Nchitu Yakudaniya Ŵanthu ku Unganu Wachigaŵa

Kwa masabata ngatatu unganu wachigaŵa wechendachitiki, mipingu yazamugwira nchitu yakudaniya ŵanthu akunweka ku unganu wenuwu. Pe chifukwa cho tichitiya nchitu iyi chaka chechosi. Ŵanthu wo adanika kuti ŵazi ku unganu wachigaŵa, achiskika ndi nkhani za m’Malemba zo zikambika, mo madipatimenti ngatendese umampha nchitu ndi ŵanthu akujipereka, nkharu yamampha ndipuso mo tichitiya vinthu mwakukoliyana. (Sumu 110:3; 133:1; Yes. 65:13, 14) Kumbi ŵanthu akunweka wo akhumbika kwenda mtunda utali kuti akafiki ku unganu wachigaŵa nawu ayanduwa?

Pavuli pa unganu wachigaŵa wa 2011, ofesi ya nthambi yingulonde kalata kutuliya ku munthukazi munyaki yo wangusaniya kapepala kakudaniya ŵanthu ku unganu wachigaŵa pakhomu. Munthukazi uyu, wayanjanga kubisama asani Akaboni aku Yehova awode panyumba paki. Iyu wangulemba kuti: “Nde ndi nyumba yakutowa, munthurumi wamampha ndipu ndaŵanaŵananga kuti nde ndi vinthu vosi vo vingandiwovya kuti ndije wakukondwa. Kweni ndipu wuli, ndachiziŵanga cha chilatu cha umoyu. Mwaviyo, ndingwenda pa galimotu yangu mtunda wa makilomita 320 kuti ndikasanirikepu pa zuŵa la Chisulu.” Wangukondwa ukongwa ndi unganu uwu mwakuti wangumbiya foni murumu waki kuti wagonengi kuti wasanirikepu so pa Sabata. Iyu wangukamba so kuti: “Ndinguvwisiya nkhani zosi, ndingukumana ndi Akaboni aku Yehova anandi ndipu ndakhumba cha kuti vosi ivi vimaliyi waka munthowa.” Wati wawere kunyumba, munthukazi uyu wangwamba kusambira Bayibolo ndipu pati pajumpha myezi yinayi wanguja mupharazgi wambula kubatizika. Iyu wangulutirizga kukamba kuti: “Ndiwonga ukongwa kuti sonu ndiziŵa chilatu cha umoyu chifukwa cha kapepala ko ndingusaniya pakhomu la nyumba yangu!”

Ŵanthu anyaki wo azamudanika ku unganu wachigaŵa azamukuza. Mwaviyo tiyeni tijipereki kugwiraku nchitu yakuzirwa iyi. Asani timapepala teniti tazijaku muzitipingi pakuluta unganu kuti mukatigwiriskiyi nchitu pakupharazga mwamwaŵi.

[Chithuthuzi papeji 5]

Kumbi Tazamugaŵiya Wuli Timapepala Teniti?

Kuti tizifiski chigaŵa chidu chosi, tizikambengi mwakudumuwa. Tingazikamba kuti: “Mweuli? Tigwira nchitu yakupereka timapepala takudaniya ŵanthu ku unganu. Namwi kinu yaka. Muvwengi vinandi kutuliya pa kapepala kenaka.” Akambiyeni fundu iyi mwakuvwika umampha. Asani tigaŵiya timapepala iti pa Chisulu ndi pa Sabata, tikhoza kugaŵiya so magazini.