takudaniya ŵanthu ku Chikumbusku chaka chinu, nanga nchifukwa wuli nchitu iyi njakukhumbika ukongwa?
1 Kwambiya pa 2 April mpaka pa 17 April, tazamugwira nchitu yakugaŵiya timapepala takudaniya ŵanthu ku zuŵa lakukhumbika ukongwa pachaka, zuŵa la Chikumbusku cha nyifwa yaku Khristu. Kuvuli uku, ŵanthu anandi azanga ku Chikumbusku asani adanika. Mwakuyeruzgiyapu, pa zuŵa la Chikumbusku, munthukazi munyaki wangumba foni ku ofesi ya nthambi ndi kukamba kuti: “Ndifika waka sonu panyumba ndipu ndasaniya kapepala ka mdanu pa khomu langu. Ndikhumbisiska kuluta, kweni nyengu yo mwambu uwu uyambiyengi nditiyiziŵa cha.” Mubali yo wakambiskananga nayu wangumukambiya po wangasaniya nyengu ndi malu pa kapepala ka mdanu. Pavuli paki munthukazi uyu wangulayizga kuti, “Ndikengi ku mwambu winu mazulu nganu!”
2. Kumbi tingakambanji pakugaŵiya kapepala kakudaniya ŵanthu ku Chikumbusku?
2 Mo Tazamuchitiya: Chifukwa chakuti nyengu yakugaŵiya timapepala iti njimana, kuti timalizi chigaŵa chidu chosi tingachita umampha kukamba mwakudumuwa. Tingayamba ndi kutawuzgana nawu, pavuli paki tingakamba kuti: “Tikhumba kugaŵiya banja linu kapepala kakukudaniyani ku mwambu wakukhumbika ukongwa wa pachaka wo uchitikengi pa charu chosi chapasi pa Sabata, 17 April. [Perekekani kapepala yaka kwa mweneku wa nyumba.] Zuŵa ili ndakukumbukiya nyifwa yaku Yesu. Pazamukambika nkhani ya Bayibolo yo yazamukonkhoska mo isi tingayanduliya ndi uwombozi waku Khristu. Kapepala yaka kalongo malu ndi nyengu yo mwambu uwu wazamuchitiya mu chigaŵa chidu.”
3. Kumbi tingachita wuli kuti tidani ŵanthu anandi?
3 Asani chigaŵa cha mpingu winu nchikulu, ŵara a mpingu angakukambiyani kuti musiyengi kapepala pakweru, pa nyumba zo mwaleka kusaniyapu ŵanthu. Muziyesesi kudana ŵanthu wo munguweliyaku pavuli pakuŵapharazgiya, achibali, wo mugwira nawu nchitu, anyinu akusukulu ndipuso anyaki wosi wo muziŵana nawu. Asani tigaŵiya timapepala iti pa Chisulu ndi pa Sabata, tigaŵiyengi so magazini asani nkhwakwenere. Kumbi mungafiska kuchita upayiniya wakovya mu mwezi wa April kuti mukondwi ukongwa ndi nchitu yapade iyi?
4. Kumbi nchifukwa wuli tikhumba kuti ŵanthu akunweka azisaniriki pa Chikumbusku?
4 Ŵanthu wo azamusanirika pa mwambu uwu azamuwona ukaboni wanthazi ukongwa. Azamukuvwa vakukwaskana ndi chanju chikulu chaku Yehova pakupereka sembi ya uwombozi. (Yoha. 3:16) Azamusambira mo ŵanthu azamuyanduliya ndi Ufumu waku Chiuta. (Yesa. 65:21-23) Azamupempheka so kuti akumani ndi akalindi kuti apemphi sambiru la Bayibolo. Rombu lidu ndakuti ŵanthu akunweka aziwungani nasi pa mwambu wa Chikumbusku.